بالعربي الكسيح محمد الطيب الأمين عشان بيلاتشي يثبت في الهلال إلا نعمل ليهو (صباع أمير) !! * أكثر ثلاث عبارات ستكون متداولة اليوم وسط جمهور المريخ هي : (نهواه في كل الظروف) و (المريخ طار مرفوع الرأس) و(المريخ ما زال في التنافس الأفريقي) .. * ولكن الحقيقة التي لا تقبل الجدال هي : (المريخ طار أمام فريق ترتيبه في الدوري يضاهي ترتيب النسور عندنا) .. * في كل عام المريخ بيشارك في الأبطال (صحبة راكب) عشان يطير بينما (الراكب) يواصل المسير .. * وفي هذا العام (الراكب) الذي هو الهلال طار فكان من الطبيعي ان يلحق به (الصاحب) .. * عموما .. نبارك للشعب الجزائري الشقيق هذا التأهل رغم ظروف فريقهم (التعبان) ونعلم ان الوفاق لو كان في يومه لجدد لنا ذكريات الحبيب إلي قلوبنا الأخ الفاضل (شلباية يوسف شلبياية) .. * غايتو جنس غايتو !! * هيثم مصطفي في تاريخه الذي إمتد ل(17) عاما مع الهلال أشرف علي تدريبه حوالي (12) مدربا .. * وصهيب الثعلب في تاريخه مع الهلال والذي إمتد ل(17) شهرا أشرف علي تدريبه حوالي (19) مدربا .. * عدد المدربين في سبعة أشهر يتفوق علي عدد المدربين في (17) سنة .. * وبما أن ذلك كذلك يبقي من باب الإحتياط لازم نشوف (صباع أمير) للمدرب الروماني بيلاتشي .. *والله صحي .. * بيلاتشي ده لو دايرنو (يثبت) في الهلال إلا تعملوا ليهو (صباع أمير) .. * (صباع أمير) أو (نوكرين) .. * حاجة تكسف .. * ونحن في قمة الإنفعال مع الأحداث الهلالية الساخنة يضحكنا أبو جريشة كثيرا .. * أبوجريشة في شكوى تقدم بها لمراقب المباراة قال فيها : (إذا قامت جماهير الوفاق بإطلاق شمروخ واحد سننسحب من الملعب) .. * شمروخ دي حلوة علي بالقسم .. * حلوة منك .. * قال بينسحب قال .. * انت مش بتنسحب من الملعب انت بتسقط من الأبطال يا مولانا .. * ناس المريخ فاكرين الأبطال زي سيكافا وزي البطولات الوهمية البينظمها جمال الوالي .. * فاكرين الأبطال زي حوض النيل .. * ومعذورين طبعا .. * معذورين لانو سيكافا خربت طبعهم .. * الأبطال أصلا هي بطولة أكبر قامة من المريخ .. * الظروف هي التي جعلت المريخ (يمد كراعو أطول من لحافو) والغلط ما غلط المريخ الشارك في الابطال الغلط غلط الظروف التى اتاحت للمريخ المشاركة في بطولة كبيرة زي دي .. * قالوا مراقب المباراة لما قرأ الشكوى أخد ليهو ضحكة لما عيونو دمعت .. * لكن المراقب إتعامل مع الشكوى باعتبارها شكوى جاية من فريق (برلوم) .. * إتعامل معاهو حسب فهمهم .. * انت يا أبوجريشة من حقك تطالب بتحكيم محايد ومن حقك تطالب بتأمين وحماية لافراد البعثة لكن ما من حقك تهدد بالانسحاب .. * بعدين ياخ الشعب الجزائري ده بيحبنا وإحنا بنحبو وبراكم بشلاليت ناس علاء الدين يوسف خربتوا علاقتنا مع الجماعة ديل .. * وفي النهاية ياهو طرتو.. * يعني ما كان في داعي للمساخة و(خراب الوش) .. * طيران المريخ ما عايز شماريخ .. * الشماريخ الفي دفاع المريخ أعب من شماريخ المدرجات .. * والله صحي .. * المهم .. * إحترام مدينة عطبرة للهلال لم يأتي من فراغ .. * وإحترام عطبرة للهلال أيضا له أسبابه .. * عطبرة بتشبه الهلال والهلال بيشبه عطبرة .. * وللهلال ولعطبرة مواقف للتاريخ كلٍ في مجاله .. * ولذلك عطبرة سعيدة ومحظوظة باحتضان الهلال لاسبوع كامل .. * طبعا يا جماعة ده لو كان المريخ ما بقدر يقعد في عطبرة أسبوع .. * والله صحي .. * وبراكم ح تشوفوا المريخ لما يمشي عطبرة .. * ح يلعب المباراة الأولي وح يجي يعسكر في الدامر علي ان يعود بعد ثلاث ايام لعطبرة مجددا .. * ناس عطبرة ما بيحبوا المريخ .. * ودجي حاجة من الله .. * قسمتكم كده .. * وقسمة الزول ما بتفوتو .. * وفي النهاية العارف عزو مستريح .. * عزو ب(الخا) .. *إنفعال جمهور الهلال وتجاوبه الكبير مع قضية اللاعب عبد اللطيف بوي بالأمس يؤكد ان لهذا النجم محبة كبيرة في قلوب الجمهور العاشق لهذا الكيان .. * جمهور الهلال يحفظ لبوي كل تضحياته ومواقفه الكبيرة مع الهلال .. * وبالمناسبة .. ما سردناه بالأمس مصدره ليس عبد اللطيف بوي .. والله علي ما أقول شهيد .. * وقبل بوي كنا قد تحدثنا عن مسكيم وقد كذبنا البعض ومع الأيام ثبت ان مكسيم يعاني من مشاكل ولم يزل .. * قلتها من قبل وأرددها اليوم : (الكاردينال يعاني من عدم توفيق عجيب يجعله يدهس كل الإشراقات دون مبرر) .. * وأقسم بالله أنا لا أخاف من شئ بقدر خوفي من ان تسقط الجوهرة فوق رؤوس الجماهير .. * عدم التوفيق الذي يصاحب مسيرة الكاردينال يحتاج لوقفة من الكاردينال ويحتاج منه ان يراجع مصدر واسباب عدم التوفيق لان بعض الاسباب هذه عندها علاقة بالنية والنفس والشلة والمقصد .. *قالوان ان مدرب الهلال الروماني قد طلب من مجلس الإدارة كتابة السيرة الزاتية لكل لاعب .. * ونحن نقول للكوتش : يا كوتش السيرة الزاتية بتاعت اللاعبين هينة كده انت شوف السيرة الزاتية بتاعت اعضاء مجلس الإدارة وتحديدا السيرة الزاتية بتاعت محمد عبد الليف هارون .. * إذا اراد الكاردينال إستمرار المدرب الروماني عليه أولا إقالة محمد عبد اللطيف هارون .. * بالنسبة لينا محمد عبد اللطيف هارون مكشوف وجا العشري وكشفوا زيادة .. * وزي ما العشري (كيسو فاضي) برضو محمد عبد اللطيف (كيسو فاضي) .. * ولا كمان حكاية الأكياس الفاضية دي حصرية علي المدربين ؟؟ * غايتو جنس غايتو .. * بالمنطق كده ما ممكن الهلال يطير والمريخ يستمر .. * لكن بالمنطق ممكن المريخ يطير والهلال يستمر زي ما قاعد يحصل كل سنة .. * وطيران المريخ بالأمس هو (العادي) وتأهله لا قدر الله كان سيكون أمرا غير عاديا .. * كده يا حبايب باقي ليكم مباراتين في الكونفدرالية وبعد داك كل زول يشوف سيكافتو وين .. * مباراتين أتنين في الكونفدرالية تعالوا بعدها نظموا لينا سيكافا زي كل سنة .. * في مريخابي قال لي المريخ طار بشرف .. * شرف منو ؟؟ * شرف شيبوب ؟؟ * قال شرف قال ؟؟ * المريخ ما طار بشرف والمريخ طار ب(عبد المنعم جابو) .. * والله صحي .. * جابو لما جاب القون هنا المريخ طار .. * وبصراحة وفاق سطيف أمبارح فقد جهود أمير كمال .. * أمير كمال بالنسبة لوفاق سطيف لا يقل عن عبد المنعم جابو .. * عبد المنعم بيجيب قون وأمير كمال بيجب قون .. * وكلام يا عوض دكام .. * و..و.. * ومنايا ليك ما وقف وإتمنيت أنا …(تقابل مازيمبي في الكونفدرالية) ..
