بالعربي الكسيح محمد الطيب الأمين أصلو الحزن بيجيك عديل والفرحة دايرة معافرة !! * في علم الفلسفة .. العقوبة مرات بتكون أخف ضررا من عدم العقوبة .. * عدم العقوبة في أحيان كثيرة هو نفسه عقوبة .. * ولعل الشاعر الجميل عبد الوهاب هلاوي كان ذكيا حينما كتب : (وعدم الملام هو كمان ملام يا سلام عليك ياسلام) .. * عند هلاوي (عدم الملام هو ملام) .. * ووفقا لهذه النظرية إحنا وأولاد حلتنا نرى أن أفضل عقوبة يمكن ان يصدرها (الكاف) بحق المريخ هى (عدم حرمان المريخ من المشاركة في الأبطال) .. * والله صحي .. * دى أنسب عقوبة .. * زي المريخ ده تعاقبوا بالمشاركة عشان يتمرمط .. * المريخ لو عاقبو بعدم المشاركة بيكونو ريحو .. * بمناسبة ريحو دي .. *واحدة من أكبر محفزات المشاكل هى (الشبع) .. * وأهلنا بيقولوا : (الشبع بيعلم الدواس) .. * الزول لو جيعان ما بشاكل .. * لكن أول ما يشبع بيعمل مشكلة .. * لما كنا في المعسكر العساكر طبقوا فينا شعار : (المستجد لو ريحتو بيتعبك) .. * عشان كده تعبونا وإرتاحوا هم .. * وأنا شخصيا أرى أن سبب (الدواس) الذي فعله المريخ بالمغرب سببه (النفرة) .. * الناس ديل شبعوا من (النفرة) وأصبحوا بتوعين مشاكل .. * عشان كده أفضل وسيلة لترويض المريخ هى (الجوع) .. * المريخ ده تجوعو وتلزمو بالمشاركة وتقعد تتفرج عليهو .. * تتفرج بس .. * يا مت من الضحك ويا كمان الضحك كتلك .. * غايتو جنس غايتو !! * منح الهلال اللاعب ايشيا (قميصا) هدية للذكرى .. * وايشيا غادر قبل ان يترك لنا ذكرى .. * ايشيا ح يتذكرنا ب(القميص) وإحنا ح نتذكروا ب(الكنبة) .. * ورد في الأخبار أن إحدي الشركات قامت أمس الأول بابادة (380) (كديسة) بمستشفي مدينة مدني .. * سبب الأبادة إنو (الكدايس) دي بتنقل الأمراض وبتتحرش بالأطفال حديثي الولادة فضلا عن إنها بتسرق (الأكل الخاص بالمريض والأكل الخاص بالمرافق) .. * يعني الكدايس دي بتأكل أكل الزول العيان وأكل الزول المرافق للزول العيان .. * الخبر ده بيذكرني محترف المريخ كريم الحسن الذي تعاقد معه (الإصيفر) قبل ستة شهور فكان أن إكتفى بالأكل دون أن يلعب أكثر من ربع ساعة .. * يأكل ويشرب وينوم تحت المكيف .. * يأكل أكلو وأكل غيرو .. * قالوا كريم الحسن بعد ما يكمل (صحنو) بيشوف (صحن) لاعب من اللاعبين المشاركين في التشكيلة .. * عشان كده هنالك تباين في اللياقة البدنية بالنسبة للعيبة المريخ .. * عموما .. أي شاب أفريقي زهجان من العاطلة في بلدو ممكن عن طريق سمسار يجي يلقى شغل في المريخ .. * شغل ب(القاء) .. * قاهر المريخ الكوكب المراكشي تبقت له جولة واحدة ويهبط رسميا لدوري الأولى المغربي .. * الكوكب ده زي الزول البيكون في إمتحان الشهادة السودانية جايب (81%) لكن (قادي عربي) .. * والله صحي .. * فريق في بلدو هابط وفي افريقيا صاعد .. * وهذا إن دل إنما يدل على ضعف المنافس .. * المنافس لو ما ضعيف فريق زي ده على بالقسم ما بيصل المجموعات .. * الكوكب قام من نومو ولقى كوم .. * وتبكو بس .. عين قطرة وعين مس .. * من الآن نجم الدورة الثانية للممتاز سيكون (شيخ موكورو) .. * موكورو غادر الهلال في لحظة إنفعال من الكاردينال .. * والعزاء الوحيد ان شيخ موكورو غادر الهلال وعاد للهلال .. * ننتظر (دويتو من المتعة) يجمع الغزال بالشيخ في عروس الرمال .. * لو جمع مدرب المريخ ألوك (أولاد من حلتنا) وقال لهم : (أبوي مات ولازم نغلب عشان نهدى له الفوز) لو قال لهم ذلك لحققوا الإنتصار .. * ما في أصعب من إنو زول يقول ليك اعمل لي كده عشان أنا أبوي مات .. * إتخيل .. ألوك جمع لعيبة المريخ وتحدث معهم في المحاضرة التى سبقت مباراة المراكش بساعتين .. * قال ليهم : أبوي مات فيجب ان نقدم النصر اليوم هدية لروحه .. * مسكين قال ليهم كده وما عارف إنو (المتوفي فقد روحو) .. * ألوك كان يحب والده كثيرا .. * ووالد ألوك ظل ملتزما بمصروف إبنه حتى آخر لحظة .. * كل آخر شهر كان ألوك يذهب إلى (الصرافة) ليستلم (حواله مرسلة من والده حتى يدفع حق إيجار الفندق) .. * قروش الفندق كانت بتصل لألوك من ناس البيت .. * والبلجيكي لما قال للاعبين كده توقع أن يقفوا معه تقديرا لوالده الذي دعم المريخ ماليا وبطريقة غير مباشرة .. * ولكن لا حياة لمن تنادي .. * الراجل مات والمريخ طار وألوك كمان طار .. * ويجي بكري المدينة يتفاصح ليك .. * يقول ليك : البلجيكي مدر ب فاشل .. * عليك الله يا بكوري فاشل المدرب ولا فاشلين (الدقوا الحكم والصحفيين) ؟؟ * حاجة تكسف .. * حدد مدرب الهلال بيلاتشي ثلاث مباريات قبل إنطلاقة الدورى .. * المباراة الأولى ستكون مع سانت جورج الأثيوبي الخميس القادم .. * وأنا أقترح أن تكون المباراة الثانية مع الكوكب المراكشي .. * بقترح كده .. * وأى زول طبعا حر في (إقتراحاتو) .. * الهلال يمكن ان يلعب دورا في تحسين علاقتنا الرياضية مع المغاربة بعد ان خربها (الضل) .. * نلعب وديا مع الكوكب ونكرم الصحفيين الذين تم الإعتداء عليهم .. * شكلو كده لعيبة المريخ ديل بيحضروا مصارعة كتير .. * والله صحي .. * أى زول بيحضر حاجة كتير بيحاول يطبقها على أرض الواقع .. * هسه النسوان الواحدة لما تجي تقابلها بعد المسلسل التركي مباشرة بتلقاها (راقية جدا) .. * ولو قابلتها قبل المسلسل بتكون ما راقية .. * بتتأثر ب(المشاهدة) مباشرة .. * نفس الشي لعيبة المريخ .. * أنا عندي إحساس إنو لعيبة المريخ قبل التحرك إلى الإستاد كانوا بيحضروا في مصارعة أو فيلم أكشن .. * العملية العملوها دي ما بعملها إلا زول مدمن مصارعة .. * وعليكم الله انا عندي طلب .. * حركاتكم العملتوها في المغرب دي تعالوا اعملوها لينا في إستادنا يوم مباراة القمة .. * تعالوا أعملوها عشان تعرفوا حاجة .. * ياخ إنتو قديمين شديد .. * لسه بضاربوا الحكم !! * زي النوع ده بيكون لسه بتشاكلوا في (حفلات العرس) .. * والله صحي .. * غايتو جنس غايتو .. * ونركب صافنات ونجيبة (رباطابية) وأصلو الزول بيموت والذكرى تفضل حية .. * و..و.. * وأصلو الحزن بيجيك عديل والفرحة داير معافرة !!
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
