بالعربى الكسيح محمد الطيب الأمين المطار (شمت) ريحتكم !! * من الحكمه ان تعرف (قدر نفسك) .. * والذى لا يعرف قدر نفسه في الغالب سيظل (ناقصا) و(منقوصا) ليوم الدين .. * عشان كده جمال الوالى قال : (العارف عزو مستريح) .. * لازم تكون عارف عزك وعارف قدر نفسك .. * في ناس في حياتنا هم في (مكان ما مكانهم) .. * ناس (خمسه نجوم) ولكنهم لا يعرفون قدر انفسهم فتجدهم يتعاملون على اساس انهم (3) نجوم .. * وفي ناس (3) نجوم لكن فاكنها في انفسهم ورابطين مكنة الناس ال(5) نجوم .. * وفي الحالتين .. انت لو ما عارف قدر نفسك مشكله .. * ومريخ الوالى (إنبرش) في لوممباشي لانه لا يعرف قدر نفسه ولا حجم إمكانياته ولا يعرف (مكانه الطبيعى) و(مصيره الحتمى) .. * الناس ديل ما عارفين إنهم (حناطير) .. * والله صحى .. *ولو كانو عارفين انهم حناطير ما كان إنبرشو (إنبراشت العصر دى) .. * إحتمال يكونو عارفين إنهم حناطير وعاملين فيها ما عارفين .. * المهم .. * لبس المريخ ثوب اكبر منه فتعثر ووقع (وقعه شينه) امام الكبير مازيمبي (نهارا جهارا) .. * شي طبيعى لما تلبس (جلابيه) اكبر منك بتعتر ليك وتقع .. * هسه إتخيل وليد علاء الدين يلبس جلابيه (حسين خوجلى) ؟؟ * إتخيل بس ؟؟ * النتيجه ح تكون شنو ؟؟ * اكيد وليد ح يقع لانو الجلابيه بتعتر ليهو .. * أمبارح حنطور العرضه كان لابس جلابيه أكبر منو .. * لبسو (جلابيه الهلال) .. * لكن ساماتا ما قصر .. * ساماتا بعرف جلابيه الهلال وبيعرف جلابيه ضل الهلال .. * المريخ الذى بلغ هذا الدور (كده وكده) إفتكر إنو ممكن يكون بطل .. * إتوهم .. * والله صحى .. * والوهم مشكله كبيره .. * في شبه بين (الوهم) و(الوحم) .. * المرا اثناء الحمل ممكن (تتوحم) بطين بحر وممكن تقول مشتهيه (لحم ديك ابيض) وممكن تقول عايزه (شربوت في عيد المولد) .. * نفس الشي ، ناس المريخ كانو في حالة (وهم) و(وحم) .. * تلقاهم (يتوحمو) بريحه المطار .. * هسه عليك الله ده ما وحم ؟؟ * زول يتوحم بريحه المطار .. * يقول ليك : (شامى لي ريحة مطار) .. * والله المطار هى الشامه ريحتكم ما انتو شامين ريحتها .. * إنتو قلتو (مطار ولا امطار) ؟؟ * ريحة المطار مع ساماتا ده بقت ليكم (مينا بري) .. * بيكون الجماعة ديل شامين ريحه مطار دنقلا حيث (كاس السودان) المقرر قيامه هناك .. * الحمد لله العبد لله قبل شهر كتب هنا قائلا : (السنه دى يا متنا من الضحك يا كمان الضحك كتلنا) .. * وأهو في النهايه الضحك كتلنا لكن ما متنا .. * بالمناسبه .. أنا عارف إنو الهلال طار وعارف إنو الكاردينال شال السيخ وعارف وعارف وعارف .. * لكن مع ذلك بكتب عن الهلال براحتي .. * ما مستعجل والدنيا ما طايره .. * بعد عشره ايام ، بعد خمسطاشر يوم ح اجى اكتب عن الهلال .. * اصلو ما مستعجل .. * عشان ما يجى واحد من قبيله الحناطير يقول لي انت بتتفاصح والهلال طار .. * بركه الطار .. * الهلال لما سافر الجزائر لا ساق معاهو (بودى قاردات) ولا ساق (طباخ) ولا ساق (هناي) .. * عليك الله شوف الفرق .. مازيمبي لما جا يلعب مع المريخ هنا جابو معاهم (عازفين) والحنطور لما مشى يلعب مع مازيمبي هناك ساق معاهو (بودى قاردات) .. * فرق عجيب .. * ان شاء الله بس (البودى قاردات) ديل يكونو جابو ليكم قون ؟؟ * قلت ليكم الناس ديل عندهم وهم عجيب .. * ساقو البودى قاردات والطباخ ونسو (الخاتم) بتاع غارزيتو اللقاهو مدفون في الفاشر .. * غايتو جنس غايتو .. * دنيا عجيبه والله .. * أمبارح القريبه دى كانو بيقول الهلال (بااااااع) في مصر والليله البعض منهم بيقول غارزيتو (باااااع) في الكنغو .. * ليه كده ؟؟ * الصفوه ما بقولو على مدربهم كده .. * الكلام ده عيب والله .. * أنا حزين بسبب الكلام ده .. * الناس ديل حتى في الخساره هم (مواهيم) .. * كاتومبى ما ممكن يشترى غارزيتو لانو (مريخ سيكافا) اصلا دخل المرحله دى (صحبه راكب) .. * دخل المرحله دى (كده وكده) .. * فريق هوا ساكت .. * فريق ممحوق .. * واتحداكم ليوم الدين لو مرت بيكم ظروف زي ظروف الهلال حاليا لو تقدرو تتجاوزو التمهيدي ؟؟ * تحدي عدييييييل ، الهلال تعباااااااااان ووصل المربع (رجاااااله كده) وإنتو وصلتو المرحله دى (سلفقه ساكت) .. * واقول ليكم حاجة .. * ربنا ده بالجد كريم والله .. * وكريم شديد كمان .. * لو ما ربنا كشف (البلايلي) كان بطل افريقيا ممكن يكون (منشط) .. * وهسه ارجعو لشريط المباريات بعد حادثه البلايلي .. * ارجعو للشريط بتلقو مستويات بعض الفرق (هبطت) بعد حادثه بلايلي .. * وانا ما بفسر وانت ما تقصر .. * ربنا كريم وكل الكان بيحصل ظهر وكل قرد طلع شجرتو .. * لا ريحه مطار ولا ريحه (لحمه مُحمره) .. * طرتو من هناك وهنا الفرق بينا وبينكم سته نقاط .. * طيران المريخ ده زكرني (عشوشه زوجة ود الدخيري) .. * زكرني ليها .. * واى زول طبعا حر في (تذكاراتو) .. * عشوشه دى (بت من القريه) وزوجها اسمو ود الدخيري .. * ود الدخيري رحل من القريه واشترى بيت في الحدود الفاصله ما بين القريه والمدينه .. * وود الخيري سافر (مأموريه) وخلى زوجته عشوشه في البيت .. * عشوشه بقت لما تطلع من البيت وتعاين على (إتجاه القريه) بتشوف بنات القريه (سايقات الغنم وشايلات القش) .. * وعشوشه لما تعاين على (إتجاه المدينه) بتشوف بنات المدينه (بيلحسن في الاسكريم) وشايلات (الفشار والجلاكسى) .. * ودى طبعا مشكلة الزول البيكون ساكن في الحدود ما بين (القريه والمدينه) .. * المهم .. ود الدخيري لما رجع من المأوريه شاف عشوشه عامله كده كيف كيف .. * عامله زي بكري المدينه امبارح .. * كيف كيف كده .. * قام ود الخيري كورك بصوت عالى وقال : (سبحان الله عشوشه إتجوبكت لا بقت بت القرى البتحلب الغنم ولا بقت بت المدن البتوسى المحشى) .. * هسه المريخ بقى زي عشوشه دى .. * لا شال الابطال ولا اتصدر الممتاز .. * يعنى إتجوبك ساكت .. * والله صحى .. * قلنا ليكم لو ركزتو مع (الغريق بتلقو المطفح فات) .. * وما سمعتو كلامنا .. * يلا اشربو وان شاء الله ما ترتو ليوم الدين .. * وتانى كده نشوف لينا حنطور يطاول على الهلال .. * غارزيتو طبعا ظريف .. * قال ليهم جيبو لي حمد كمال مساعد مدرب .. * والله دى يا غرزته بالغت فيها .. * حمد كمال عديل كده ؟؟ * بدل يجيبو ليك حمد كمال تعال شيل كندوره واللمين البرير برضو .. * قال جيبو لي حمد كمال قال ؟؟ * حمد كمال ب(الخاء) .. * جيبو لي حمد كمال يا كبير ؟؟ ما بتخجل ؟؟ * وعلى فكره جمال الوالى عادى ممكن يسمع كلام غارزيتو ويجيب حمد كمال .. * والله صحى .. * ده جاب ريتشارد واكرم والباشا والبلدوز وطمبل وريكاردو وكلتشى وتراوروى ومعز وهيثم وعمر بخيت وعبده جابر وبكرى المدينه وخالد امبده مترجم ريكاردو وفييرا وكمان جاب غارزيتو وانطونيو .. * جاب ديل كلهم ، عشان كده انا ما بستغرب لو عزو جاب حمد كمال .. * ديل ما عندهم كرامه .. * ولا عندهم شخصية .. * حناطير ساكت .. * دايرين يتمو النقص بتاعهم بالهلال .. * لكن قسما وعظما ما بتبقو هلال لو نططو .. * فريقكم ده ممحوق ، والهلال فريق فيهو بركه .. * عشان كده الحنطور لما كان مارى بظروف نفس ظروف الهلال الحاليه كان بيطير من التهيدى زيو وزى اى قطن تشادى .. * وهسه الهلال بلغ المرحله دى لانو هو فريق الشعب الما ممحوق .. * وعشان اقطع ليكم الشك بالقين .. لو سجلتو ساماتا وكالابا وكدبايا وكاسسولا وشكابالا وعمورى وجيان ودروغبا برضو ما بتجيبو كاس .. * لانو فريقكم ممحوق .. * ومن هسه بقولها ليكم السنة الجايه بطيرو من دور ال32) .. * والله صحى .. * عشان كده بدل تخسرو قروشكم في التسجيلات ساكت خلو ناس عمر بخيت ديل قاعدين .. * عمر بخيت بقى يدخل الملعب طوالى المريخ بيستقبل هدف .. * قال ليك جمال سالم بقى لما يشوف عمر بخيت بيسخن بيشيل هم .. * لكن برضو ما تشطبو .. * الزول ده افضل ارتكاز وبنفعكم لقدام .. * بس جيبو ليهو حد كمال .. * غارزيتو قال محسن سيد ما بعرف يرصد العلامات ؟؟ * يعنى مشكلة المريخ كلها بقت في محسن سيد الما بعرف يرصد العلامات ؟؟ * الموضوع ده بنشوفو بكره ان شاء الله .. * وبرجع وبقول ليكم تااااااانى الهلال طار وانا ما بكتب عن طيران الهلال إلا بعد عشره ايام لانو العشره ايام الجايه دى لو الله ادانا عمر ما عندنا شغله غير (طيران الحنطور) .. * وكل البيتطاول على الهلال سيكفل ساماتا بالرد عليه .. * و..و.. * وتعالو شوفو الكنت راجيهو …(كاتومبي كتمه فيهو) ..
