دق الدلجة محمد عبد الماجد بعد (حمد كمال) غارزيتو شكلو كدا ح يقول ليكم جيبوا لي عم (شبشه) المريخ شغال الآن بفضل اولادنا – بكري المدينة – وعلاءالدين يوسف – وامير كمال. انا قلت امير كمال. مالو قلمي (خفيف) كدا. دا شنو دا؟…الظاهر انا لخبطت ساكت يا بابكر مختار. ما تشتغل بالموضوع. اعتبرها دقسة مني؟. اعتبرها اي حاجة كدا. قول غلطة مطبعية. قول ليهم البين قوسين دا ما امير كمال – دا (كوفي). يعني الزول ما يغلط ليكم في (المطرة) دي؟. هي وينها (المطرة)؟…عشان تغلطوا لينا فيها. انت بتقطع ليك حاجات من رأسك. غارزيتو لقى بكري المدينة وعلاءالدين يوسف شايلين المريخ ..قال جيبوا لي (عمر بخيت). وعمر بخيت مع ناس ضفر ديل عاوز ليه زول يونسو في (الكنبة). قاموا عملوا شنو؟. جابوا لي عمر بخيت …(المعز محجوب). عشان شنو؟. عشان عمر بخيت ما يحس بي غربة في (التخسينة). لاحظو اني لغاية الآن ما جبت سيرة (امير كمال). يسخن ما يسخن بي طريقتو. يجليها ..يدخلها ..يطلعها كونر …نحن ما عندنا قضية. نحن ذاتو لو ما فصاحة مننا ساكت امير كمال نعمل بيه شنو بعد سعرو ما وصل (7) مليار. ولا عاوزنو. انتوا قايلين (سيخ) الجوهرة الزرقاء مشي وين؟. قصر الكاردينال!!. ابدا. السيخ مشي بيت (امير كمال). دا شنو دا؟. الظاهر انا تاني قلت (امير كمال). عليك الله غادر المجموعة. اطلع لينا من الحتة دي. الناس ديل قاعدين يتحسسوا من الموضوع دا. غارزيتو بيقبل في اي زول ما بيقبل في (امير كمال). لا امير كمال. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الغريبة بعد عمر بخيت ..والمعز محجوب …غارزيتو قال عاوز (حمد كمال). يا راجل انت عاوز تقلب المريخ (السوق الشعبي بتاع الهلال). عاوز تعملو الميناء البري الهلالي. جابوا ليك عمر بخيت ..كمان تقول عاوز حمد كمال. عمر بخيت تسخينتو بي قون. غارزيتو ما عندو ثقة في برهان تية. ولا عندو ثقة في محسن سيد …(زول علامات ما بيعرف يرصها). وما عندو ثقة في جمال ابوعنجة. ولا عندو ثقة في عادل امين. ولا في عبدالمجيد جعفر. ولا في اي لاعب من قدماء لاعبي المريخ. غارزيتو قال عاوز (حمد كمال). فضيحة السواد. المريخ دا كلو ما فيه مساعد مدرب بقدرات حمد كمال. الزول دا نقل الهلال كلو المريخ. عملتها ظاهرة يا غارزيتو. الجماعة ديل لو تابعوك بالصورة دي …ح تقول ليهم جيبوا لي خالد بخيت. وما بعيد وقت تتعصر تقول ليهم جيبوا لي عم شبشه. ويقولوا ليك المريخ عالم جميل. ورونا الجميل شنو في المريخ؟. شقلبة بكري المدينة. تسخينة عمر بخيت. زعلة تراوري. قعدة المعز محجوب. حردة أحمد الباشا. الجميل شنو في المريخ؟. حاجاتكم كلها (صناعية). انتوا (جمالكم) كلو من الهلال بما في ذلك جمال الوالي. مزمل ابوالقاسم ذاتو بدأ من صحيفة الهلال في عهد ابراهيم عوض. نعمل ليكم شنو تاني؟. ابوالعائلة!!. يا جماعة انتوا عندكم شنو؟. ثوابتكم كلها (هلالية) المنبع. هلالية الاصل. الحكاية واضحة كدا. اللاعب الشايل المريخ ..(بكري المدينة) من الهلال. اللاعب الزعلان وقاعد في بيتو (تراوري) من الهلال. اللاعب القال عليه همد احسن لاعب في المريخ الآن (أحمد الباشا) من الهلال. اللاعب القاعد يسخن (عمر بخيت) من الهلال. اللاعب القاعد في الكنبة (عمر بخيت) من الهلال. طيب انتوا عندكم شنو في (الفريق) دا – ما عندكم غير (الطابق التاني). والطابق التاني ذاتو عملتو ليكم الحكومة. هسع لو سألوكم وقالوا ليكم عندكم شنو في المريخ دا؟. البودي قاردات!!. قالوا ليك البودي قاردات فيهم سبعة (هلالاب). اقول ليكم شيء…تحويل الرصيد ذاتو ..نصو رسلوه الهلالاب ..قالوا (دعما) لابناء العمومة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). غايتو نحن لو في حاجة عاوزين نقولها ..بنشكر (غارزيتو). بنقول ليه اصلا ما قصرت. غارزيتو فرتك ليك المريخ (فرتكة) شديدة. الباشا – اكرا – مجدي عبداللطيف – بلة جابر …ايهاب زغبير …(ابعدهم غارزيتو). برهان تية – محسن سيد – ابوجريشة ..غارزيتو قال ولا عاوز يشوفهم تاني. همد في حتة. ومتوكل في حتة تانية. زعزعة مبالغ فيها. صراعات ..حروبات ..وحفر على اصولو. ناس قالوا باعها. وناس قالوا غارزيتو اصلو كدا (بتاع تنظير) – رأسو قوي ..هيثم مصطفى اصلو ما غلطان عليه. تصدع شديد في المريخ. غارزيتو اصلو ما قصر معانا. غارزيتو قال ليهم تراوري ما تجيبوه لي. شالوا ليه (تراوري) – غارزيتو قال ليهم (اكرا) دا بعمل هنا شنو؟. طوالي قبل على اكرا. اكرا ذنبو شنو؟. الحاجة التى شتت المريخ وجعلته يخسر بالثلاثة من مازيمبي ..صراع غارزيتو ومحسن سيد وخلافهم في المطار. قالوا ليك غارزيتو من شاف محسن سيد – قال الزول دا الجابو شنو؟. ما عاوز اشوفو. حجزوا ليه برة الفندق. مشاكل مبالغ فيها. لمن اللاعبين دخلوا في حالة نفسية. البودي قاردات ..جابوهم فزع بقوا وجع. الكنغوليون ديل قالوا ليك ضربوا ليك البودي قاردات وحجزوهم ليك بي (شيبون). وعاوزين تغلبوا مازيمبي بي طريقتكم دي. الخلل اداري يا جماعة. حاسبوا المجلس. وزي ما اضاع صلاح ادريس على الهلال الوصول للنهائي امام النجم التونسي…فعل جمال الوالي نفس الشيء واضاع الوصول للنهائي امام مازيمبي. اعلام المريخ ما بقول ليكم الكلام دا. الجماعة ديل ممكن يهاجموا غارزيتو. وممكن يقطعوا محسن سيد. وممكن ينتقدوا اللاعبين. ممكن همد. ومتوكل. لغاية الفريق طارق. لكن جمال الوالي ما بقدروا يقولوا عليه كلمة. هذه الفوضى سببها كلها جمال الوالي – لكن ما في واحد فيهم بقدر يقول حاجة. اتخيلوا الصراع الدائر بين غارزيتو ومحسن سيد. والمجلس قاعد يتفرج. اتخيلوا ..ان محسن سيد وصلت به المرحلة ان وجه اتهام مباشر لي غارزيتو بانه (باع) المباراة. المجلس ما قال حاجة. لا حاسب محسن سيد. ولا حاسب غارزيتو. يا جماعة يا الزول دا باعها ..يتحاسب. يا محسن سيد بتهم غارزيتو ساكت ..ويفترض ان يحاسب. وغارزيتو هو المدير الفني للمريخ. ومحسن يعمل في القطاع الرياضي حسب تصريحات جمال الوالي الاخيرة. شفتوا (الفوضى). شفتوا (السبب). وما في زول قادر يقول حاجة. والله يا امير كمال لو الناس ديل بعد الوضع دا قعدت معاهم يكون ما عندك رأس. يا زول البقعدك مع الناس ديل شنو؟. انا قلت امير كمال. انا مالها!! امير شنو كمان؟. ……… و الهلال عنده مباراة صعبة بكرة امام الاهلي الخرطوم. ومباراة اصعب امام مريخ كوستي يوم الاحد. خلوا بالكم يا هلالاب. الممتاز البطولة المحببة. والكاس بجيبوه ناس صهيب الثعلب. صهيب ووليد الثعلب. احسموا لينا الاهلي ومريخ كوستي. خلونا نقلب الصفحة دي. ……….. السيدة (ل) – اقسميها على اتنين لو ما قبلت القسمة تبقى دي ما حقتنا. وقرّض على كدا.
