بالعربى الكسيح محمد الطيب الأمين تألكو (لقيماتنا) وترفضو (قراراتنا) ؟؟ * (النعامه) لما تكون متأثره ب(الأسد) مرات بتنسى إنها نعامه وتعمل ليك فيها أسد .. * كثير من (النعام) قدامنا عمل فيها أسد .. * والأزمة الرياضية الحاليه ما كان لها ان تكون لولا ان الإتحاد العام قدامنا (أسد) وقدام جمال الوالى (نعامه ساكت) .. * مع إنو المريخ زاتو قدامنا إحنا يعتبر نعامه ليس إلا .. * أسد البلد دى هو الهلال ، والمريخ ومن معه (نعام) .. * يبقى يا سعادة الوزير عشان الهيبه ترجع للقانون لابد ان تعرف النعامه انها نعامه ويعرف الأسد انه أسد .. * بالطريقة دى ممكن القانون يكون هو الحاكم ، اما بطريقة (النعام) فتأكد يا سعادة الوزير ان (الجوديه والتحانيس) ستحل محل القواعد العامه واللوائح .. * بدون (لقيمات) .. فاز المريخ أمس على النسور بهدفين دون مقابل .. * والدليل على إنو المباراة خاليه من (اللقيمات) هو عدم إحتساب الحكم لاى ركلة جزاء للمريخ .. * ولذلك إحنا واولاد حلتنا نتوقع ان يكون اخر اجتماع كان فيهو (شاي احمر وفول حاجات) وليس (لبن ولقيمات) كما يقول الكاردينال .. * غايتو جنس غايتو ؟؟ * غارزيتو في وجود جمال الوالى جاب (سائق بص) لتدريب حراس مرمى المريخ .. * حاليا مدرب حراس المريخ كان شغال (سائق بص) في بلدو وهذا ما قاله محسن سيد .. * أنا والله مستغرب في حاجة .. * قول لي شنو ؟؟ * محسن سيد ده عرف كيف إنو مدرب الحراس (سواق بص) ؟؟ * انت عرفتو كيف يا محسن ؟؟ * محسن ده مُسلط ، إحتمال يكون شاف (الرخصه بتاعت الزول ده) .. * بكون شاف رخصتو .. * لو ما شاف رخصتو ما بقول كده .. * المهم .. * لوغارزيتو في وجود جمال الوالى جاب (سواق بص) يبقى غارزيتو ده في وجود اسامه ونسى ممكن يجيب ليكم (كمسارى البص) .. * والله صحى .. * وما تنسو .. ايهاب زغبير قال غارزيتو سمسار .. * مره يقولو سمسار ومره يقولو (بااااع) ومره يقولو لقى (خاتم مدفون) .. * قال ليهم لقيت خاتم مدفون وسنفوز بدورى الابطال .. * والجماعة صدقو .. * ومشو الكنغو .. * ومعاهم البودى قاردات .. * والطباخين .. * وفنيين فحص الهوا .. * وساماتا الما بخاف الله بالتلاته خلي ليك المريخ في حتة ونجمة المسالمه في حتة تانية .. * يعرفوكم حناطير كيف ؟؟ * من الله خلقكم شفت ليكم زول لقى خاتم مدفون جاب كأس ؟؟ * فعلا والله حناطير .. * حاجة تكسف ؟؟ * تبرع رئيس الهلال ب(كشافات الاستاد) هديه لنادى الامل ، وهذه الهديه تؤكد ان الهلال (كريم) والامل (يستاهل) .. * ولان فريق الميرغني كسلا هو شريك في النضال مع الهلال نرجو ان يقوم الكاردينال بتسجيل مدافع المريخ امير كمال في كشوفات الميرغني .. * نتمنى ان يقدم الكاردينال امير كمال هدية لناس كسلا .. * الكاردينال لابد ان يسجل امير للميرغني كهديه .. * او ممكن الهلال يسجل امير كمال ويقدمه للميرغني (إعاره) .. * بالمناسبة .. * أمبارح وكيل (كوفى) قام بعرض اللاعب للهلال .. * الوكيل جانا شايل ورق كوفى وقال لينا لو دايرينو (حلال عليكم) .. * وأنا شايف إنو كوفى مع كعب .. * ممكن نسجل كوفى ويجى يقعد إحتياطى للثعلب .. * انا شايف كده .. * واى زول طبعا حر في (شوفو) .. * وعلى فكره .. ما في زول بقدر يقول لي : ليه شايف كده ؟؟ * انا حر .. * ان شاء الله اشوف (الرغيفه) لقيمات واعمل فيها ما شايف .. * حر .. * المهم .. نجدد التهنئة للهندس الهلالابي الكبير اسامه ونسى الذى اختارته الحكومة رئيسا للمريخ .. * نتمنى ان يكمل اسامه ونسى (الهلالابي الكبير) فترته بالمريخ على الوجه الاكمل .. * وشكرا .. * غدا يلاعب منتخبنا نظريه اليوغندي في مباراة يحتاج فيها صقور الجديان للفوز بأكثر من هدفين من اجل التأهل بدون (لولوه) .. * ونحن نعلم ان كثير من الناس لا يهتمون بالمنتخب الوطنى بسبب (عمايل) الاتحاد .. * في ناس والله بسبب الاتحاد بقو لو المنتخب خسر بيفرحو .. * بس يا جماعة المنتخب ما حق الاتحاد .. * ده منتخب البلد .. * والبلد حقت الشعب .. * والشعب هو جمهور الهلال .. * ولذلك على جهور الهلال الكريم ان يفصل ما بين الاتحاد والمنتخب .. * علينا ان نحرص غدا على تشجيع المنتخب من اجل هذا السودان وليس من اجل هذا الاتحاد الفاشل .. * إحنا ما بنعاقب (السودان) عشان إتحاد فاشل .. * والهلال حريص على السودان اكتر من الاتحاد .. * وده واجب وطني وجهور الهلال بأذن الله لن يقصر .. * في زحمة الانسحاب وهذه (الجوطة) نتمنى ان لا ينسى مجلس الهلال قضيتنا مع الكوكى .. * الكوكى زول (حقار) ولازم يدفع الشرط الجزائي .. * يدفع الشرط الجزائي عشان يعرف الهلال (لحمو مُر) .. * بدون مقدمات أطلق نجم الهلال الجديد ولاء الدين تصريحات قال فيها : (اتحرق شوقا لارتداء شعار الهلال واخترت الرقم 9) .. * غايتو ولاء الدين ده ثقيل ثقاله .. * ناس المريخ بفتشو فيهو وهو قال اختار الرقم 9 .. * دى ثقاله منك يا ولاء الدين .. * كان تعمل نايم عشان (تعشم) الجماعة ديل شويه .. * ما كان تقطع العشم كده .. * بمناسبة (تقطع العشم دى) .. * ما اى زول بقدر (يقطع اللقيمات) .. * في ناس معيين بقدرو (يقطعو) اللقيمات و(يرموها) .. * في ناس مختصصين طعمية وفي ناس متخصصين لقيمات .. * وباقى الزيت بتاع اللقيمات ممكن (ترمى) بيهو طعمية ، لكن عيب ترمى لقيمات في باقى زيت الطعمية .. * والله صحى .. * ولو مغالطني اسألو (الاراقوز) .. * طبعا يا جماعة الزول مرات بيسرح بخيالو .. * وامبارح القريبه دى انا سرحت بخيالي .. * إتخيلت إنو صدر قرار بحل لجنة الاستئنافات وبالتالى خسر المريخ الشكوتين .. * إتخيلت كده .. * وتانى يوم من حل لجنة الاستئنافات وخسارة المريخ للنقاط اتخيلت إنو صحيفة (الزعيم) خرجت بعنوان عريض مكتوب فيه : (تأكلو لقيماتنا وترفضو قراراتنا) .. * هكذا تخيلت .. * والخيال نعمه .. * نعمه ب(الفاء) .. * و..و.. * وتسيبني في عز الجمر وانت من حولى …(بتضرب في اللقيمات) .. � � � حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
