* في علم الطب : (تشخيص الداء أول خطوات علاجه) .. * وفي السودان هناك (كارثة) اسمها التشخيص .. * إحنا في السودان ما بنعرف نشخص .. * لكن بنعرف (نشخصن) .. * بنشخصن القضايا والموضوعات بشكل مميز جدًا .. * بسبب سوء التشخيص ارتكبنا جرائم إنسانية وطبية ورياضية كبيرة جدًا ولم نزل .. * واعتقد أن الهلال عانى بشكل واضح من سوء التشخيص على الأقل في السنوات الأخيرة .. * وحتى نكون أكثر دقة ، الهلال في كثير من المرات يُحسن التشخيص ولكنه يسيئ العلاج .. * مرات مجلس الإدارة بيعرف إنو الهلال عندو (صداع) ومع ذلك بيعملوا ليهو(مكمدات) في (الكرعين) .. * السودان كلو بيكون عارف مشكلة الهلال في (الهجوم) يجي الكاردينال يسجل مدافع .. * ولذلك بتلقى الهلال يعاني من تكدس واضح في بعض الخانات بينما هناك خانات فقيرة وفقيرة جداً .. * وهذا يعود بشكل مباشر لغياب الوعى الإداري في المقام الأول .. * وحينما يغيب الوعى الإداري فإنك تقبل بالخيارات الموجودة وحتى وإن لم تكن لك بها حاجة .. * الهلال قبل التسجيلات بيكون مفكر يجيب (مهاجم) حسب النقص الموجود في الفريق .. * ولما التسجيلات تقترب يقوم السمسار يعرض للهلال (لاعب وسط) فيقتنع به مجلس الإدارة باعتباره خيار جاهز .. * ودي زي الزول يكون ماشي السوق يجيب (كبدة) وقبل ما يصل السوق يقابل (بوكس الخضار) حايم يقوم يشتري طماطم ويرجع البيت .. * والكاردينال في كل عام يوعدنا ب(الكبدة) وفي النهاية يجيب لينا (طماطم) .. * ويا ريتها لو (طماطم) نافعة ؟ * وهذه طريقة لا تشبه الهلال ولا تشبه الفرق الكبيرة .. * الفرق الكبيرة بتعرف نفسها عايزة شنو ولشنو ومتين ؟ * عايز مهاجم .. تفتش مهاجم تجيبو ، مش إنت عايز مهاجم ويجي يقنعك سمسار بمدافع تقوم توافق وترحل مشاكل الفريق الفنية للموسم القادم .. * ثلاث سنين الهلال بيرحل مشكلته الهجومية من موسم لموسم .. * نفس المشاكل الموجودة في هلال (2016) كانت موجودة في هلال 2015) وأخشى أن تكون موجودة في هلال (2017) .. * والحقيقة التي يجب أن يعلمها الكاردينال إننا لن نفرح بهذه الصور وهذه المفاوضات التي تنشر في الصحف اليومية .. * حكاية إنو الهلال أكمل المفاوضات مع فلان وحكاية الكاردينال بالكسكتة مع فلان ما بتخش رأسنا .. * الهلال في مرحلة ما بتستحمل (الصور) و(الخزعبلات) و(الفشخرة والأوهام) .. * دي مرحلة خطيرة ومهمة يحتاج فيها الهلال لرجال همهم الأول والأخير الهلال .. * حسين الصادق عندو أغنية بتقول : (ما في صورة بتجيب خطيب) .. * فعلاً يا الكاردينال (الصورة ما بتجيب خطيب) .. * وكمان الصورة ما بتجيب محترف زي الناس .. * الذي مر به الهلال هذا العام لم يمر به منذ سنوات طويلة .. * ونعني بالحديث الأمور الفنية وليس التفكك الذي حدث في مجتمع الهلال وتلك الحرب التي اندلعت بين الإعلام والإعلام وبين الجمهور والجمهور .. * وهي حرب أججها الكاردينال وكادت أن تحرقه لولا (لقاء المزرعة) الأخير .. * وحتى لقاء المزرعة الذي ابتدعه الكاردينال لن يغسل ما في النفوس لأن كل أسباب مشاكل الهلال لا تزال قائمة .. * وطول ما هذه الأسباب قائمة فإن الكاردينال سيحتاج لخمسين لقاء في مزرعة وبالضرورة الخمسين لقاء تحتاج لخمسين (قميص مُشجر) .. * والقمصان وهذه (الجدعات) لن تحل مشاكل الهلال .. * وأهم من هذا كله حكاية (دايرين يلغوا شخصيتي) .. * الكاردينال قال : (ما في زول بيلغي شخصيتي) .. * كلامك سمح يا ريس .. * بس لازم تعرف إنو حكاية الشخصية دي ما بقولها باللسان بل هي (عمل وبيان) .. * عشان اللاعبين يقتنعوا إنو (شخصيتك مستقلة) أثبت ليهم بياناً بالعمل مش كلام باللسان .. * مشكلة الهلال ياريس واضحة وظاهرة .. * وبعدين أنت في لقاء المزرعة جبت (الفريق الأول وجبت الرديف وجبت الشباب) .. * وهذا التجمع الكبير أخفى ملامح فكرة اللقاء .. * كنا سنقبل بهذا اللقاء إذا كان عقب مباراة الأهلي الليبي الأول بتونس .. * ولكن أن يكون هذا اللقاء بعد فوات الأوان وبحضور الرديف والشباب فهذا أمر لا يخرج من كونه (ونسة ساكت) .. * الكاردينال من خلال هذا اللقاء أراد أن يرضي كل اللاعبين .. * حتى صلاح الجزولي أراد الكاردينال أن يرضيه في (لحظة هاشمية) .. * وهو نفس الجزولي الذي أبعده العشري بعد أسبوع من توليه الأمور الفنية بالهلال .. * ووقتها قلنا أن العشري لم يمنح نفسه الفرصة الكافية حتى يقيم صلاح الجزولي وذكرنا أن العشري أبعد الجزولي بقرار إداري .. * إحنا رأينا في الجزولي واضح لأننا متابعنو سنة وزيادة لكن العشري من وين كون رأي في صلاح الجزولي عشان يبعده من رحلة تونس بعد أسبوع من توليه المنصب ؟ * الطبطبة والشغل الني ما سمح .. * صلاح الجزولي بيطلع إعارة ، وولاء الدين يطلع إعارة وأتير يطلع إعارة .. * الهلال محتاج (جوز مهاجمين) من بره السودان .. مهاجمين زي الناس عشان يلعبوا مع كاريكا ومحمد عبد الرحمن، عشان السنة الجاية الهلال ما يطير من الدور الأول .. * كونو الكاردينال حاسي بالذنب أو حاسي إنو اللاعبين زعلانين منو ده ما بيعني إنو يرضيهم كلهم ويرفض الشطب .. * الهلال ياريس فيهو لاعبين محتاجين شطب وفيهو لاعبين محتاجين يطلعوا إعارة .. * ونفس الشي مجلس الإدارة فيهو إداريين محتاجين شطب وإداريين محتاجين يطلعوا إعارة .. * ومحمد عبد اللطيف هارون ده بالذات شوفوا ليهو إعارة للمريخ .. * ثم ثانياً يا ريس .. * قبل سنة ونص إنتو ذاتكم قلتوا لعمر بخيت إحنا ما بنشطبك وبنخليك أنت براك تحدد مواعيد شطبك .. * الكلام ده إتقال لعمر بخيت والمعز وبعد ستة أيام من الكلام ده إتشطب عمر وإتشطب معز وبكري طفش ورفضتوا تجددوا لمهند ... ولا ما كده يا عماد الطيب .. * يبقى الكلام الإتقال لصلاح الجزولي وبقية اللاعبين الكبار يوم المزرعة هو نفس الكلامك الإتقال لناس عمر بخيت .. * وعلي فكرة ياريس .. ناس عمر ومهند ومعز هم أصدقاء لكل نجوم الهلال الحاليين .. * عشان كده أنا برجع وبقول ليك يا ريس : خليك واضح في إدارة الهلال وخليك أمين على الهلال وما تحاول تجامل في الهلال ولابد أن تعرف أن الهلال أكبر من إنو يجي زول (يقشر بيهو) أو يمسك بينا زمن .. * إحنا ما ناقصين عشان تمسك بينا زمن .. * شوف ليك محترفين زي الناس جيبهم وشوف ليك وطنيين كويسين جيبهم وخليك من المزرعة والخرفان القمصان .. * التخبط ما سمح ياريس .. * والونسة برضو ما سمحة .. * ونستنا بهلال (2017) وجيت في النهاية قلت الفنيين منعوك .. * إحنا ما دايرين نحس إنو كلامك كلو ونسة .. * لسه عندنا فيك أمل .. * عندك فرصة التسجيلات دي أثبت لينا إنك ما بتاع ونسة .. * وونستكم بتاعت المزرعة دي لو فيها حاجة واحدة نافعة هي معالجة قضية بوي .. * وكل سطر كتبه العبدلله عن بوي (حقييييييقة) ولو ما حقيقة افتحوا البلاغ قلت ليكم ..
