محمد الطيب الأمين * لا أحد يستطيع أن يمنع جماهير الهلال من متابعة أخبار المريخ وبعض مبارياته .. * من حق جماهير الهلال أن تتابع أخبار المريخ حتى وإن كان ذلك من باب (الشمارات) أو من باب (أعرف عدوك) .. * صحيح أن هنالك هلالاب لو شافوا صورة المريخ في التلفزيون بيقفلوا التلفزيون .. * لكن كمان في هلالاب ومن باب (الشمارات) بيتابعوا مباريات المريخ .. * ومتابعة جماهير الهلال لأخبار المريخ أو حتى مبارياته هي متبادلة لأن جماهير المريخ أيضا تتابع مباريات الهلال .. * وحتى نكون أكثر صدقا فأن أكثر ما يحزن جمهور الهلال هذا الأيام هو المستوى الذي يقدمه (نجوم الهلال بالمريخ) .. * نعم جمهور الهلال زعلان من تعادلات الأزرق ولكن السواد الأعظم من الجمهور زعلان بسبب مستويات (نجوم الهلال بالمريخ) .. * ونجوم الهلال بالمريخ على رأسهم محمد عبد الرحمن .. * ومحمد عبد الرحمن هو من (القصص) الكبيرة في تاريخ الهلال الحديث .. * نقول قصة محمد قصة كبيرة ونحن نقصد ما نقول .. * لاعب في الهلال (طوالي مصاب) ، مشى المريخ ولحدي اليوم (نزلة ساكت ما جاتو) .. * الموضوع ده ما طبيعي .. * أنا ما عايز أتحدث عن الذين قالوا إن إصابة محمد عبد الرحمن (مزمنة) فهذه أكبر (كذبة) في عهد الكاردينال .. * ولكن أقول : هل في زول ضرب محمد (عين) في الهلال ولما محمد مشى المريخ (العين طلعت) ؟؟ * العين موجودة والسحر موجود .. * وأنا واحد من الناس مقتنع بنسبة كبيرة إنو موضوع محمد ما موضوع برئ .. * الإصابات قضاء وقدر لكن كمان ما منطقي لاعب أول ما يلبس شعار المريخ يبقى كويس ويتألق وينافس حتى على لقب الهدافين .. * علما بأن هذا اللاعب ناس الهلال قالوا إصابتو مزمنة .. * والله يا الكاردينال لو كل الإصابات مزمنة زي حقت محمد عبد الرحمن دي عليك الله كتر لينا من اللاعبين المصابين إصابات مزمنة .. * نحن في الهلال لا نتباكى على لاعب .. * ومحمد عبد الرحمن ما أول لاعب ولا آخر لاعب .. * وأنا شخصيا بشوف إنو الهلال ما قصر مع محمد ولكن .. * نحن نتحدث عن (الكضب) .. * ومن قبل قلناها : (البكضب عليك في موضوع محمد عبد الرحمن معناها بيكضب عليك في حاجات تانية ما ظاهرة) .. * ودي أكبر مشكلة .. * لو قالوا إن محمد عبد الرحمن لاعب مادي وما عندو ولاء وما عايزين نجدد ليهو ، لو قالوا كده ما في زول بيزعل .. * هسه الزعل سببو إنكم قلتوا إصابتو مزمنة والراجل طلع أنصح من الحصان .. * والكلام ده عيب والله .. * المريخ الآن يتنفس برئة الهلال .. * محمد عبد الرحمن والتش .. * التش هو لاعب الهلال ولكن السماسرة قالوا للكاردينال التش لاعب هش وما ح يفيد الهلال أفريقيا .. * قالوا ليهو التش ضعيف ورهيف .. * وطبعا هو صدق الكلام ده .. * صدق الكلام ده لأنو زمان قالوا ليهو مهند الطاهر كورتو ناعمة وصدقهم .. * قالوا ليهو بخاري أفضل مدافع في الوطن العربي وبرضو صدقهم .. * قالوا ليهو أحمد يحيي مدافع زيو ما في ورفعوه في الكشف الأفريقي وأبعدو الثعلب وبرضو صدقهم .. * قلنا أن لاعب بمواصفات التش يتكرر في الملاعب بعد كل (20) سنة .. * التش مثل هيثم السعودي وسكسك ومهند الطاهر وأنور الشعلة والصادق تبري وفيصل العجب .. * في لاعبين لا مثيل لهم وسط جيلهم .. * ولاعبين زي ديل انت بتدفع فيهم دم قلبك عشان يدوك نكهة غير موجودة في بقية الفرق .. * مهند الطاهر أدانا نكهة (10) سنوات وفي الآخر قالوا كورتو ناعمة .. * أنور الشعلة أدانا نكهة .. * أى لاعب عندو نكهة ما تفرط فيهو .. * السماسرة البقولوا ليك اللاعب ده هش واللاعب ده رهيف ، ديل هم ذاتم ما بعرفوا كورة .. * ما في منطق بيخلي الهلال يسجل أبوستة وبخاري بمليارات ويتلكأ في تسجيل التش والصاوي .. * ما في منطق هنا .. * التش لاعب الهلال وهو موهبة تشبه الهلال .. * أنا متأكد إنو حتى جمهور المريخ يرددون في سرهم : (التش بشبه الهلال) .. * ناس المريخ ذاتم مقتنعين إنو التش ما بشبهم بشبه الهلال .. * المهم .. * زعل جمهور الهلال على التش كبير شديد .. * وظهور التش بهذا المستوى هو سبب غليان عدد كبير من الجماهير .. * وأكتر حاجة بتزعل يقول ليك إحنا عندنا بشة الصغير والثعلب ومؤيد الصيني .. * طيب وينهم ؟؟ * إحنا لينا أربعة سنوات بنقول عندنا بشة الصغير ولحدي الآن ما شفنا بشة الصغير في الملعب .. * ونسة ساكت يا الكاردينال .. * طبعا في ناس بيقولوا ليك التش ما بقدر يلعب أفريقيا .. * وده برضو كلام ونسة ما عندو قيمة .. * لأنو إحنا في الهلال برضو عندنا لاعبين أجسامهم مثل جسم التش .. * أنا والله ما في حاجة بتعجبني في المريخ بل أنا من الناس العرفو إنو السودان ده فيهو مريخ ، عرفت الحاجة دي بعد بقيت كبير .. * لكن إعجابنا بالتش منذ أيامه في الخرطوم .. * وإحنا سنة كاملة بنكتب عنو عشان يتسجل لكن السماسرة كان عندهم كلام تاني .. * نسأل الكاردينال : أدينا إسم شاب أصبح أساسيا في تشكيلة الهلال مثل التش في المريخ ؟؟ * أدينا إسم عشان الموضوع ما يبقى طق حنك ساكت .. * عشان ما يبقي ونسة وكلام واتساب .. * ح تقول لي وليد علاء الدين .. * طيب وليد ده جسمو زي التش ووليد برضو لا يعتبر لاعبا أساسيا على الأقل قبل تعيين خالد بخيت .. * الهلال الآن ومستقبلا سيدفع ثمن سياسات الكاردينال غاليا والله على ما أقول شهيد .. * لما يكون الند بتاعك عندو (عضم شاب) انت قطع شك راجياك سنين صعبة .. * في الهلال لما كان عندنا (عضم) عملنا المتواليات الشهيرة وحققنا الدوري بأرقام قياسية .. * وأخشى ، أخشى ، أخشى والله أخشى أن ……….. تموا خيال .. * وأصحى يا كاردينال .. * اللهم إني بلغت فأشهد
