بالعربي الكسيح محمد الطيب الأمين ( بسمة ) صارة وشها ال (24 ) ساعة… !! في علم الهندسة (العالي واطي ) عندو علاقة ب ( سطح الأرض ) .. الظلط لو بقى فيهو ( عالي واطي ) بتكون الأرض غير مستوية أو التربة غير ثابتة أو هنالك خلل في (مواد الظلط ) .. في السودان (الأرض ثابتة ) و (التربة ) ما فيها مشكلة ومع ذلك الظلط عندنا لو عملوهو الليلة بعد شهرين ببقى زي ( طبق البيض ) .. ومرات طبق البيض أفضل .. والله صحي .. والهلال هذا العام يعاني من عيب يجعل مستواه ( عالي واطي ) حتى أثناء المباراة الواحدة .. الهلال أمس أمام هلال الفاشر كان ( جيدًا ) خاصة في النصف الثاني من الشوط الثاني والهلال في المباراة السابقة كان (مش ولابد ) وفي المباراة القادمة سيكون (مش ) وفي المباراة بعد القادمة سيكون ( لابد ) والمباراة التى تعقبها سيكون (كويس ) .. هذا (العالي واطي ) عندو علاقة بالأرضية داخل الهلال ولا نقصد أرضية الملعب يا الكاردينال .. مقصود بالأرضية (البيئة ) أو ( تربة العلاقات والمعاملة ) .. وإذا فسدت التربة فسد المحصول بالضرورة .. ورد في الأخبار أن حكم مباراة المريخ ووفاق سطيف قام بعملية تسوق داخل ( مول عفراء ) .. الأخبار أكدت أن حكم اللقاء تسوق في محلات (الهواتف الذكية ) داخل المول .. الراجل بتسوق وأمير كمال بتفرج على الهجوم الجزائري .. الحكم اتسوق في المول ونجم الوفاق ( داقلو ) اتسوق داخل دفاعات المريخ .. كلو في النهاية تسوق .. المهم .. من حق الحكم أن يتسوق طالما (نثريته معدلة ) .. وهذه فرصة طيبة نشكر من خلالها (الكاف ) الذي قام بتحسين نثريات الحكام حتى يتسوقوا في البلدان الأفريقية المتعددة .. التسوق ما كعب .. لكن كعبة ( الهدايا ) .. هدايا ب ( الغاء ) .. في كثير من الأحيان جمهور الهلال يصفق للاعبين في حالة الخسارة إذا كان الفريق قد قدم المستوى المطلوب .. وفي كثير من الأحيان يصفق جمهور الهلال للخصم حتى عندما يكون الهلال منتصرًا .. ورغم قناعتنا بأن كرة القدم أهداف إلا أن هذا لا ينفي أن جمهور الهلال يبحث عن العرض مثلما يبحث عن النتيجة .. عندنا إحنا العرض لا يقل عن النتيجة والنتيجة لا تقل عن العرض .. الهلال حينما ينزل أرض الملعب يجب أن ينهزم الخصم أولاً من شخصية الهلال ثم ينهزم ثانيا بالعرض والنتيجة .. وقياس الهلال لا يتم أمام هلال الفاشر بل نحن نقيس الهلال أمام الفرق الكبير مع أكيد احترامنا لفريق الخيالة .. نتمنى أن يواصل الهلال في مبارياته القادمة من حيث انتهى بالأمس نبدأ المباريات الجاية من آخر ربع ساعة قدمها الفريق في مباراة الأمس .. وللمرة الألف يحرج ايشيا طارق العشري .. وطارق العشري من شدة الإحراج بقى قدامنا أصغر من (السمسمية ) .. المهم .. في العامية السودانية بيقولوا ليك : (اسم على مسمى ) .. مثلاً زول يكون اسمو ( عبد الكريم ) .. وعبد الكريم ده يكون ( كريم جداً ) .. لو عبد الكريم بقى كريم الناس بيقولوا : ( الزول ده اسم على مسمى ) .. والمعنى إنو الاسم طابق الفعل والعمل .. ومرات بيحصل العكس زول يكون اسمو ( الطيب ) وتلقاهو ما (طيب ) وزولة يكون اسمها ( بسمة ) وتلقاها ال (24 ) صارة وشها .. المهم .. وفاق سطيف عندو لاعب اسمو (جابو ) ومع ذلك ناس المريخ لم يراقبوا ( جابو ) .. ( جابو ) ده اسم على مسمى .. عشان كده (جابو جاب القون ) .. الاسم عندو (مدلول ) .. ومن العبط إنو يكون في لاعب اسمو (جابو ) ولا يجد الرقابة المطلوبة .. هسه لو اللاعب ده اسمو شلباية ولا اسمو ساماتا كان بنلقى ليكم العذر .. بنلقى ليكم العذر لأنو اسم شلباية ما فيهو شي يدل على إنو ممكن يجيب قون .. لكن ده لاعب اسمو طابق عملو .. اسمو (جابو ) عدييييييل كده .. كده افرض إنو في لاعب اسمو (شوت ) .. لو قابلك لاعب اسمو (شوت ) أول حاجة بتعلمها بضيق ليهو المساحات .. عشان ما يشوت .. لكن معليش .. برلوم الأبطال تتوقع منو كل حاجة .. الأبطال عندها ناس و ( الجماعة ) عندهم دوراتهم .. والسنة دي يا متنا من الضحك يا كمان الضحك كتلنا .. ظهرت خطورة محمد عبد الرحمن بعد مشاركة كاريكا .. وهذا يعني أن ميدو وولاء الدين غير متفاهمين أو بالأصح مشاركتهما في تشكيلة واحدة قد تضعف الهجوم .. تشابه الإستايل عند ميدو وولاء هو الذي يربك الهجوم .. يبقى من الأفضل أن يحدث التباين لأن هجوم الهلال في كل الأحوال لا يحتاج لعوامل إضعاف إضافية .. أما بالنسبة لكاريكا فياريت والله ما يقدمه كاريكا أمام هلال الفاشر وأهلي مدني ومريخ نيالا يقدمه أيضاً في المباريات الكبيرة .. لا أحد يشك في مقدرات كاريكا وتاريخه المشرف مع الهلال ولكن الحقيقة تقول إن مدثر أصبح لا يعرف التألق إلا أمام الفرق ( الأقل نمواً ) .. نحتاج لكاريكا في المباريات التى لا يحلنا منها إلا أمثال كاريكا .. كثير من المباريات تحتاج لإمكانيات وخبرات تضاهي ما يملك كاريكا ولكنه يتواضع وحينما نلاعب الفرق الضعيفة فنياً يتألق كاريكا وهذا لا يسعدنا دون شك .. الكبير يجب أن يكون كبيراً في كل الأحوال .. وقد ثبت أبوعاقلة أنه كبير بالهدف الذي سجله أمس .. أبوعاقلة سجل هدفاً غاية في الروعة والجمال .. هدف من شاب صغير ولكن يحسب من الأهداف التي لا يسجلها إلا الكبار حقاً .. وقد جدد فينا هدف أبوعاقلة ذكرى النجم مهند الطاهر وما أدراك ما مهند الطاهر .. لو فعَّل الهلال سلاح الحلول الفردية على نحو ما فعله أبوعاقلة بالأمس لن تكون هنالك معاناة بإذن الله .. المعاناة ستكون في الجزائر يا مولانا .. سيحتفل الشعب الجزائري بالشهيد رقم (1 ) بعد المليون .. وبعدها سيهبط ( الحمام ) للكونفدرالية التي ستكون مجرد (محطة ) يسقط منها ( الحمام ) لسيكافا على أن ينتهي به المطاف بطلاً لكأس السودان .. أفضل استقبال لجمال الوالي من لعيبة المريخ هو ( مشاركتهم في سيكافا ) .. وأنا عندي إحساس إنو عودة جمال الوالي المنتظرة ستتزامن مع مشاركة المريخ في سيكافا بعد هبوطه من البطولتين .. عندي إحساس كده .. وأي زول طبعاً حر في ( محاسيسو ) .. جمال الوالي لو جا وما لقى المريخ في سيكافا بيحس إنو في حاجة ناقصة .. الزول ده عندو غرام عجيب من سيكافا .. غايتو جنس غايتو !! و ..و .. و ( جابو ) إنتو نيابه عني حد قدر ينسى نفسو ؟
