بالعربي الكسيح محمد الطيب الأمين البحر واحد والسمك انواع !! * في القرى المُتمدنة (الموية العكرانة) بيرمو فيها (شب) .. * و(الشب) بيروق الموية وبيصفيها وهو أشبه ب(مسكن الأعصاب) .. * والهلال الآن يحتاج لهذا (الشب) إن وجد .. * مجتمع الهلال يحتاج ل(شب) حتى يروق ويصفا .. * الله يصفي نوايانا عشان الهلال ما بحتمل (عكارتنا) .. * بشكل رسمي إعتزلت النجمة (شيرين) الغناء .. * وشيرين لما سألوها عن سبب الإعتزال قالت : (بناتي محتاجات لي) .. * وفي السودان رفع جمال الوالي الإستقالة وقرر العودة .. * والوالي لو سألوه عن سبب العودة ح يقول ليك : (ناس اسامة ومجدي محتاجين لي) .. * أنا عندي إحساس إنو إعتزال شيرين زي إستقالة الوالي .. * والله صحي .. * نتمنى أن تكون شيرين أفضل من الوالي لان بناتها الصغار ما بصبرن علي فارقها لكن اسامة ومجدي ممكن يصبرو علي فراق الوالي .. * والي ب(البا) .. * سعدنا جدا بالأخبار التي تحدثت عن نزول محمد عبد الرحمن لارض الملعب وتألقه في التدريب .. * ودائما اصابات أبوحميد تصيبنا بكثير من الخوف والحزن لانها اصابات عندها علاقة ب(العين) إن لم يكن عندها علاقة بما هو أخطر من العين .. * نتمنى من قلوبنا ان تكون هذه هي الاصابة الأخيرة بالنسبة لحمادة لان الهلال يظل ناقصا في غيابه .. * كما نرجو ان يتم تدريج محمد في المشاركة حتي يدخل الشبكة بسلام .. * قطب المريخ عصام الحاج قال : ( إن شاء الله الريح العالم من بلاتر يريحنا من بلاتراتنا) .. * ونقول لعاصم الحاج : العالم فيهو بلاتر واحد لكن بلدنا دي فيها (25) ألف بلاتر ده غير (البلاترات) الصغار .. * والله صحي .. * بلدنا دي غير البلاترات وزحمة المواصلات ما فيها حاجة .. * المصيبة إنو بلاتر (عندو فهم) .. * لكن بلاتراتنا ديل ما عندهم فهم ومع ذلك هم أخطر من بلاتر زاتو .. * الزول لو عندو فهم وبقى بلاتر ما مشكلة .. * بنتماشه معاهو عشان فهمو .. * لكن كمان يبقو علينا اتنين (عدم فهم وبلاتر) صعبة شوية .. * لم يقدم صلاح الجزولي (السبت) حتي يجد (الأحد) من طارق العشري ولذلك تجاوزه الإختيار للسفر إلي تونس .. * وجمهور الهلال قدم ألف (أربعاء) لصلاح الجزولي ولم نجد منه (الخميس) .. * وبصراحة صلاح الجزولي مع المنتخب كان (أشطر) ولما جا الهلال بقى (أشتر) وبعد ما عضاهو النحل في كادوقلي بقت تصرفات مع (الكورة) غريبة وعجيبة .. * عموما نرجو ان يتأهب ود الجزولي لخوض تجربة بعيدا عن الهلال ولو في قسمة بترجع تاني يا ولدنا .. * الشعب النيجيري بيعرف حاجتين اتنين في السودان .. * الهلال وندي القلعة .. * وبما إنو المريخ ماشي نيجيريا ممكن يقول للنيجيرين : (إحنا من طرف ندي القلعة) .. * طبعا ما ممكن يقولوا (إحنا من طرف الهلال) .. * لازم يقولوا إحنا من طرف ندي .. * بالمناسبة المريخ في نيجيريا ح يواجه فريق بالسوداني يوازي نيل الحصاحيصا .. * والله صحي .. * إذا إفترضنا إنو إنيمبا النيجيري بيوازي الهلال .. * ودولفين بيوازي المريخ .. * الرينجرز بيوازي اهلي شندي .. * يبقي الفريق ده بيوازي نيل الحصاحيصا .. * والفريق ده بالذات ما عايز (لقيمات) .. * واللقيمات شقاوتها شقاوة .. * (الزلابية) كانت مرتاحة مع اسامة ونسي ده لكن مما قالوا الوالي راجع اللقيمات شالت هم .. * وأنا لاحظت حاجة .. * والله يا جماعة لاحظت حاجة لكن ما عارفها جات صدفة ولا هي حاجة مقصودة .. * مما قالوا جمال الوالي الشهير ب(عزو) راجع طوالي ظهرت ازمة رغيف سببها (الدقيق) .. * في بعض احياء الخرطوم قبل يومين كان الرغيف بالصف .. * والحاجة دي ظهرت بعد خبر عودة (عزو) مباشرة .. * يعني (عزو) لو رجع وإستلم الرئاسة تاني إحنا إلا نأكل (كِسرة) .. * غايتو جنس غايتو !! * لا أعرف كيف سمح مجلس الهلال باجازة قصيرة للمدرب طارق العشري تبدأ يوم الجمعة وتنتهي يوم الأثنين .. * الهلال بشكله الراهن محتاج لكل دقيقة ولكل ثانية .. * الهلال (ما كويس) وطارق العشري لسه ما اكمل الأسبوعين ، يعنى ما في سبب منطقي بيخليهو يسافر يوم الجمعة ويقعد في مصر ثلاث ايام حتى يقابل الهلال في مطار القاهرة .. * ده كلام ني .. * والني للنار .. * الهلال سيلعب غدا أمام الأمير .. * وهي مباراة لا يتوقع لها ان تكون قوية ولا مثيرة من واقع مستوى الأمير الذي هو ليس ندا للهلال .. * ورغم ان هذه المباراة هي من المباريات السهلة إلا ان طارق العشري منح اللاعبين راحة يومي السبت والأحد .. * اداهم إجازة عشان هو يسافر !! * نحن لا نتدخل في عمل الجهاز الفني ولا نريد (التنظير) ولكن بصراحة سفر العشري في الوقت ده ما منطقي .. * العشري كان يفترض ان يكون أكثر حرصا علي التواجد لان مباراة الاهلي الليبي تبقت لها أيام .. * حكاية إنو ماشي ينسق لمباراة ودية ده كلام ميت .. * التنسيق ما محتاج ثلاث أيام .. * هو داير ينسق ولا عايز يخطب أصلو ؟؟ * مثل هذا التهاون سيدفع ثمنه الهلال باهظا .. * المهم .. * حتى مباراة النسور الأخيرة الهلال غير جاهز لا فنيا ولا بدنيا .. * وهنالك (حشو) في التشكيلة .. * وإذا لم يحدث التصحيح (الفأس ح يقع في الرأس) لا محال .. * وربنا يكضب الشينة .. * الإتحاد العام إستعجل حسم شكوى الفرق الطاعنة في عدم قانونية مشاركة النعسان عشان يقنع باقي الفرق بعدم جدوى الشكاوي لاحقا .. * والله صحي .. * الإتحاد ما من عوايدو حسم الشكاوى بهذه السرعة .. * ولكنه إستعجل حتي يقفل الباب أمام باقي الفرق .. * حسم الشكوى رغم مستندات (الباوقة) التي هي بطرف الأمل .. * عموما نقول للفرق : المريخ ما بشتكو للإتحاد العام لان الإتحاد هو القاضي والمحامي .. * المريخ ده نشكيهو لرب الكون الفي العيون أبدع .. * حاجة تكسف .. * زمان عندما كنا صغار لما تأكل (المُر) بعد (الحلو) بيقولوا ليك (أقلب هوبا) عشان المُر يمشي تحت والحلو يبقى فوق .. * لانو في العادة الزول بيأكل (الطبيخ) بعد داك بضرب (التحلية) .. * لما اتذكر الحاجة دي طوالي بتذكر عمر بخيت والمعز محجوب .. * بتذكرهما طوالي .. * واي زول طبعا حر في (تذكاراتو) .. * معقولة يا كباتن في زول بعد (الكاستر الأزرق) بيمشي يضرب (أم رقيقة حمرا) .. * وكلام يا عوض دكام !! * و..و.. *والبحر واحد والسمك أنواع !!
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
