بالعربي الكسيح محمد الطيب الأمين بكلم ليك أخوي الكبير !! * في أي بيت (الباب بيكون ظاهر أكتر من الجرس) .. * باب البيت (بنشاف) لكن جرس الباب إلا (تدقق النظر) شديد حتى تعرف إنو البيت ده فيهو جرس .. * يعني مستحيل يجي زول يقول لناس البيت انا شفت الجرس وما شفت الباب .. * ده مستحيل .. * في العادة .. الضيف بيجي يدق الباب لما يزهج ويقنع فجاءة كده يعاين فوق يشوف الجرس .. * أنا إتذكرت (الحنك) ده بعد الإطلاع علي تصريح محترف المريخ كريم الحسن لصحيفة (الدار) أمس .. * كريم قال : (لا أعرف المريخ من قبل وعرفت الهلال عن طريق البطولة الأفريقية) .. * والله صحي .. * وكريم الحسن ده يا جماعة هو ليس من (النمسا) ولا من (السويد) ولا من (المجر) ولا من (هولندا) .. * الزول ده من مالي .. * عارفين شنو يعني مالي ؟؟ * يعني المريخ ده سافر مالي قبل كده (12) ألف مرة .. * ومع ذلك كريم الحسن ما سمع بالمريخ .. * سمع ساكت ما سمع بيهو .. * المريخ ده شهرتو محلية هنا .. * زي أفراح عصام .. * بره المريخ ما معروف .. * والدليل إنو كريم الحسن المن مالي ما سمع بالمريخ ، علما بأن كريم الحسن (لاعب كرة) .. يعني ده شغلو .. * لو كان مهندس زراعي ولا طبيب بيطري معليش .. * لكن شغلو (كورة قدم) ومع ذلك ما سمع ب(الإصيفر) .. * فعلا والله تستاهلوا لقب (الإصيفر) .. * حاجة تكسف .. * المهم .. * في حفظ الله ورعايته يتوقع ان تكون بعثة هلال السودان قد غادرت إلي تونس فجر اليوم .. * سافر الهلال إلي تونس وهو مزود بالدعوات والمعنويات و(التمنيات) .. * سافر الهلال ونحن في سعادة ولذلك ننتظر ان يعود الهلال ونحن في سعادة ايضا .. * الأهلي الليبي ليس هو الفريق الذي يقف أمام الهلال ، فقط مطلوب من اللاعبين ان يثقوا في قدراتهم وان يحترموا الخصم ويجتهدوا فوق المستطاع ومن بعد ذلك سيكون النصيب هو الفرح والبهجة .. * واعتقد ان الجهاز الفني قد إعتمد التشكيلة التى لعبت أمام الأمير باضافة الشغيل اساسيا .. * وهي دون شك تشكيلة مثالية ويمكن ان نراهن عليها ونتحدي بها .. * ونسأل جمهور الهلال العظيم ان يلاحق البعثة بالدعوات حتى نكون كلنا شركاء في النصر القادم من بعيد بأذن الله .. * أما ما يفعله جمهور الإصيفر من (خيانة) وهو يعلن وقفته مع الأهلي الليبي فهذا أمر غير مستغرب .. * إحنا إتعودنا منكم الحاجة دي .. * لكن أنا الزعلني في موضوع الخيانة ده إنو جمهور المريخ المشهور ب(الإصيفر) طلب من لعيبة الاهلي الليبي (ضرب) موكورو وبشة .. * والله صحي .. * في مواقع التواصل طالبوا الليبين بضرب بشة وموكورو .. * والغريب في الأمر إنو بشة كل مباراة قمة عندو قون في شبكة المريخ ومع ذلك ما في زول قادر يضربو .. * ما قدروا يضربو قالوا احسن يكلموا (الجيران يضربو ليهم) .. * والله دي زي حكاية (بكلم ليك أخوي الكبير) .. * غايتو جنس غايتو !! * بعد (5) أيام من قرار إعتزالها قررت المغنية شيرين العودة للغناء .. * والله شيرين دي أ تقول من فداسي .. * شيرين دي لو رجعتو لاصولها بتلقوها من فداسي .. * يا من فداسي يا كمان ساكن حي الصفا يا كمان (عارفة عزها ومستريحة) .. * حاجة تكسف .. * قالوا ان إتحادات الوسط تقف مع معتصم جعفر في الإنتخابات ، ونحن قلنا : لو كانت (اللقيمات) رجلا لقتلته .. * جنس زلابية .. * زلابية ب(الكا) .. * بما إنو كريم الحسن قال المريخ ما معروف فنحن نقترح ان يطبع المريخ صور ندي القلعة ويسافر بها إلي نيجيريا .. * بقترح كده .. * واي زول طبعا حر في (مقترحاتو) .. * ندي القلعة في نيجيريا معروفة اكتر من المريخ .. * النيجيرين ديل بيعرفوا الهلال وندي القلعة .. * قولوا ليهم (إحنا من طرف ندي) .. * وبالمناسبة .. * والله نيجيريا دي فيها (كسكتات) جميلة جدا .. * الكسكتة وارد نيجيريا دائما بتكون أصلية .. * وأنا لو ما بخاف الكضب زي التقول قبل كده شفت شريف نيجيريا لابس ليهو واحدة .. * نتمنى من أولادنا الهلالاب البيلعبوا في المريخ (وما أكثرهم) ان يجيبوا معاهم كمية من الكسكتات هدية للكارينال الذي شطبهم حتي (يلقطوا شوية قريشات من المريخ) .. * وعلي فكرة .. زمن الكسكتة باقي ليهو شهرين ونص .. * إحنا تاني ما بنقول (فترة التسجيلات) .. * بنقول فترة الكسكتة .. * فترة (الكسكتة التكميلية) و(فترة الكسكتة الرئيسية) .. * ولا ما كده يا شيبوب ؟؟ * ولا ما كده يا ألوك ؟؟ * غايتو جنس غايتو ؟؟ * عدد من القنوات العربية والسودانية ابدت رغبتها في نقل مباراة الهلال والاهلي الليبي .. * وهذا بسبب (عظمة الهلالومكانتة الكبيرة) .. * وعدد من الإذاعات السودانية ابدت رغبتها في عدم مرافقة المريخ إلي نيجيريا .. * وهذا بسبب ما قاله كريم الحسن .. * والله يدينا الفي مرادنا ليكم .. * المهم .. * حكمة الله .. يهب من يشاء ذكور ويهب من يشاء إناث ويجعل من يشاء (عقيما) .. * و(العقم) مرات بيكون من البداية ، وفي عقم بيكون بعد الإنجاب .. * يحصل الإنجاب ومن بعد ذلك يحصل عقم .. * والعقم البيكون بعد الإنجاب هو زي بتاع المريخ ده .. * (حواء المريخ) لحدي قبل (15) سنة كانت بتنجب عادي .. * وفجاءة بدون مقدمات حواء المريخ توقفت عن الإنجاب .. * والله صحي .. * ولو سألتني عن (آخر العنقود) في المريخ علي مستوى (اللاعبين) فهو إبراهيم حسين (ابراهومة) .. * وآخر العنقود علي مستوى روؤساء الأندية هو محمد الياس محجوب .. * يعني حواء المريخ بعد أبراهومة وود الياس توقفت .. * الباقين ديل كلهم هلالاب زعلانين بما فيهو جمال الوالي الشهير ب(عزو) وراجي عبد العاطي كابتن الفريق (الما قاعد يتمرن) .. * يبقى أنا عايزك تعرف حاجة واحدة بس : (حواء الهلال ليها 15 سنة شغالة قصاد الهلال والمريخ) .. * شغالة قصاد الهلال وضلو .. * قلت لي يا كريم الحسن ما كنت بتعرف المريخ ؟؟ * الزول ده محرج لدرجة والله .. * غايتو جنس غايتو .. * و..و.. * وفي إنتظار عينك كملنا …(الفشار كلو) ..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
