العربي الكسيح محمد الطيب الأمين البيلدِ المِحن لابد يلولي صغارن !! * (ثمانية الهلال) في شبكة الامير عايزين منها أتنين بس في شبكة الأهلي طرابلس .. * وسبعة الواحدت الأردني في شبكة المريخ عايزين منها (4) بس في نيجيريا .. * التمانية الأدينها للأمير نتمنى ان يتحقق نصفها فقط في نيجيريا .. * و(تحت تحت) قالوا (وارى ولفز النيجيري) عندو لاعب أسمو (كلتشباية) .. * وكلتشباية علي وزن (شلباية) .. * ويا الله مطرة .. * في الهلال .. أبيكو بيخلي مكسيم ضيف شرف في كل مباراة .. * وفي المريخ .. علي جعفر بيمرمط جمال سالم حتي في تقسيمة التمرين .. * غايتو جنس غايتو !! * قرر الهلال إقامة معسكر قصير بالقاهرة في طريقة عودته من تونس .. * مش ناس الهلال قرروا كده ؟؟ * بكرة ناس المريخ ح يقولوا عايزين يعسكروا في اثيوبيا في طريق عودتهم من نيجيريا .. * والله صحي .. * ديل بيقلدوا الهلال حتي في المعسكرات .. * والله ناس المريخ ديل لو ما شايفنها شينة كان عملوا تمارين الفريق (عصرا) زي الهلال .. * بعد فوز الهلال علي الأمير ب(8) بتوقع إنو المريخ تاني يلعب عصر .. * بتوقع كده .. * واي زول طبعا حر في (توقعاتو) .. * بكرة ناس المريخ ح يزيلوا الأبراج عشان يلعبوا عصرا (تقليدا للهلال) .. * لكن يا شباب سر ال(8) ما في العصر .. * السر في بشة وموكورو وكاريكا .. * يعني بدل (تتلتلوا) وتلعبوا عصر في الشمس دي شوف ليكم (بشة) بس .. * علي فكرة .. * بشة قبل ما يدخل غرفة تسجيلات الهلال كان في غرفة تسجيلات المريخ .. * وناس المريخ (ماطلوهو) في التسجيل .. * قالوا ما عايزنو .. * ولما سألوهم ما عايزنو ليه ؟؟ قالوا بعطش سريع .. * والله صحي .. * بعطش سريع .. يعني ده عيب ولا شنو ؟؟ * ياخ قول بعطش سريع .. الموية دي كمان صعبة ؟؟ * مالو ما يعطش تدوهو موية .. المشكلة وين يعني ؟؟ * قال بعطش سريع قال ؟؟ * أهو وراكم العطش الصحي صحي .. * وأقول ليكم حاجة .. * بعد (5) سنوات المريخ ح يسجل بشة بعطشو ده .. * والله صحي .. * مش قالوا بعطش ؟؟ * شوف لو ما سجلو ما تديني يدك .. * وبمناسبة العطش .. * مرات في فرح (مزيف) بينسيك الحزن .. * وكمان في فرح (مكرر) بينسيك الحزن الجديد أو الحزن المكرر.. * عندك مثلا زي : (الموتور) بتاع المريخ الإتسرق ده .. * سرقة الموتور هي (حزن جديد) .. * قبل كده ما سمعنا إنو (الإصيفر) ده سرقو من موتور .. * ما سمعنا لانو ما عندهم أصلا .. * سرقة الموتور حزن جديد .. * وجمهور (الإصيفر) نسى هذا الحزن الجديد بسبب فرح مكرر .. * الناس ديل لما قالوا ليهم جمال الوالي راجع نسوا اي حاجة .. * نسوا الموتور ونسوا الكمامات ونسوا حتي التلاتة نقاط أمام النسور .. * فرحة ساكت بعودة جمال الوالي خلو (نقطتين) للنسور .. * والله صحي .. * الجماعة ديل تجيب ليهم سيرة الوالي ممكن ينسوا اي حاجة .. * مع إنو جمال الوالي هو مجرد (وسيط) بيشيل من الحكومة وبيصرف علي المريخ .. * يعني حب جمهور المريخ للوالي ده أحق بيهم الحكومة .. * غايتو جنس غايتو !! * المهم .. * غدا بأذن الله تغادر بعثة الهلال .. * والهلال يغادر ونحن في سعادة سببها إنتصاره الأخير علي الأمير .. * وكل المنى ان يعود الهلال من تونس ونحن في ذات السعادة مع إختلاف السبب هذه المرة .. * سعادتنا حاليا محلية .. * والأسبوع القادم نتوق لسعادة أفريقية .. * وكان الله أدانا الفي مرادنا بنسعد مرتين .. * بنفرح مرتين .. * الفرحة الأولي من تونس الأفريقية والفرحة التانية من نيجيريا الأفريقية الأفريقية .. * ويا الله مطرة .. * أظرف حاجة مصعب عمر رفض يسافر مع المريخ .. * قال عندو باقي (قريشات) لو ما استلمها ما بسافر .. * ومصعب عمر ربما لا يدري ان سفره وعدم سفره واحد بالنسبة للمريخ .. * المريخ ما ح يتضرر من عدم سفر مصعب لكن بصراحة الفريق النيجيري ممكن يفقد جهود مصعب .. * مصعب بعدم سفرو خدم المريخ ولم يخدم الفريق النيجيري وعلي إداراة المريخ ان تحفظ لمصعب هذا الموقف الطيب .. * الخدمة القدمها مصعب للمريخ وهو يرفض السفر ما كان سيقدمها حتى ولو سافر .. * ده كلو لخير .. * المهم في الموضوع إنو ترجعوا التلاتة مليار لناس سما ميديا .. * مش قلتوا جمال الوالي راجع راجع ؟؟ * طيب أسامة ونسي ده ما عندو ذنب يفتحو فيهو بلاغ ويدخل السجن .. * إحنا هلالاب وبصراحة ما بنقبل إنو قطب الهلال الكبير اسامة ونسي يتفتح فيهو بلاغ بسبب قروش .. * وبطريقتكم دي والله تاني ما بنديكم رئيس هلالابي .. * إحنا زهجنا زاتنا من حكاية نديكم رئيس ونديكم لاعبين وحتى المشجعين اديناكم ليهم وبعد ده ما فيش فايدة .. * خلاصة الموضوع .. أسامة ونسي هو أخر رئيس هلالابي يحكمكم .. * انا ما عايز اقول ليكم جمال الوالي اخر رئيس هلالابي يحكمكم لانو جمال الوالي لو قفل معاكم ال(20) سنة بنعتبروا مريخابي .. * وبيني بينكم شكلو ح يكمل معاكم العشرين سنة لانو الكاردينال مستحيل يمنح جمال الوالي فرصة يصلح بيها غلطة عمرو .. * مستحيل .. * مبروك عليكم جمال الوالي الشهير ب(عزو) ومبروك ليكم مقدما معاوية فداسي كمان .. * وعلي فكرة .. * شيبوب ح يسجل في خانة فداسي وألوك ح يسجل في خانة الجزولي و(ولدنا الاخر) ح يسجل في الرديف .. * يعني شهر خمسة عندنا أربعة لاعبين بنجيبهم الموضوع انتهي .. * والاربعة ديل تلاتة منهم في المريخ (شيبوب وألوك وولدنا داك) والرابع مهاجم أفريقي (كتال كتله) .. * وإنتو خليكم مع النعسان والبردان والقايم من النوم هسه .. * خليكم مع النعسان ده لحدي ما (الأحلام تشرط عينكم) .. * قلتوا لي بشة مالو ؟؟ * بعطش سريع ؟؟ * خلاص كويس .. * عشان تكونو عارفين من هسه .. بشة الصغير برضو بعطش سريع .. * والثعلب بعطش سريع برضو .. * أما محمد عبد الرحمن من شدة العطش بنربط ليهم (باقة) في كتفو .. * غايتو جنس غايتو ؟؟ * محن .. * والبيلدِ المِحن لابد يلولي صغارن .. * و..و.. * ومن جديد جيت تاني تكسر صمتي ب……(إسكراتش أبو عشرة) !!
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
