بالعربي الكسيح محمد الطيب الأمين الكلام ده عيب والله !! * مثل (الشعرة من العجين خرج الهلال من عطبرة سالماً وغانماً) .. * كنا نظن ان خروج الهلال من عطبرة غانماً هو أشبه بخروج (الحِنة من ضفر العروس) ولكنها قوة الإرادة .. * وتبقي هذه اغلي ست نقاط لانها جاءت في وقت سماء الهلال فيه مُلبدة بكثير من الغيم .. * نبارك لنجوم الهلال هذه (الرجاله) ونبارك لجمهور عطبرة هذا (الأدب) و(الذوق) .. * عطبرة لا تعرف (البُمبان) في حضرة الهلال .. * قال ليك الناس في عطبرة أول ما يعرفوا المريخ جاي عطبرة طوالي بيجيبوا (صفق شجر النيم) عشان يخفف عليهم (البُمبان) .. * والله صحي .. * البُمبان عشان ما يأثر معاك لازم تعمل صفق النيم في وشك .. * وإحنا علي بالنعمة عارفين أي حاجة .. * عارفين البُمبان وعارفين المريخ قبل ما يسمو مريخ كان إسمو (نجمة فتكوريا) .. * إسمو نجمة فكتوريا وبيدلعوا يقول عليهو (المريخ) .. * يعني المريخ هو لقب وليس إسم .. * زي عندك مثلا (الثعلب) ده .. * الثعلب إسمو (صهيب) لكن لقبو هو (الثعلب) .. * ومثلا عندك (شيبوب) .. شيبوب إسمو شرف لكن لقبو هو (عبرت) .. * وعلاء الدين إسمو علاء الدين لكن لقبو (بصمة) .. * جمال الوالي إسمو جمال الوالي لكن أولاد حلتنا بيقولوا عليهو (عزو) .. * نفس الفهم .. المريخ إسمو نجمة فكتوريا لكن لقبو هو (المريخ) .. * يعني انا عايزك تفهم حاجة واحدة إنو الفريق ده إسمو نجمة فكتوريا ولقبو المريخ وتحت تحت بيقولوا عليهو (الضل) .. * غايتو جنس غايتو !! * الذكرى في العادة هي أطول من العمر سوى كانت ذكري جميلة أو عكس ذلك .. * واسوأ ذكرى يحمل إنسان عن السودان هي ذكرى النجم المهذب سيسيه .. * سيسيه يعيش واقعا تعيسا منذ شطبه من الهلال وحتي تاريخ اللحظة .. * سيسيه شطبه الهلال ولم يمنحه حقه وظل يطارد (إداريين الغفلة) بالهلال عبر الهاتف ولا يردون علي مكالماته وهذا لعمري أمر مؤسف ولا يشبه الهلال .. * الكلام ده عيب يا الكاردينال .. والله عيب .. * عيب سيسيه يأكل من جيبه الخاص وحقوقه بطرف الهلال وجوازه بطرف الهلال .. * عيب والله يا الفاضل .. * الحاجة دي لا بتشبه الهلال ولا بتشبه القيم والأخلاق السودانية .. * ياخ انت شطبتو يفترض تديهو حقو زي ما اديت ناس مكورو والباقين .. * بالجد الكلام ده شين في حق الهلال والله العظيم .. * سأعود لهذا الموضوع غدا ولكن أتمنى ان تحل مشكلة اللاعب اليوم لانها حتى ليلة أمس لم تحل .. * نرجع ونقول .. * لو لم يكون يونس الطيب واثقاً من نفسه وإمكانياته لما تمكن من المحافظة علي شباكه نظيفة في أربع مباريات .. * أربع مباريات إهتزت شباكه مرة وحيدة وهو رقم يمكن ان نعتبره إنجازاً بالنسبة للاعب ظل حبيساً في الكنبة لأكثر من عامين .. * بعد هذا المستوى الطيب ليونس الطيب لا خوف علي مرمى الهلال فقط نرجو ان نشاهد إعتباراً من المباراة القادمة الحارس العملاق مكسيم .. * أنا أخشي ان يصبح مكسيم معانا بجسمه بينما قلبه بعيد بسبب سوء المعاملة .. * كل المطلوب إحسان التعامل مع هذا النجم الكبير فهو من النادرين جدا في افريقيا من حيث المردود الفني ومن حيث الأخلاق .. * بمناسبة الاخلاق .. * لحدي الآن الهلال قاعد يلعب بثعلب واحد .. * الثعلب التاني (بشة الصغير) قاعد في الكنبة .. * يعني تشكيلة الهلال لو بقت فيها (ثعلبين) القصة بتبقي ما أخلاقية .. * بتبقي ما إنسانية .. * نلعب بثعلب واحد والثعلب التاني بنخليهو لليوم الاسود .. * وفي الحقيقة هم ما ثعلبين بل هم مجموعة ثعالب .. * الرديف بتاعنا كلو ثعالب .. * ورغم (الظلام) الذي إجتاح ديار الهلال في أعقاب السقوط من الأبطال إلا ان القادم بأذن الله سيكون أحلي .. * الهلال عندو (بذرة صالحة) فقط يحتاج لتربة نظيفة .. * والتربة ح تنضف لو الكاردينال سمع (الكلام الببكي) وقفل أضانو من (الكلام البضحك) .. * الشباب الفي الهلال لا مثيل لهم في السودان .. * (العشري الكيسو الفاضي) قال : لا يوجد فريق في افريقيا يملك مثل الشباب الذين يملكهم الهلال .. * العشري قال ذلك وهو (زعلان وهارب) .. * يعني قال الكلام ده بعد ما هرب من الهلال .. * وما قاله حقيقة ستظهر مع الأيام ، اللهم إلا إذا الكاردينال عكس ذلك .. * والله يا جماعة أنا هروب العشري ده مزعلني من جووووووة .. * عليك الله زول (متواضع) زي ده يهرب مننا ؟؟ * ده الزول الوحيد الكان المفروض تتم إقالته قبل شهر .. * زول زي ده ما كان نديهو شرف (الإستقالة) .. * ده نديهو (إهانة الإقالة) لانو بيستاهل .. * المهم .. * مازيمبي ثقيل ثقالة شديدة .. * قول لي كيف ؟؟ * والله صحي .. * مازيمبي عرف إنو المريخ هبط الكونفدرالية قام هو زاتو هبط .. * ودي زي الزول لما يكون داير معاك مشكلة ، يشوفك نزلت من حافلة المواصلات هو زاتو ينزل معاك .. * هسه مازيمبي شاف ناس المريخ نزلوا من الحافلة هو زاتو نزل معاهم .. * وبصراحة المريخ دخل في حتة ضيقة .. * المريخ لا عرف يستمر في بطولة الأبطال ولا هسه قادر يستحمل فكرة الكونفدرالية الفيها مازيمبي .. * وفي النهاية سينتهي المطاف بالمريخ في سيكافا .. * وسيكافا لو شارك فيها الهلال بالرديف يبقي المريخ إلا ينظم ليهو بطولة زي بتاعت (حوض النيل) ديك .. * أنا البيعجبني في ناس المريخ إنهم ناس (منظمين) وبيحبوا التنظيم .. * يطلعوا من الكونفدرالية بينظموا سيكافا ، يطلعوا من سيكافا بينظموا (حوض النيل) ، يطلعوا من حوض النيل بينظموا (حوض البط) .. * ده نادي منظم وإستادو (حكومي) .. * ده نادي (لوحتو صفراء) يا مولانا .. * ده نادي طلع من الأبطال مرفوع الرأس .. * قال المريخ يودع الأبطال مرفوع الرأس .. * طيب والهلال لما ودع الابطال كان خسران بالسبعة ولا شنو ؟؟ * لما طلع من الأبطال نا غالبين ولا كنا مغلوبين بسبعة شلبياية ؟؟ * بعدين حكاية مرفوع الرأس دي ما بتشفع ليكم .. * إنتو شاركتوا من أجل رفع الرأس ولا شاركتوا من أجل الإستمرار في البطولة ؟؟ * قصة مرفوع الرأس دي بنعرفها لما تقابلوا مازيمبي .. * لما تقابلوا (الخال) بنعرف رأسكم مرفوع ولا ما عندكم رأس .. * وطبعا إحنا الفريق المغربي ده ما بنحسبوا .. * فريق (البراقش) ده ما محسوب .. * فريق متزيل الدوري المغربي وبيلعب بدون (كنبة إحتياطي) .. * عندهم حداشر لاعب وبس .. * عشان كده قلنا الأبطال زادها موية .. * والله يا جماعة وأنا ما بقول الكلام ده عشان الهلال طار لكن بالجد الأبطال مما بقي يشارك فيها المريخ زادوها موية .. * بطولة يشارك فيها المريخ دي بطولة (رخيصة) ساكت .. * البطولة دي ما بتشبه المريخ ولا جاية معاهو عشان كده كان من الطبيعي ان يغادر أمام الوفاق (الضعيف) .. * مرات الكلمة الشاذة بتتعرف من الوهلة الاولي .. * والمريخ في الأبطال كان كلمة شاذة .. * والحمدلله وفاق سطيف طلع الكلمة الشاذة .. * وعقبال (براقش السجمان) يطلع لينا الكلمة الشاذة من الكونفدرالية كمان .. * و..و.. * وأنا في شخصك بحترم …(الثعلب) ..