دق الدلجة محمد عبد الماجد (الكسكتة) مع (ابيكو).. جابت ليها (إلغاء) ونحن يا دوب بنتعلق في (سلالم) العربيات …ونتشبعط. (الشعبطة) دي اظن ما فيها حاجة. ما كان عندنا قضية مع زول. البرد دا بي فانلة داخلية بنعديه – ولا بعمل لينا اي حاجة. الكهربة قطعت ما قطعت ما عندنا معاها شغلة. كهربة شنو البنشتغل بيها؟. يا زول ما عندنا اي قضية بالكهربة. بلة جابر بس. ولو مشينا لي فوق شوية بندخل على (ضفر). الزمن داك كان المسلسل (15) حلقة بس. ما في مسلسل فيه 120 حلقة. بالله المسلسلات التركية دي تبدأ وولدك يا دوب في (الروضة) ..وقت يجيبوا ليك الحلقة الاخيرة ..والدك بكون على اعتاب التخرج من الجامعة. يفكر في العرس. (السودانيين) ديل ما بصبروا لي حاجة – إلّا المسلسلات التركية. يقعدوا في المسلسل سنة ونص. ديل مشروع الجزيرة ما صبروا ليه. مشروع الجزيرة دا فيه حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الوقت داك كان عندنا في الحلة زول عامل لينا فيها (محمد وردي). بتقطع عديل كدا عشان يعمل لينا فيها (وردي). بتقلب في الواطة دي. يتقلب دي فيها حاجة!!. ما خلى شيء لي وردي. المشيه – الشعر – الطول – اللبس. اي حاجة فيه زي وردي إلّا (الصوت) و(الشخصية). مع ذلك الزول دا كان بحاول يقنعنا انو (محمد وردي). وانو التلفزيون حاقد عليه. وناس الجرايد ناس حاسدين ساكت – عشان كدا ما قاعدين يسلطوا عليه (الاضواء). والاذاعة ما شايفة شغلها. وانو البلد دي ما بيقدروا فيها (المواهب). عدم تقدير المواهب دي فيها حاجة. زولكم كان في اي حفلة بيطلع المسرح وبيغني اول اغنية ليه في الحفلة (الطير المهاجر). نظام وردي وكدا. الطير المهاجر دي فيها حاجة. عذبنا عذاب ب (الطير المهاجر). بقى لينا (خلف الله) عديل كدا في الحتة دي. اظن (خلف الله) دي ما فيها حاجة. صاحبكم قدر ما يطلع على المسرح بيخش ليك على (الطير المهاجر). ببدأ الحفلة ب (الطير المهاجر). نظام زول تقيل وكدا. والطير المهاجر بتاعة الزول دا ما عندها اي علاقة بي الطير المهاجر بتاعة وردي. حقتو (طير) ساي…ما عندو اي علاقة بالهجرة. زي شارع الزلط مقارنة مع شارع التراب. شية الجمر مع العدس. لو تقلت ليكم في (العدس) فيها حاجة!!. فرق الليل من النهار. في واحد في حلتنا كان عامل فيها في نفس الوقت (ناقد فني). وكان الناقد الفني دا كل ما ينفرد بي الزول العامل فيها وردي بقول ليه : انت لو عاوز تقلد وردي قلدو .. بس قلدو بي حاجة خفيفة. حاجة تقدر عليها. ما معقول تقلدو بي (الطير المهاجر) طوالي كدا. الطير المهاجر دي وردي ذاتو لمن يكون ما عندو مزاج ما بمشي عليها. وردي ذاتو تقديرا للاغنية بغنيها في السنة مرة واحدة. ولا قاعد يقدمها في الحفلات. ما معقول في برد زي دا تغني لينا : (بالله يا الطير المهاجر للوطن زمن الخريف). الاغينة دي (خريفية). وكان الناقد الفني دا بقول ليه والله (الطير المهاجر) عندك زي (تقوم بينا العربية تودينا للسادة) – تقوم النفس. الكلمات في حتة. واللحن في حتة. اما (الصوت) تقعد تفتش عليه زي ابوالدنان. ابوالدنان دي فيها حاجة!!. يمين (الطير المهاجر) بي طريقتك دي – اشطر (فحيص) لو شلتها ومشيت بيها عليه ما بعرفها ليك. نشفتها نشاف. طبعا لغاية الآن ما جبت ليكم سيرة لمباراة القمة اليوم. ولا مناسبة. عاوز اتكلم عن (وردي). وردي وابيكو. على كيفي. الكسكتة بتاعة الكاردينال دي قاعد تبالغ معانا عديل كدا. كسكتة خطيرة شديد. طلعت لينا ولاءالدين. وابوعاقلة. وعمار الدمازين. وميسي ذاتو. والله قالوا ليك لو الكاردينال رفع (الكسكتة) شوية كدا ..كان جاب ميسي (الاصلي). بس مراعاة لحالة المريخاب النفسية. عشان كدا اكتفى ب (ميسي) المحلي. واحد قال لي تعرف. قلت ليه اعرف شنو كمان في (البرد) دا؟. البرد دا فيه حاجة!!. قال لي تعرف الكاردينال لو حول (الكسكتة) شوية كدا كان جاب (امير كمال). قلت ليه …كسكتة الكاردينال دي مالها عاوز تبقى لينا زي (طبق النيلين). نقعد نحول فيها من اتجاه لي اتجاه. رفعناها شوية كدا. ظهرت لينا (الجوهرة الزرقاء). انتوا عارفين امس (الكسكتة) جابت لينا منو؟. جابت لينا (ابيكو). ومع (ابيكو) لغت المباراة. دي فيها حاجة. الالغاء دي فيه شيء. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ابيكو دا عشان الموضوع يبقى ليكم واضح ..اي مهاجم في البلد دي احسن يمشي يكمل دراستو. او بي صحيح العبارة دي يمشي (الدهب). اقنعوا من الكورة تانية. الكورة دي مع (ابيكو) ما بتأكلكم (عيش). ما تعصروا لي على لجنة الاستئنافات ساكت. لقيتوا لي (لجنة الاستئنافات) الهملة دي ..وسجلتوا لي (خالد النعسان). الهملة دي فيها حاجة. ما تصعبوها ساكت. غايتو يا ناس المريخ (عشان اكون واضح معاكم) – اصلو ما بغشكم. ولا بكضب عليكم. الموسم القادم ب (خالد النعسان) دا إلّا تشاركوا في (الدورة المدرسية). الممتاز 110 لجنة استئنافات ما بتحلكم فيه. كورة تاني اقنعوا منها. ضمنة بس. تاني توبة… لا ريد لا غرام لا خطوبة. عرس بس. اقنعوا من الكورة. كوتشينة تلعبوا للصباح ما في زول بيسألكم….ما تقولوا لي (النعسان) وكدا. الكوتشينة دي فيها حاجة!!. لكن كورة بي تسجيلاتكم دي …إلّا تستعينوا بي مزمل ابوالقاسم وسلك ومعاوية الجاك وهيثم كابو. ألعبوها في الجرايد. في الاعمدة. تبقى كورة قلم. بدل كورة قدم. دي فيها حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اقول ليكم حاجة ما عندها اي علاقة بالعمود دا. ولا بي (البرد). عليك الله هسع دا (برد) تدخل لينا في العمود دا. تسجيلاتكم السنة دي يا الكاردينال اقفلوها لينا بي محمد الامين. جيبوا لينا (عقد الجلاد). ومحمد النصري. وابوعركي البخيت. ابوعركي البخيت دا فيه حاجة!!. تسجيلات مية المية. ولسه كمان في حاجات تانية. والله انا من لقيت ليك جمال الوالي (استقال) – عرفت ليك الموضوع ما بفوت خالد النعسان. الحد الاقصى خالد النعسان. يا بكري المدينة ما نسيناك. يا بكري المدينة العملتها اتعرفت. نسفت لينا الموسم كلو. كلو منك. كورتك عاوز تتمها لينا (لجنة استئنافات). معقولة بس. انتوا عارفين ونحن على مشارف خواتيم هذا العمود. عارفين الزول الدغل منو في البلد دي. الدغالة دي فيها حاجة. الزول الدغل ..هو الزول البيدخلك الصالون ويفتح ليك المراوح والمكيف ويجيب ليك (ملاية) رهيفة كدا للغطاء. ادغل من الزول دا اصلو ما لاقني. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و اشادة خاصة من فوزي المرضي سمعتها في حق المحترف ابيكو. فوزي المرضي قال ان هذا المدافع مدافع مسؤول. كفى ان مازيمبي صارع الهلال حوله. ومازيمبي تسجيلاته للبطولة. الهلال في تعاقداته القادمة ما يجيب لينا لاعب قصير القامة. عاوزين لاعبين اصحاب قوام طويلة وقوية. المهاجم يفترض ان يكون من اصحاب الطول الفارع. نتمنى ان تكتمل كل مساعي الهلال في هذه التسجيلات. وننتظر الكثير من الاخبار السعيدة. واي ملف في الهلال – سوف ينجز باذن الله. وين اسامة عطا المنان ؟. بقى لا بصرح ولا بقول حاجة. عملتها في الكورة السودانية يا اسامة. يا ناس لجنة الاستئنافات. يا سمير فضل. يا الفاتح خضر. يا فيصل سيحة. ..لا فيصل سيحة ما معاهم. شفتوا لخبطوا لينا الموسم كيف؟. شفتوا نهاية (المسخرة) بتقدونا الى وين؟. المسخرة دي فيها حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……… السيدة (ل) – شاحن الجلاكسي ما بشتغل في تلاتين عشرة. وقرّط على كدا.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
