بالعربى الكسيح محمد الطيب الأمين إستخسرو على القانون (السكين) فقتلوه ب(حديده قديمه) !!
* كل إنسان فينا (ينوم ضميره) احيانا .. * ولكن (مُنبه الاخلاق) يُصحى (الضمائر) بعد ايام قليله من نومها .. * وحينما يتعطل (منبه الاخلاق) فأن (تكفين الضمير ودفنه) واجب وواجب جدا .. * والضمير في الوسط الرياضى مات لان بعض الاخلاق اصابها (سرطان) ونسأل الله السلامه .. * ولا شئ بلغ بهذا الوطن هذه الدرجة سوى (سوء الخلق والانانيه والظلم) .. * والفساد هو كلمة تختصر كل معانى (عدم الاخلاق) .. * وحتى وقت قريب كان ما يميز الوسط الرياضى هو (الاخلاق الرياضيه) .. * واليوم الوسط الرياضى فيهو كل شئ ما عدا (الاخلاق الرياضيه) .. * الاخلاق الموجوده في الوسط الرياضى هى اخلاق (سياسيه) وليس رياضيه وهذا مع الاسف كله .. * بدلا من ان ننقل (الاخلاق الرياضه) للوسط السياسي إستقبلنا (الاخلاق السياسية) في الوسط الرياضي .. * وبقى وسطنا الرياضى هو وسط سياسي انتشر فيه الفساد وقانون (القوى البيأكل الضعيف) .. * مساء أمس اصدرت لجنة الاستئنافات قرارها المعيب القاضى بسحب نقاط هلال كادوقلى ومنحها ل(مريخ الحكومه) وإعاة مباراة الامل عطبره التى كان قد فاز فيها على (مريخ الحكومه) بهدفين حلال حملا توقيع (رزاق الشعب) .. * وقد ظلننا حتى وقت متأخر من ليلة أمس نتقصى ونستبين (حقيقة هذا القرار) الذى توقعنا ان يكون اشاعه حتى ثبت لنا العكس .. * اجتمعت اللجنة بعد (48) ساعة من استلامها استئناف المريخ ومن اول اجتماع فكرت وقررت واصدرت .. * علما بان هذا اللجنة ظلت تستهلك شهور طويله في اى طلب مقدم لها .. * اللجنه إستعجلت في قرارها لان مريخ الحكومه ما ممكن ينتظر اكتر من كده .. * والقرار بعيدا عن العيوب الكثيره التى حواها ومنها معاقبه لاعب الامل بأثر رجعى مما يفتح الباب امام كل الانديه التى لعبت امام الامل بالتظلم وكسب النقاط .. * اى نادى يستطيع الان سحب النقاط من الامل لان القانون تطبق بأثر رجعى فيما يتعلق بمعاقبه اللاعب .. * بعيدا عن هذا الجدل القانوني نقول ان القصه واضحه .. * ودى لعبه كبيره وصفقه اكبر من كبيره ولكن خانها الذكاء .. * يا جماعة حتى لو انت بقيت ظالم يفترض يتوفر عندك الذكاء بحده الادنى على اقل تقدير .. * انت اظلمني لكن بذكاء شويه يعنى اجتهد وشغل عقلك في الظلم .. * لكن ما تظلمني بغباء لانو كده بتحسسني انو انا برضو غبي شديد .. * ما يبقو علينا ظلم وغباء .. * والهلال ك(نادى) وك(شعب) هو اذكى من هؤلاء الاغبياء الذين تحولو ما بين يوم وليله ل(سمكرجيه وترزيه) يفصلون القانون حسب مقاس جمال الوالى .. * اولا : عندما تقدم المريخ بشكوى ضد الامل وضد هلال كادوقلى كل الناس توقعت ان يمنح الاتحاد العام النقاط للمريخ .. * توقعنا كده بحكم (مريخية الاتحاد) وبحكم شخصية معتصم جعفر الضعيفة جدا .. * الكان طبيعي إنو الاتحاد يمنح المريخ النقاط ال(6) او على اقل تقدير يمنحهم نقاط مباراة واحدة .. * كان متوقعا بحكم لونيه الاتحاد وميوله الاحمر وسيطرة الوالى عليه .. * ولكن الاتحاد فعل ما هو غير متوقع و(رفض الشكوتين) .. * وهذا الرفض كان (فوق رأي) .. * يعنى إحنا ك(اتحاد) ح نرفض وإنتو امشو اللجنة واللجنة تمنحكم النقاط .. * وبهذا السناريو يكون (وش الاتحاد ابيض) امام الهلال .. * لانو الاتحاد رفض شكوى الهلال في بكري وهو متهم بحب المريخ ومجاملته ولو المريخ كسب الشكوتين ببقى منظر الاتحاد جيعان .. * اللجنه قبل اسبوع قررت اعادة مباراة الامل والمريخ في الدورة الاولى والقرار كان صادم لناس المريخ .. * يبقى اللجنه بتجى تعمل الموازنه في الشكوتين عشان ترضى المريخ الزعلان من قرار اعادة مباراة الدورة الاولى .. * والله صحى .. * وقرار اللجنه امبارح عمل توازن (بعد لفه طويله) وانظر الان ستجد المريخ لم يتضرر من اى شي وكأنه لم يخسر .. * واى متابع للوسط الرياضى سيذهب بتفكيره إلا ان الاتحاد رفض الشكوتين وإتفق مع اللجنه بعد اتفاق اللجنه والاتحاد مع الطرف الاول جمال الوالى الشهير ب(عزو) .. * والكلام ده كلو عشان يتبلع (طلعت شوية مظاهرات) قادها (16) نفر حملو لافتات مكتوب عليها داعش وبورسعيد وكلامك فراغ كده .. * دى القصه كلها وما دياره ليها درس عصر .. * المصالح تتصالح ويتضرر القانون والاخلاق .. * وإحنا على بالقسم عارفين اى حاجة .. * وعارفين كمان (الطيارة البتمشى الحج سنويا البيدفع قروشها منو والبيكمل اجراءات الحج منو) .. * عااااااارفين والله .. * في السودان ليس هنالك إتحاد يدير الكره بل هم (تجار) يستغلون الاتحاد لادارة امور خاصة وبعيده كل البعد من مصلحه البلد .. * تجاره وشغل اموال يجمع ما بين قادة المريخ وقادة الاتحاد لدرجه جعلتنا نفشل في معرفة من هو رئيس الاتحاد ومن هو رئيس المريخ .. * ويشهد الله ما اصابني احباط وحزن بقدر ما اصابني امس بعد سماع هذا القرار .. * والاحباط ليس سببه الهلال او المريخ او الامل .. * ابدا والله .. * القصة اكبر من كده .. * احباط بسبب ما وصلنا إليه .. * ما يحدث عندنا لا يمكن ان يحدث في اى بلد اخر .. * الكلام ده ما ممكن يحصل في مصر لانو مصر ما فيها جمال الوالى .. * ولا بيحصل في تونس لانو تونس ما فيها جمال الوالى .. * ولا بيحصل في الجزائر لانو الجزائر ما فيها عزو .. * لكن بيحصل هنا لانو هنا في جمال الوالى .. * وجمال الوالى بلغ مرحله صعبه جدا ، مرحله يعجز المنطق من تفسيرها ويفشل العقل في استيعابها .. * وجمهور الهلال ما غالبو يطرح (مبنى الاتحاد) مع الارض ولكن هذه ليس اخلاقنا .. * لا بنطلع مظاهرات ولا بنحمل لافته .. * لانو اللافتات شغل بتاع ناس خوافين اصلا .. * اللافته ما بتغير ليها (اخلاق متعفنه) .. * اول قرار يجب ان يتخذه مجلس الهلال هو تسليم فريق الكره للكوتش احمد ادم عافيه .. * عافيه يبقى (رئيس فريق الكره) ويعزل الفريق من هذا الذى حدث على ان يتفرغ مجلس الادارة لمجابهة هذا الظلم الذى وقع على البلد وليس على الرياضه .. * نعلن وقوفنا مع الامل عطبرة ونتفق معه في كل خطوه يخطوها .. * ليس الامل وحده هنالك انديه اخرى متضرره من قرار اللجنه مثل الخرطوم الوطنى واهلى شندي وغيرهما .. * الهلال لو إنسحب وحده سينهار الموسم دون شك .. * والهلال مناط به احداث التغيير وضبط الساحة واعادة هيبه القانون .. * الهلال تاريخيا دوره يشبه دور (القوات المسلحه) هو الذى يحمى وهو الذى يفرض الهيبه .. * يبقى التفكير في الانسحاب حاليا امر غير جيد .. * نفكر في اسلحه اخرى نعيد بها القانون ونضع بها جمال الوالى في مكانه الطبيعى .. * مجلس الهلال يجب ان ينتظر ما تحمله الايام القادمه .. * ننتظر نشوف اللجنه دى بتبلع قرارها ولا جمال الوالى اكبر من القانون .. * لو ثبت في الموضوع ده بالذات إنو جمال الوالى اكبر من القانون بعد داك ممكن الهلال ينسحب عشان نشوف ممتاز بدون هلال كيف ؟ * الهلال على بعد خطوات من كتابه تاريخ جديد ولن نقبل التهاون او الانصراف عن هذا الهدف .. * الفرصه امام الهلال كبيره لتحقيق اللقب وما قامت به اللجنه هو جزء من اغتيالات معنويه يقصدها جمال الوالى من اجل تكسير الهلال ولكن ما يفعله مردود له ولو بعد حين .. * في رأي انا مجلس الهلال يجب ان يتعامل مع هذه المستجدات بذكاء وبعيد عن التهور والعنتريه .. * لو على الممتاز الهلال لو دخل بفرصة واحده بشيل الكأس .. * لكن همنا كلو في البطولة الافريقيه .. * والناس تعلم ان الهلال بلغ هذه المرحلة من البطولة بقوة لا تتجاوز ال(60%) .. * يبقى الهلال محتاج لجو ومناخ عشان يكمل النقص الموجود .. * واحسب انه نقص طبيعى لفريق قام بتغيير جلده بعد سنوات طويله .. * والسنة دى اصلا إحنا ما دايرين (كورة حلوة) من الهلال دايرين نتائج ونقاط .. * الاهم نبعد الفريق من الصراع والعراك .. * نجمد كل شي وبعد مباراة الذهاب امام الاتحاد الامور بتكون واضحه امام الهلال .. * نشوف نهايتنا مع الابطال وبعد ذلك لكل مقام مقال .. * بعد نحدد مصيرنا في الابطال ممكن نعمل اى حاجة عشان الناس تعرف البلد دى فيها هلال .. * البلد دى لو ما فيها قانون رياضي على بالقسم فيها هلال .. * والهلال قوة ضاربه .. * وبعد نشوف مصيرنا في الابطال بنخرب ليكم الموسم ونقعد .. * والله نخربو ليكم ونخلى اللجنه في حتة والاتحاد في حته وجمال في حته .. * غدا نواصل كيف استخسرو على القانون السكين وقتلوه ب(حديده) قديمه !!
