بالعربى الكسيح محمد الطيب الأمين الفتيل ما بشيل كتير !! * من الغباء ان تشتري (سراميك) ب(3) مليون عشان تسمع صوت (الفكه) لما تقع منك في (الغرفه) .. * في ناس كده .. * الواحد يعمل (سراميك في الاوضه) والهدف من السراميك هو ان يسمع صوت (جنيه الحديد) لما يقع منو .. * وسفر المريخ للكنغو يشبه (السراميك) المعمول من اجل (الفكه) .. * والله صحى .. * سفر المريخ للكنغو كلفهم تكلفه عاليه جدا .. * في الكنغو المريخ عمل (سراميك) وفي الملعب (وقع) منهم (جنيه حديد) بس .. * يعنى (البودى قاردات والطباخين وبتاعين التكييف والطياره الخاصه) كل الحاجات دى و(الوقع) جنيه حديد بس .. * غايتو جنس غايتو .. * إعتبارا من اليوم يجب ان تتوقف مفاوضات الهلال مع امير كمال .. * الزول ده ما تفاوضهو تانى .. * ممكن نجيبو بطريقه غير مباشره .. * يا الكارينال لو داير تجيب امير كمال إتعاقد مع ساماتا .. * لو جبت ساماتا امير كمال بيجى براهو .. * زمان كنا ب(نكب مويه السكر لحمام بنات جيرانا) .. * الحمامه تشرب (مويه سكرنا) وتعسكر مع حمامنا .. * وبعد يومين بنات جيرانا بيجن يسألن من الحمام .. * وإحنا اصلا كنا بنقصد (جيت البنات لبيتنا عشان يسألن من الحمام) .. * ده كل القصد من (مويه السكر) .. * هسه يا الكاردينال جيب ساماتا وليك علي امير كمال بجى براهو .. * والله صحى .. * من جديد يعانى محمد عبد الرحمن من الاصابه ، وعلاج (أبو حميد) ما عند الدكاتره .. * لا اريد ان أزيد بخصوص اصابه (ميدو) ولكن إكتفى بالقول : (علاجو ما عند الدكاتره) .. * في الدنيا دي أنا في (خمسه) حاجات مستغرب فيها (3) هى : (الشطه والمريخ الما اشتكى) .. * (بذرة الشطه) بااارده ومع ذلك (ولد الشطه) بيطلع حااااار … دى حاجه .. * والحاجة التانيه .. المريخ خسر في الكنغو وما اشتكى .. * يمكن ناس المريخ ما لقو زول يشتكو .. * لكن بقترح ليكم تشتكو (قرن شطه) .. * مش قرن شطه قال إنتو زي (برشلونه) ؟؟ * مش قال كده ؟؟ * طوالى مفروض تقدمو فيهو شكوى لانو غشاكم وضللكم .. * انا بقترح كده .. * واى زول طبعا حر في (مقترحاتو) .. * الكاردينال قال منح الكوكى صلاحيات الشطب والتسجيل .. * وفي نفس الوكت الكارينال في لندن بيفاوض في وكيل لتسجيل لاعب .. * دى تجى كيف دى يا ريس ؟؟ * ولا يكون الكاردينال بعد ما منح الكوكى الصلاحيات قام الكوكى منح الكاردينال صلاحيات التفاوض في لندن .. * صلاحيات ولا ما صلاحيات المهم إحنا السنه الجايه دى على بالقسم ما بنقبل ب(المواسير) .. * عشان كده نجضو الشغل وإتذكرو (الني للنار) .. * اليوم الأربعاء يوافق اليوم الرابع لنهايه صلاحيه (ريحه المطار) .. * (فتيل ريحه المطار) اشتراه كاتومبي و(إتعطر بيهو ساماتا) .. * حاليا ساماتا متعطر بعطر اسمو (ريحه المطار) .. * والله صحى .. * نكرر مناشدتنا مجددا لمجلس إداره نادى الهلال بعدم المشاركه في الاحتفال الذى قرر معتصم جعفر إقامته تكريما للهلال والمريخ بمناسبه وصولهما للمربع الذهبي .. * الاحتفال مقصود بيهو (فريق عزو) الذى وصل هذه المرحله لاول مره في تاريخه .. * الهلال كل سنة بيصل هنا وما حصل معتصم جعفر كرمنا .. * حفاظنا على هيبه الهلال وتاريخه يجب ان لا نشارك في (حفل المرطبات) الدايرين يعملو ناس اسامه عطا المنان من اجل رفع معنويات (عزو) .. * بعدين إحنا ما اولاد صغار عشان تعملو لينا تكريم (بدون نجاح) .. * المرحله دى وصلناها ألف مره وما جديده علينا لكن جديده على المريخ .. * هسه عليك الله ما معتصم جعفر والله يسألك الاتحاد المصري عمل تكريم لسموحه ؟؟ ولا الاتحاد المغربي عمل تكريم للتطواني ؟؟ ولا الاتحاد الجزائري عمل تكريم للعلمه ؟؟ * ولا دى رشاقه منك ساكت .. * العلمه وسموحه والتطوانى كلهم زي حنطور العرضه جنوب اول مره يصلو المرحله دى ومع ذلك إتحادات الجزائر والمغرب ما عملت احتفالات للانديه دى لانها إتحادات محترمه .. * نعم الانديه ديك ما وصلت المربع لكن دور المجموعات برضو بالنسبه للعلمه إنجاز .. * عموما ثقتنا كبيره في مجلس الهلال يرفض الفكره دى جملة وتفصيلا .. * قرر غارزيتو شطب (15) لاعب من الكشف الأحمر .. * وطبعا البعض من اعلام المريخ اتهم غارزيتو ب(بيع) مباراة الكنغو .. * ولو صحى غارزيتو طالب بشطب (15) لاعب يبقى الزول ده ما باع مباراة الكنغو بس ده باع مباريات الموسم الجاي زاتو .. * وفعلا .. متنا من الضحك والضحك كتلنا .. * اوروبا (صغار وكبار) تطارد مكسيم وهذا شرف للهلال قبل ان يكون شرف لمكسيم .. * والهلال تاريخيا هو النادى السوداني الوحيد البيقدم لاعبين للاحتراف الخارجي .. * في ال(20) سنة الاخيره قدم الهلال للخارج كل من (والى الدين وريتشارد وطمبل وبشه وقدوين وكلتشى وساسا) .. * وفي هذه السنوات ال(20) لم يقدم المريخ سوى (محمد موسى) .. * ولذلك اللاعبين بيحبو الهلال لانو الهلال ما بيقيف في طريقهم ، وهذا تأكيد على ان الأزرق فريق يتمتع بثقه كبيره ولا يعانى (دونيه ونقص وإنفصام في الشخصيه) .. * الهلال ما زي المريخ .. * المريخ في الاصل يعانى من إنفصام حاد في الشخصيه .. * المهم .. يسعدنا جدا والله إنو مكسيم يمشى اوروبا عبر بوابتنا ونبارك له هذه الخطوه من قلوبنا .. * لكن بس في حاجة (صغيرونه كده) .. * الهلال يحتاج لمكسيم لموسم اخر وذلك لاعتبارات كثيره اهمها ان الهلال يحتاج ل(طقم مدافعين) ، وخط الدفاع لما يكون جديد بحتاج لحارس قديم ، ثم ان الهلال رفع شعار الشباب ولابد من وجود مكسيم بجانب هذا الجيل للاستفاده من خبرته وروحه القياديه ، فضلا عن ان الهلال في العام القادم يريد الابطال وإذا تحقق هذا قطعا سيكون لمكسيم نصيب الاسد .. * نعلم ان الهلال اذا رفض اطلاق مكسيم سيؤثر ذلك على نفسياته ولكن على مكسيم ان يقدر (ظروف الهلال) سيما وان القانون حرم التعاقد مع الحراس الاجانب من الآن وصاعدا .. * الموضوع سابق لاوانه ولكن اداره الهلال يجب ان تعمل حساب لهذا الموضوع مبكرا .. * محسن سيد إستقال ، والمجلس اقال محسن سيد .. * شالو محسن وخلو ابوجريشه قاعد مع إنو القالو ابوجريشه حسب حركه (الشفاه) وحسب ما تردد بشيل مجلس كامل خليك من زول واحد .. * طبعا يا جماعة غارزيتو ده زول مسكين ساكت ما عارف حاجه .. * والله صحى .. * غارزيتو قال محسن سيد ما بيعرف يرص العلامات .. * مسكين .. هو ما عارف محسن ده جابو لحاجات تانيه ما عندها علاقه ب(رص العلامات) .. * محسن ده يا خواجى انت جابو يعمل حاجات تانيه افضل من رص العلامات وافيد من التدرب بتاعك ده .. * هسه محسن سيد لما سافر الكنغو سافر بصفته إدارى وليس مدرب وما كان قاعد في (الكنبه) .. * يبقى الزول ده عندو حاجات تانيه بعملها بس غارزيتو إستعجل ساكت .. * الغريبه بعد (الحاجات التانيه) دى ساماتا فعل فعلته القبيحه .. * نرجع ونقول .. في فرق افريقيه كانت معانا في الابطال قبل (حادثه البلايلي) كانت نشيييييطه وبعد حاثه البلايلي هبطت هبوط غريب .. * والله الفرق دى ذكرتني بت في حلتنا .. * كان عندنا بت في حلتنا ما عندها (سجم رمادها) .. * البت دى لما يكون في حفله في حلتنا ب(تشد) ملابس من صحباتها .. * كانت ضعييييفه بلعت النجمه وبقت تلبس من صحاباتها .. * بتجى الحلفه وهى ما لابسه ولا شي حقها .. * كل اللابساهو (شده) من الناس .. * وبتطلع أحلى بت في الحفله بحق الناس .. * يوم من الايام بنات حلتنا (خمشوها ليك) وعرفوها وقامن قفلن منها (البلف) .. * البنات إتفقن تانى ما يدنها ملابس شده .. * قفلن منها البلف .. * البت دى بقت تجى الحفله تقعد ورا مع النسوان الكبار .. * بقت باااهته ومسكينه .. * هسه الاتحاد الافريقي اول ما (خمش البلايلي) في فرق معانا في الابطال بقت زي بت حلتنا ديك .. * غايتو جنس غايتو .. * بالمناسبه داير اقول حاجه .. * الفرق بينا وبينكم (6) نقاط وال(6) نصها تلاته والتلاته حلاته .. * والله العظيم يا جماعة وإنتو ما طالبني حليفه ، أنا كل ما اتذكر موضوع البودى قاردات والطباخين بضحك لما ببكى .. * ياخى ده وهم غريب .. * انا غايتو في حياتي ما لقيت ناس مواهيم زي الحناطير ديل .. * ياخى الطباخ ما مشكله .. البودى قاردات لشنو ؟؟ * فعلا والله .. مرات نبكى من كفرنا ومرات كفرنا يبكى الكافر .. * والوطنيه في الطحنيه يا مولانا .. * طحنيه ب(الغاء) .. * و..و.. * والبنريدو تايه ويا حليلو ال….(بجيب لينا البخرات والمحايه) ..
