دق الدلجة محمد عبد الماجد مازيمبي غالب (5) لكن المريخاب عشان قلوبهم خفيفة قولوا ليهم (تعادل) تذكروا …تذكروا…تذكروا (الطيارة الخاصة) الجات الخرطوم في السخانة ديك. تذكروها!!؟. الطيارة ام ريش. طيارة (غبيشه) كدا ..وفيها (21) شباك…و(18) عفريت ..ما بتفاهموا في (الكورة). اها الطيارة (المطريشة) ديك – تاني ح تجي الخرطوم. الظروف بتجيبها!!. وح تجكيم كمان بي (عفاريتها). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). تذكروا …الجماعة القعد معاهم غارزيتو جلسة سرية في فندق السلام روتانا؟. جلسة اخوية كدا…(ما فيها حاجة). جلسة ودية ساكت ..(ما فيها اي تسريبات). تسيريبات شنو ؟..القال تسريبات منو؟. الجماعة (الروش) ديك. الواحد فيهم تلقاهو عندو (21) اضان. الواحد فيهم شايل ليه معرض اضنين في وشو. الجماعة ديك …ح يلعبوا معاكم. بي اضنينهم الكتيرة. عشان الكلام يبقى ليكم واضح. ما في احسن من الصراحة – والكلام الدغري. اوعك يا الكوكي نشوفك في برج الفاتح. حركات غارزيتو ديك – نحن ما بتنفع معانا. ولا بالغلط ما نشوفك هناك..لا جلسة (ودية) ولا جلسة تعارف ساكت. شفت (الواحة) ما عاوزين نشوفك فيها يا الكوكي. تذكروا.. تذكروا (مبوانا ساماتا) الجابتو صحف المريخ وهو قاعد بتسوق في مول عفراء. تذكروه. الزول دا تاني ح يجي الخرطوم. بس المرة دي ما عشان يتسوق في (عفراء) ..المرة دي (مبوانا ساماتا) عاوز يتسوق في (الرد كسل). قالوا ليك ضفر ..عرفها. ضفر قبل اي شيء – عمل ليك فيها اتعرض لي اصابة. اتصاب قبل 24 ساعة من مباراة مازيمبي – عشان ما في اي زول يقول حاجة. يا زول (مبوانا ساماتا) دا امس جايب ليه تلاتة اقوان. عليك الله ما تقول كدا…الجماعة ديل قلبهم بطير. خلوه قون واحد. لو قلت هاتريك ..ناس المريخ ديل ما فيهم زول بيثبت. ولا تقولوا مازيمبي غالب خمسة. اصلو الكلام دا ما يطلع من العمود دا. لو جمال الوالي سمع بالنتيجة دي ..تاني يوم بقدم استقالتو. لو ما استقال – بعمل ليكم فيها (زعلان). اصلو ما تجيبوا سيرة للخمسة. ولا كلمة. الناس ديل فيهم العندو الضغط. وفيهم العندو السكري. وفيهم العندو (شكاوي). وفيهم القلبو كعب. بالله مزمل ابوالقاسم ظهر ليك في قناة النيل الازرق بي (شكاويه) ..زي العرضحالي القاعد قدام المحكمة. جرسة مبالغ فيها. مزمل يسألوه من شكوى المريخ في الامل ..يقول شكوى (صحيحة)..سكرتير القضارف قال عمر عثمان ضرب الحكم بونية. يسألوه من شكوى المريخ في هلال كادوقلي ..يقول شكوى صحيحة …سكرتير مريخ الرنك قال اللاعب لاعبهم واوراقهم عندو. سكرتير مريخ الرنك دا قاعد سنة ونص ما عارف لاعبهم دا بيلعب في هلال كادوقلي. سكرتير مريخ الرنك دا زي الفريق طارق وإلّا شنو؟..ما قاعد يتابع تمارين فريقو. قولوا لي سكرتير مريخ الرنك زي ما بقول مزمل ابوالقاسم (قالوا ليه)..قولوا ليه (طونق) دا بلعب في هلال كادوقلي ليه سنة ونص. ومزمل ابوالقاسم بسألوه من شكوى الامل ضد بكري المدينة..مزمل ابوالقاسم بندلق ليك كدا ويقول ليك الشكوى ما صحيحة. اشمعنا دي البقت ما صحيحة ..وشكاوي المريخ كلها صحيحة. علما ان شكوى الامل في بكري المدينة هي الشكوى الوحيدة التى يوجد فيها نص محدد – وفيها مستندات. لكن مزمل اي شيء للمريخ (صحيحة). واي شيء ضد المريخ غير (صحيحة). القانون والمستندات في ستين داهية. زولكم بحدد الاشياء وقانونيتها من موقع المريخ وموقفه بس. عارف اي حاجة. هو البيشتكي ..وهو البحدد الشكوي ..وصحتها ..وقانونيتها. انتوا طيب جمال الوالي وين؟. الوالي دا بقى بدفع بس. لكن دا كلو ما بحلكم يا مزمل من مازيمبي ..ولا بمقركم منو. مازيمبي غالب خمسة. لكن نسبة للرجفة حقتكم وقلبوكم الكعبة وشكاويكم الكتيرة دي …قولوا ليهم زي (مريخاب الرنك) – قولوا ليهم مازيمبي غالب واحد بس. قولوا ليهم تعادل. اصلو ما تجيبوا ليهم سيرة الخمسة. غايتو مباراة مازيمبي دا (حكم) واحد ما بمقركم. ولا اتنين. ولا تلاتة. ولا اربعة. عاوزين ليكم (لجنة حكام) كاملة..وفيصل سيحة من يوم الاتنين يطلع يقول ضربة جزاء المريخ الاولى صحيحة. ما ينتظر الجمعة. والتانية صحيحة. والتالتة صحيحة. مازيمبي دا عاوز ليه تلاتة ضربات جزاء على الاقل غير حالات الطرد. الحمدلله نحن مازيمبي بي طيارتو الخاصة ضربناه واحد من الدقيقة السابعة. لا ضربة جزاء. ولا منظمة الحكام الخيرية لضربات الجزاء وحالات الطرد. غلب عديل كدا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). انسوا موضوع الخمسة دا. امرقوا من (العكننة) دي. لسه عندكم عشرة يوم ..اتفاصحوا فيها زي ما عاوزين. اكلوا ضحيتكم. وعيدوا مع شفعكم. واتكلموا في شكاويكم. لكن بعد العيد …راجياكم صدمات عاطفية تقيلة. من هسع بنقول ليكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). تعالوا شوفوا الفرح الجد – جد. شوفوا ناس الشغيل. مكسيم وكاريكا والصادق المهدي. الصادق المهدي اصلو ما قصر. تعالوا شوفوا الفرح الحلال. والصعود الذي كان بعرق الجباه. فجأة كدا. الجو براهو اتصلح. بكتب قبل (جو بكرة) وهو جو هذا اليوم يعني – لكن الشيء الاكيد ان (الجو) الليلة بديع. بستبق الجو. صلحت (الجو) يا الشغيل …خليت (الابتسامات) تتوزع في (الخشوم) متل (ادراج الفصل). ونحن (سمرتنا) دي يغلب عليها (الصرة). في شوية (تكشيرة) غير ارادية كدا. شيل (التكشيرة) …وخت (الابتسامة). خلوها تتوهط في وجوه اضناها التعب – واقفة للمواصلات ..وشايلة (جركانة) تفتش في الموية. افتحوا شبابيك الفصول…طلعوا (الطلبة) – اعلموا ليهم (طابور) نص اليوم. حدثوهم عن (الشغيل). جاء من وين ما عارف؟. الوقفو شنو ما عارف؟. المهم في الساعة ديك ..الدقيقة (73) من عمر المباراة – ظهر الشغيل زي (ابوزيد الهلالي) في المساحة المظللة وضع كورتو في القون – وفات على كدا. بي كل بساطة. زي كأنو بربط ليه في (كرفتة). بياكل ليه في رز بي لبن. بالمناسبة مازيمبي غالب خمسة!!…(اقصد واحد) عشان ما تنسوا. تعادل!!. احسن الواحد يذكركم. العاوز حق اللجوء للهلال – نحن ما عندنا مانع ..نحن تخصص (مازيمبي). اتعادلنا معاه في الملعب الذي هزم فيه المغرب التطواني 5 / صفر. وغلبناه هنا في ام درمان 1 / صفر من الدقيقة السابعة من عمر المباراة. حكمة الله …الهلال في عهد الكوكي بقى ممكن يسجل من الدقيقة السابعة وما يقدر خصمو يعادل النتيجة. وممكن برضو يعدل النتيجة بعد ان يكون متأخر. دا شغل (تكتيكي) عال. الشغل دا شغل بتاع علم. شغل (مدرسة). لا حكام – ولا حاجات تانية. الحاجات التانية دي ما عاوز اقولها ليكم ..اعرفوها براكم. قبل مباراة عزام ..جابوا ليك ناس بكري المدينة يضربوا في (الباكمبا). هسع ما عارف بضربوا في شنو؟. يكون خلوا (الباكمبا) وقبلوا على (الباسطة). لكن الشغل دا شغل باسطة؟. بسأل بس. باسطة ومعاها مساعدة حكام. وحكمة الله …المريخ دا وقت لعب امام وفاق سطيف ناس مجدي شمس الدين جابوا للمباراة حكم (غاني). لامبيتي. لامبيتي طلع قريب كوفي. وود خالة (اكرا). نسيتوا مامون ابوشيبة قال شنو؟..قال اكرا وكوفي لازم يلعبوا في المباراة عشان بعرفوا (لامبيتي). والبساط احمدي بيناتهم. والاتفاق (حلال) هنا ما فيه اي شيء. حكمة الله امام الاتحاد ..مجدي شمس الدين جاب ليهم حكم مصري. عارفين جهاد ابوجريشة قريب منو؟. قريب ايمن سعيد. يعني ح يكون قريب بكري المدينة؟. الحاجات دي ما ممكن تكون كلها كدا (صدفة). في مباراة المريخ ووفاق سطيف ..الحكم (الغاني) منح المريخ ضربتين جزاء. وطرد ليه لاعب من وفاق سطيف. وفي مباراة المريخ والاتحاد الحكم (المصري) صرف ليه ضربة جزاء اوضح من (صينية القندول). الموضوع ما كان بيستاهل. لكن قطع شك ..لو كان الموضوع بيتساهل ..كان الحكم طرد ليه لاعب من الاتحاد واحتسب ليه ضربتين جزاء للمريخ. الاتحاد ما حوج المريخ للحاجات دي ..عشان تمانية لاعبين من الاتحاد ما شاركوا في المباراة. قالو ليك الاتحاد كمل تشكيلتو في المباراة بي (صبارة) الموية. وصلوا الخرطوم (14) لاعب فيهم تلاتة حراس مرمي. بالمناسبة الفارق بين الهلال والمريخ في الممتاز (6) نقاط. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. و السيدة (ل)…تتخيلي (الجو) البديع دا عندو علاقة بي هدف الشغيل. شارع النيل كيف؟. وقرَض على كدا.
