دق الدلجة محمد عبد الماجد معتز عبدالباسط طلع (لامبيتي) إلّا ربع اذا كان اعلام المريخ شايف الغاني (لامبيتي) حكم (عادل وشجاع) ..وفيصل سيحة بطلع يوم الجمعة (نص النهار) عشان يقول لينا الكلام دا ..بنقول ليهم (معتز عبدالباسط) حكم مباراة الامس بين المريخ والخرطوم برضو حكم (عادل وشجاع). شجاع اوي. واذا شايفين (لامبيتي) عادل ..بنقول ليكم معتز عبدالباسط دا الخالق الناطق (لامبيتي). زي لامبيتي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ما تزعلوا – انتوا قلتوا (لامبيتي) عادل وشجاع…ونحن قلنا ليكم معتز عبدالباسط (لامبيتي) اخر. لامبيتي تو. يبقى ما مختلفين. اي حكم شجاع..ح نسميها (لامبيتي). اصلو (الشجاعة) الايامات دي اتغيرت. بقت شجاعة في الواتس والفيس. بعدين البلد دي كلها (لامبيتيات). اللجنة المنظمة. لجنة الاستئنافات. لجنة الحكام. كلهم (لامبيتيات). المحلية. شئون الاراضي. كلهم – كلهم….لامبيتيات. الجزار العندنا في الحلة طلع (لامبيتي)…بعمل اللحمة كلها (عضام). سيد اللبن ..اللبن بيجيبو لينا كلو (موية)…لامبيتي. وناس الارصاد بقولوا في مطرة وما قاعد تجي. الارصاد لامبيتي. دا اسامة عطا المنان ذاتو طلع (لامبيتي). سيحة..قال حكم (شجاع). لامبيتي. شفيق يا راجل!!. ورضا مصطفى الشيخ ما فاضل ليه إلّا يغني لي (لامبيتي) هزيّت البلد من اليمين للشام. عاوزين يطلعوا لينا (لامبيتي) بطل من ابطال المهدية. ممكن – جمعة تانية ممكن يعملوها. يعني الواحد لو دقس – او شالتو (نومة) ساكت ..ممكن يلقى ليك (لامبيتي) دا في مقرر التاريخ. ممكن يجيبوه ليك مع ناس (المك نمر). ناس سيحة ديل بخصصوا ليهم (حلقة) كاملة ..عشان يثبتوا ان الحكم (شجاع). وسيحة يختار من (90) دقيقة اللقطات التى يريد ان يدافع عنها…بختار براهو كدا. اللقطة التى اوقف فيها (لامبيتي) هجمة وفاق سطيف والمهاجم متجه نحو مرمي المريخ ..سيحة ما جابها. اللقطة دي مشت وين؟ اذا كان في عدل حقيقي وفي انصاف تجيب كل (الاشكاليات) ما تختار حاجات عشان تدافع فيه عن الحكم يا سيحة. الوطينة ما (تلفيق). وادعاء ساكت. ووصف الحكم بالشجاعة…ما كدا يا سيحة. وين اللقطة دي ؟..مشت وين؟..عاوزين نعرف بس. رضا مصطفى الشيخ ما اشتغل بالموضوع. رضا مركز في (المسابقة). يكون (الجهاز) اتعطل!!. والزمن انتهى. لكن بنرجع ليها الجمعة القادمة. كملتوا (الجمع) في (كلام فاضي) ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). معتز عبدالباسط امس من (الاستعجال) العليه من الدقيقة التامنة حسم ليك الموضوع. ما عاوز اي مجازفات. ناس الخرطوم الوطني ديل احسن يحسمهم من بدري. الجمهور ذاتو ضايق ..وممكن يعكر صفو المباراة ويشكل ضغط على اللاعبين. عشان كدا احسن معتز عبدالباسط من الدقيقة التامنة حسب ليه (ضربة جزاء). الظروف ما معروفة. اول مرة اشوف لي ضربة جزاء من الدقيقة التامنة. معتز عبدالباسط وقت حسم المباراة واحتسب ليه ضربة جزاء وهمية وقت ضربة الجزاء الحقيقية حصلت ما احتسبها. زولكم احتسبها (بدري) شوية. مستعجل. ما بقدر يصبر للوقت داك. احسن يعملها (تقديم). ناس الخرطوم الوطني ديل ما مضمونين. والدنيا خريف. يمكن تجي مطرة. عشان كدا (التعجيل) بالضربة احسن. بعدين المريخ عندو مباراة خارجية. عندو مباراة مهمة ..واحتساب ضربة جزاء له في هذا التوقيت يصب في مصلحة الوطن. دا عمل (وطني) عديل كدا ..حسب فهم اعلام المريخ. ضربة جزاء تساعد على عودة الروح وتعمل على استقرار المريخ. ما فيها حاجة. يعني شنو لو معتز عبدالباسط احتسب ليه ضربة جزاء. لامبيتي عملن اتنين. وحالة طرد. ضربة جزاء واحدة ولا حاجة. الملاحظ ان المريخ في كل المباريات الكبيرة في الدوري الممتاز اذا لم تحتسب له ضربة جزاء خرج خاسرا. في عطبرة مافي ضربة جزاء ..طلعوا مغلوبين اتنين. في النقعة ولا ضربة ..صاموا عن التهديف. في شندي خسروا 0 / 1 عشان الحكم ما احتسب ليهم ضربة جزاء. امام الخرطوم الوطني في الدورة الاولى طلعوا تعادل – عشان معتز عبدالباسط ما في. امس لولا افتتاحية معتز عبدالباسط ..كان المريخ اتهزم عديل كدا..تعادل ما كان بحلموا بيه. لكن معتز عبدالباسط حسم الموضوع من الدقيقة الثامنة. مريخ الفاشر كان قد انتصر على المريخ في ملعبه رغم ان الحكم احتسب ضربة جزاء للمريخ اضاعها بكري المدينة. وطرد لاعب من مريخ الفاشر. وطلعوا (الشرطة). مع ذلك المريخ طلع خسران 0 / 1. كل مباريات المريخ (الرابط) فيها ضربات الجزاء. احسبوا ضربات الجزاء للمريخ في هذا الموسم سوف تجدوها رقم قياسي. في البطولة الافريقية وحدها احتسبت للمريخ خمس ضربات جزاء. في الممتاز اسكت عد..ضربات جزاء لا حصر لها ولا عدد. عدوا المباريات التى لم يحتسب فيها للمريخ (ضربات جزاء) سوف تجدوها قليلة جدا. حاجة ما بتذكر. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). مجلس الهلال يجب ان يتحرك في هذا الموضوع ..هذه الضربات التى تحسب للمريخ ويحللها (فيصل سيحة) يوم الجمعة يمكن ان تجعل لقب الهلال يفلت للمريخ. مجلس الهلال يفترض ان يوقف هذا (العبث)..وتلك الهدايا التى تظهر في شكل (ضربات جزاء). اذا استمر معدل ضربات الجزاء بهذه الصورة ..سوف يقوم الحكم من اول عشر دقائق في مباراة القمة القادمة بمنح المريخ (ضربة جزاء) ويمكن اتنين على الطريقة (اللامبيتية) الشهيرة. يجب ان يكون لمجلس الهلال موقف ..الدوري الممتاز بهذه الصورة اصبح لا يشرف. رئيس نادي الامل قال ان المنافسة فقدت (عدالتها)..لا يشرف الهلال ان يلعب في منافسة على ذلك النحو. لجنة الاستنئافات اعلى جهة في الاتحاد العام غير قادرة على تنفيذ قراراتها ..واتحاد بصدر قرار الليلة وبلغيه بصورة غير شرعية في اليوم التاني. وضربات جزاء زي (سمسم القضارف) لا حصر لها ولا عدد يتمتع بها فريق واحد في الممتاز. كيف يحقق الهلال بطولة في هذه الاجواء ..وفي الكم الكبير من (ضربات الجزاء) التى تمنح للمريخ. فريق يحدد اسماء الحكام الذين يديرون له مبارياته من الطبيعي ان يجد كل هذا الدعم من (ضربات الجزاء). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……………. و يجب الانتباه ..المباريات الاعدادية للهلال لا نريد ان تفقدنا لاعب قبل مباراة مازيمبي. وكشف الهلال اصلا فيه اصابات عديدة. الحذر واجب. مثل تلك المباريات الاعدادية دائما ما يحدث فيها اصابات. محمد عبدالرحمن ابعدوه من اجل سلامته من مباراة مازيمبي. سلامة اللاعب اهم من الانتصار. في الكنبة ما يقعد. عاوزين محمد عبدالرحمن بعد (المجموعات). عاوزنو لي قدام. ناس صلاح الجزولي قادرين يحسموا مازيمبي. بقوموا بالواجب واكتر. املأوا الشوارع بالهلال. مباراة الهلال امام مازيمبي يوم الاحد زينوا ليها الشوارع من الآن. ……….. السيدة (ل) الظاهر عليك قصدتي (شيلسي). وقرّض على كدا.