في السلك بابكر سلك ياربنا خلي لينا كردنه *الجماعه اول امس متصورين مع الكرت *صوره جديده كرت *كرت الوك *بس العزاء انو تمن الكرت كان بي شيك *وشيكات الجماعه طبعا بتطير اكتر من سودانير *سودانير ؟؟؟ *وووووين الاسم ده !!!!! *ما علينا *اسماء في حياتنا *اسم كبير كان قبل ما يموت عمر الجزلي يعمل معاهو حوار طوييييييييل *حوار خمسه حلقات *يحكي لينا فيها عن فرانكفورت وباريس وهيثرو *ويكلمنا كيف انو زي القاهرهوجده ديل بمشيهم علي بال ما ناس الجوازات يختموها *وكيف انو نيروبي واديس ديل كان بجيهم بي نمرة اتنين عادي *اسماء في حياتنا برنامج كبير لمعد ومقدم كبير *ساهم في التأريخ لقامات قدمت للبلد دي الكتير *التقي باسماء كتيره *بس اهم الاسماء كان سودانير *الف رحمة تنزل علي فقيد الوطن وتلهم اهله الصبر والسلوان *اللهم لاتفرقنا من بعده يا رب العالمين *المهم *كردنه بي كرت وماقادر يتخيل انو الوك وقع لينا *كرتك عينه يا كردنه *شايل الكرت وراجي الزول يجيك *كرت عرس قايلوا انت يا كردنه ؟؟؟ *روشا *الكرت المليت بيهو جريتك ده اول امس *بتبرروا كيف ؟؟؟ *عينكم يا فطومه لي الوك تمشوا لي مجوك بتاع الملكيه !!!! *اها مجوك ركبكم التونسيه *اداكم الكرت *وبي كرت وماقادرين تفتحوا خيال وتسجلوا الوك *مجلسنا الجديد *ماعندو خبره *بدون كرت فتح خيال وسجل الوك *لوكوا الصبر يا روشا *يا ربنا تخلي لينا كردنه *الزول ده رجلو خضراء معانا *واتخدري *ايها الناس *تسجيلاتنا ماشه عال العال *وكما وعد ونسي القصه ما صعبه *بس لانو كتير من المريخاب بفتكروا انو وعود ونسي مجرد تخدير *وانو بعد ذهاب جمال مافي قروش تاني *صحيح المثل قال *مفطوم الرضاعه ما بسكتوا اللولاي *لكن الفطامه بتخلي المفطوم يضطر ياكل *وكان اكل ببقي قوي وبكبر *سن الرضاعه معروفه *بعدها لازم يكوضم *والمريخ لو ماكوضم في زمن ناس ونسي ده *تاني ما بكوضم *والكوضيم يا ونسي في الاستثمار وحبة شمار وعون جمال *الاستثمار ….الاستثمار …الاستثمار *ايها الناس *الوك سبب لي انسحاب ناس كردنه الموسم القادم *ده طبعا اذا فطومه ما تركت الكتابه وروشا ما قفل الجريده وكردنه قعد *بقول اذا *ايها الناس *المدرب الشاطر ليس سببا وحيدا ولا كافيا للفوز بالبطولات *وعلي الرغم من قناعتي بانو غرزه شاطر *استطاع في موسم واحد ان يعيد الحماس الذي افتقدناه داخل الملعب *واستطاع ان يعيد الجماهير للمدرجات بكثافه *واستطاع ان يخلق فريقا مرعبا افريقيا *واستطاع الكثير *برغم قناعتي بضرورة استمرار الرجل *الا اني احترم الراي الاخر *وطالما المجلس قرر رحيل الرجل *يبقي نطيع اولي الامر منا *ولكن **هل سيأتي المجلس بمدرب في قامة غرزه ؟؟؟ *ده ما موضوعنا *موضوعنا انو المدرب الشاطر براهو مابصنع فريق بطولات *لازم يكون معاهو لاعبي بطولات *والدليل علي ذلك *جيل مانديلا عندنا *جابوا سيكافا الاولي والمدرب سيد سليم *جابوا دبي والمدرب سعد دبيبه *جابوا مانديلا والمدرب رودر *جابوا الشارقه والمدرب مازدا *جابوا سيكافا التانيه والمدرب مازدا *اختلف المدرب والجيل واحد *والبطولات لم تنقطع *يبقي الجيل بصرف النظر عن المدرب هو القادر علي التتويج بالبطولات *نوعية اللاعبين في الاول وبعدين تجي بصمة المدرب *والان نحن نملك جيل يستطيع ان يصعد الي منصات التتويج *جيل الوك وشيبون وابراهومه وامير كمال والعقرب وعلولو وعجب وجابسون وكوفي وجمال سالم *فقط نحتاج لجيل في المدرجات يضاهي جيل مدرجات جيل مانديلا *ودي متوفره وانا واثق فيها *فالشفوت خشوم بيوت *وخشوم البيوت الشفناها بي اللوقو والدفوف واللافتات والاعلام والحناجر القويه في الموسم الفات *قادرون علي الزئير الذي يدفعنا للعوده لمنصات التتويج *وربنا يخلي لينا كردنه *في عهد هذا الرجل حانعود لمنصات التتويج *المهم *المدرب مهم ما قلنا شئ *لكن المعد البدني اهم منو يا ونسي *لانو لاعب بدون لياقه مهمها كانت مهارتو ما بقدر يقدم شئ *وللامانه *الناس البتقول غارزيتو محارب اوكرا *غارزيتو ما حارب اوكرا *لكن اوكرا حارب نفسو باهماله لنفسو *اوكرا مساهر في الفيس وبتعشي دليفري الساعه تلاته صباحا *وبجي ما عندو لياقه *لذا تتعطل المهاره عندو *وتبقي زي الوديعه الاستثماريه *حقتو وخاتهيا في البنك وماقادر يشيلها وكت يحتاج ليها *الا زمنها يجي *ولما زمنها يجي تكون الكورة انتهت *ايها الناس *قبل كورة مازيمبي الاولي *غرزه كان بختبر في لياقة لاعبيه وقوة تحملهم *اوكرا سقط ارضا بعد تمنيه دقائق بس من بداية التمرين *يبقي ابعاد غرزه ليهو حرب من غرزه علي اوكرا ولا حرب من اوكرا علي نفسو ؟؟؟ *ونسي *كل اسباب فشل وارغو يمارسها اوكرا *الزول ده بشيل بالدولار *والدولار حار حار حار *يا يدينا من النار زي الدولار البشيلو *يا يدينا عجاج كرعينو *لعاب ماقلنا شئ لكن لعوب شديد *ادوهوا العين الحمراء قبل الدولار *يديكم ابداع وامتاع وفنون وجنون *سامعني يا ونسي *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *الفيس ده في البيت للبوليس يوم بجيب لينا *شنو البلم ناس التمنيه سنين وناس السبعين وناس جيلنا ؟؟؟ *المفروض مافي مواضيع مشتركه بيننا *وبالذات في قروبات الحريم يا والينا *بت الاساس ما ممكن تتلمه مع المتزوجات الفينا *والمخطوبات مواضيعن ما بشبهن مواضيع اليادوبن بتاتن يا والينا *والعاقدات ساي ولسه العرس منتظرنو لامن يجينا *اهتماماتن مازي اهتمامات بنات يادوبك السنه ممتحنين لينا *وقروبات البنات يا والينا *عادي الولد ممكن يدخلها بي حساب مسمي روحو امينه *ويطلع علي اسرار نسوان القروب ويتفرج في حنة فلانه ودخاخينا *والغريبه البختن صورهن يا والينا *ماعارفات انو ممكن ختت الصوره دي في داهيه توديهن وتودينا ؟؟؟ *حقوا يا والينا *الناس تعرف تتعامل مع الحاجات دي وتضمن انو القصه في ايدي امينه *وتترك الاسرار الخاصه وبالذات الزوجيه في قلوبها الحنينه *ماتنشرها علينا *القصه دي بتخلي الاسره السعيده حزينه *بتتأطئ جباه وبتكسر العين الفينا *والبنكسر تاني ما بتصلح يا والينا *والخوف السيلفي من الحمام يجينا *ووووووووب علينا سلك كهربا ننساك كيف والكلب في الفيس مابخت صورة الكلبه محننه وقاشره وخالفه كراعها ومارقه ضراعها ولا بنزلها فيديو والي لقاء
