دق الدلجة محمد عبد الماجد الاهلي شندي (الضلفة الفيها الترباس)
* عيونك توزع حلاوة الهداية.. * تقسم مقرر… * مواد المدارس… * كتاب فيه منهج…. * توزع ملابس ..كساوي وحكاوي… * مؤنة فصلنا… * بردنا …وحشدنا… * تصدق هدفنا نشوفك (نعيّد)… * نقابلك (نهيص)… * نجدد هدومنا… * ونوزع فرحنا… * …… * قالوا ليك (مريخابي) ما عندو موضوع. * لا عندو موضوع ..ولا رصيد. * وقع ليه في (بئر). * طلعوه بعد (4) ايام فاقد الذاكرة.. * الذاكرة كتر خيرها رجعت ليه بعد (21) سنة. * اول حاجة سأل منها بعد ان عادت له الذاكرة ..سأل عن (شيبوب). * الوقت داك شيبوب بيكون بقى (مدرب). * قالوا ليه شيبوب هسع في الجهاز الفني بتاع الهلال. * زولكم قال ليهم : يعني الكاردينال عملها…شيبوب رجع من شيبية القيروان. * يا ريت لو (الذاكرة) ما رجعت لي. * يا ريتكم لو ما طلعتوني من (البئر). * كان تخلوني اموت. * مطلعني عشان تقولوا لي شيبوب مشى الهلال ..كان تخلوني في (بئري) ..احسن لي من (نقة) الهلالاب. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * قالوا ليك (مريخابي) صعب. * عينو حارة!!. * المريخابي ..اول مرة يشوف ليه (كديسة) عندها اربعة عيون. * المريخابي اتهجم ..قال ليهم دي شنو دي؟. * قالوا ليه دي كديسة. * قال ليهم كديسة عندها اربعة عيون ..دي كديسة وإلّا بتوجاز!!. * بمناسبة البتوجاز دا. * قالوا زول صعب..بقي يظبط ليك (انبوبة الغاز). * بدل الساعة بيظبط البتوجاز. * قاعد حارس ليك الانبوبة مع (المرا). * كل مرة يرفع ليك انبوبة الغاز ..يشوفها خفت. * الزول الصعب دا – قالوا ليك بعد الزيادات الاخيرة التى حدثت في (الغاز)..شال (البتوجاز) ومشى المنطقة الصناعية ..وقف ليه قدام (معلم كبير) ..وقال ليه عليك الله عاوزك تعمل لي البوتجاز دا (عين) واحدة. * اربعة عيون لي شنو؟. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * بالمناسبة .. * العنوان الخطير بخليك زي الزول الراميهو (القهوة) – رغم انو شرب قهوتو ، وطلع على كدا. * (الضلفة الفيها الترباس) عنوان كتب تحته الكاتب السياسي عبدالله الشيخ ونحن نحفظ حقوقه (الادبية) في العنوان ونعيد انتاج (الحدث). * عشان الامور تبقى واضحة. * انا وقت شفت العنوان دا ..ِشلتو في رأسي ..وبقيت حايم بيه زي (جوز الموية). * طبعا في ناس كتيرة ما بتعرف (جوز الموية). * حدهم (جوز الحمام). * الليلة الهلال ح يلعب مع الاهلي شندي ..وهو فريق ظل يشكل (عقبة) دائمة للهلال. * ربما لأن صلاح ادريس (زرع) فيهم ذلك ..وجعلهم يتوارثون فيهم ذلك (الاحساس). * الاهلي شندي ..نتائجه امام الهلال هي افضل من نتائج المريخ امام الهلال. * عرف الاهلي شندي الانتصار على الهلال في الخرطوم ..كما عرف التعادل معه. * لذلك (الحذر) واجب. * لكن (الحذر) نفسه يجب إلّا يكون حذر (انكماشي) – بحيث علينا ألا نعطي الاهلي شندي اكثر من حجمه. * ما عاوزين الحذر (السلبي). * تغلبوا على احساسكم اولا ..لتتغلبوا على الاهلي شندي. * ما تمنحوا الاهلي شندي ..شعور (الندية)..هو ليس ندا للهلال ..لذلك يجب ان يلعب الهلال امام الاهلي شندي متحرر من اي مخاوف. * ألعبوا كورتكم. * يجب ان لا يعطي الهلال فريق الاهلي شندي مساحة ليتجاوز فيها حدوده. * من كل المعطيات ..والخلفيات ..نقول ان الاهلي شندي يمثل بالنسبة للهلال (الضلفة الفيها الترباس). * شفتوا كيف؟. * العنوان يتناسب تماما مع الاهلي شندي. * وكأن الاستاذ عبدالله الشيخ ابتكر هذا العنوان مخصوصا للاهلي شندي ..ليحترس منه الهلال. * ولنتعامل مع المباراة التعامل الذي يُمكن الهلال من تحقيق انتصار كبير ان شاءالله على الاهلي شندي. * لا شك من ان فريق الاهلي شندي فريق محترم. * وهو اصبح من اندية الممتاز القوية والمعروفة والتى اكتسبت خبرات كبيرة في التمثيل الخارجي والمشاركات الافريقية. * لذلك احترام الاهلي واجب. * احترام دون خوف. * اثق تماما ان الهلال اليوم سوف يقدم مباراة كبيرة ..وسيحقق انتصار كبير ان شاءالله على الاهلي شندي. * ليس في ذلك شك. * واعرف ان (المتعة) اليوم سوف تكون حاضرة اليوم بشكل كبير باستاد الهلال عصرا. * عشان كدا التدفق الجماهيري واجب اليوم. * تعالوا من بدري ..الهلال سوف يكون في الموعد. * شاهدنا يوم بشه. * وشاهدنا يوم كاريكا. * والليلة باذن الله وتوفيقه يوم نزار حامد. * كل الهلال سوف يكون حاضر اليوم عصرا بقوة امام الاهلي شندي. * الاداء الجماعي ..والحضور الجماهيري الكبير ..كلها سوف تشكل (المتعة) في مباراة اليوم. * ما تخلوا الفرصة تفوتكم. * اسألوني من المتعة اليوم. * واسألوني من الاداء الرائع والنتيجة الكبيرة. * اكبر انتصارات الهلال في الممتاز سوف يتحقق اليوم باذن الله وتوفيقه. * نحن بقينا نلعب كورة. * بقى عندنا عناصر (تقيلة). * في لاعبين كبار على مستوى. * اليوم نخطو خطوة حقيقية نحو الدخول للبطولة الافريقية بثقة كبيرة. * سوف نكتسب الثقة من مباراة اليوم. * وسوف نرجع (المتعة) من خلال اداء الهلال في هذا العصر. * هذا لا ينفى قوة الاهلي شندي وامكانياته الكبيرة. * كفي اننا قلنا ان الاهلي يمثل في الممتاز (الضلفة الفيها الترباس). * تجاوز الاهلي ..او الضلفة الفيها الترباس ..يعني الحجز مبكرا على لقب الممتاز. * في الممتاز اي مباراة مهمة. * واي مباراة يجب ان يتعامل معها الهلال على انها مباراة بطولة. * لا تهاون ولا استهتار. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * بتمني اشوف وليد الشعلة وولاءالدين من بداية المباراة. * وان كان صلاح الجزولي سوف يحسم مباراة اليوم. * صلاح الجزولي الليلة ان شاءالله بيسجل. * مع ذلك عاوزين نشوف الشعلة وولاءالدين من بدري. * اعلام المريخ الليلة بكون عشمان. * اعلام المريخ الليلة بكون بيشحن في الاتحاد والحكام. * مكرهم ظاهر. * وحفرهم ..عارفنو. * ما تشتغلوا بالكلام دا. * ما توتروا المباراة. * وما تدخلوها وهناك (ضغط) على اللاعبين. * قادرين على الانتصار. * والانتصار بعدد كبير من الاهداف. * ما في اصلو مشكلة. * الثقة عندنا مدفقة بي هناك. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * ……….. و * الامير مازال يلعب بعقلية الدرجة الاولى. * مع ذلك شكل الامير خطورة كبيرة على المريخ امس. * تراوري ..هو اللاعب الذي تشاهد (نقالتو) اكتر منو. * الزول دا مالو. * بقع براهو كدا. * يكون عاوز ليه قروش. * اكرا نظرية غارزيتو صحيحة فيه. * اكرا ح يعيش ليكم على قونو داك. * الزول دا يشكل خصم كبير على المريخ. * …………….. * السيدة (ل) – العدس لو عندو (نظرية) كان بقى شية جمر. * وقرّط على كدا. *
