* حينما يدرك الهلال قيمة الهلال فلا خوف علينا .. * وبالأمس عثر الهلال على الهلال فظهرت ملامح الزمن الجميل في (جيل الغد) .. * وجد الهلال نفسه بعد رحلة من التوهان والدموع والشكوى والشجن .. * بحيوية تشبه أيام زمان لعب الهلال أمام مريخ الفاشر وكسب العرض والنتيجة .. * فكانت السعادة كبيرة وسط الجماهير التي أرضاها المردود الفني والعدد الوافر من الأهداف .. * والجميل أن الهلال يتعافى الآن على يد (جيل الغد) من الشباب الموهوبين الذين كان لهم نصيب الأسد فيما تحقق بالأمس .. * والمباراة أثبتت أن حساسية الهلال تجاه اللون (الأحمر) لم تزل مفرطة وشديدة الهيجان .. * لسه الهلال يثور ويهيج كلما شاف (قطعة حمراء) .. * والخمسة الأخدها مريخ الفاشر أمبارح كان ممكن تكون (2) لو لون الشعار (رمادي) أو (بصلي) أو حتى (بُني) .. * لو شعاركم كان بأي لون غير اللون الأحمر ده أنا ممكن أقول ليكم النتيجة ما بتحصل للرقم ده .. * لكن اللون جاب ليكم هوا .. * أمبارح ناس الثعلب لاعبين مع مريخ الفاشر ومتخيلين إنو ده مريخ الحكومة .. * والساعدهم على الخيال ده ، أصلاً ما في فرق بين مريخ الفاشر ومريخ هنا .. * المستوى واحد والشعار واحد ، بس الفرق الوحيد إنو مريخ الفاشر رئيس ناديه لم يقل : (العارف عزو مستريح) .. * كلمة (العارف عزو مستريح) هي التي أحدثت الفارق بين مريخ هناك ومريخ هنا .. * بخلاف ذلك كلو مريخ وكلو عند الهلال (صابون ساكت) .. * والأيام دي إحنا بنلعب لكن بالنا مع المريخ .. * بالنا في مباراة القمة .. * وأفتكر إنو مباراة أمس منحتنا صورة مصغرة لمباراة القمة .. * أهلنا بيقولوا ليك : (الشاف آدم في السوق زي الشاف حواء في البيت) .. * أو عشان الناس ما تزعل إحنا نقول : (الشاف أحمد في السوق زي الشاف حاج أحمد في البيت) .. * وأمبارح إحنا شفنا أحمد وبعد أيام سنقابل حاج أحمد بعد ما (جابو) يجيب الهاتريك في الجزائر .. * تجونا من الجزائر دايخين ونوريكم علاقة الزيتون بالكمون .. * بمناسبة الزيتون .. * في فترة من فترات حياتنا كانت (الشعيرية) من الأشياء المدهشة حقاً .. * وقد ارتبطت الشعيرية ارتباطاً كبيرًا بيوم الجمعة .. * حتى أنني كنت أظن أن الشعيرية لا يمكن تناولها إلا يوم الجمعة .. * كنت بشوف إنو من العيب إنك تأكل شعيرية في يوم غير يوم الجمعة .. * والله صحي .. * لو في زول أكل شعيرية يوم (الأربعاء) كنا بنضحك عليهو .. * إتبرمجنا على أساس أن الشعيرية ليوم الجمعة وبس .. * وعادة فطور الجمعة بيكون (عصيدة) .. * العصيدة ثابتة .. * العصيدة ثابتة زي أبوعاقلة في تشكيلة الهلال .. * العصيدة أو القراصة .. * والتحلية شعيرية .. * وكنا أول ما يختو الفطور بنطلع صحن الشعيرية من الصينية .. * صحن الشعيرية بيكون قاعد براهو .. * أنا ما عارف ليه الناس بتبعد (التحلية) من الصينية أثناء الأكل ؟ * حقيقي ما عارف الحركة دي لشنو ؟ * والحركة دي اتفقت عليها كل البيوت السودانية .. * وبصراحة كده الموضوع ده فيهو (عنصرية) و(تفرقة) .. * ما صاح إنك تبعد صحن (سلطة الفواكة) من جمب صحن (ملاح الخدرة) .. * الخدرة ممكن تزعل .. * بتزعل عادي .. * ما فيهو حاجة لما تخلي صحن التحلية قاعد جمب باقي الصحون .. * ما تدوا (الكسرة والملاح والعصيدة) إحساس إنهم (ناقصين) .. * ما تدوهم إحساس بالدونية .. * في النهاية الصحون دي لو قعدت جمب بعض لا سلطة الفواكه بتعادي الخدرة ولا الخدرة بتعادي سلطة الفواكة .. * العدوة مستحيل تنتقل بين صحن وصحن .. * غايتو جنس غايتو !! * المهم .. * حساسية محمد عبد الرحمن العالية جداً تجاه الشباك وهذا (البزار) الذي يفعله ميدو يجعلنا نتحسر على خروجنا من الأبطال .. * ميدو منح هجوم الهلال كثيراً من الحيوية والخطورة .. * وهي خطورة من أسرارها أيضاً وجود الثعلب ووليد علاء الدين .. * وهذا الثلاثي دون شك أكسب الهلال (نكهة) وربما (طعم) و( رائحة) .. * والجميل أن (عضم الهلال) الجديد يظهر الأن بوضوح .. * كل المطلوب منح الفرص لهؤلاء الشباب حتى يكونوا هم (أساس البنيان) المتوقع .. * وتظل فرحتنا منقوصة طالما بشه الصغير خارج التشكيلة .. * بشه الصغير لا يقل عن الثعلب ووليد وميدو، بل هو من الأذكياء الذين شاهدناهم خلال الفترة الأخيرة .. * مصلحة الهلال تتطلب أن نمنح الفرصة لبشه الصغير الذي يستطيع أن يضيف الكثير للهلال ولخط الوسط بشكل خاص .. * كلنا مقتنعين ببشه الصغير ما عدا العشري .. * العشري ربما بيشوف بعيون (رمادية) عشان كده داير ليهو زمن عشان يقنتع باللاعبين .. * والله يا جماعة العشري كل يوم بثبت إنو ما عندو شخصية .. * قبل شهر العشري قال : (الجزولي ما بينفع معاي) .. * قال ذلك وأبعده حتى من رحلة تونس .. * ويومها قلنا إن العشري (محرش) .. * بالأمس العشري أشرك الجزولي وأيضاً كان (محرشاً) .. * وأنا بطلب من الزول البحرش العشري ده يقوم يحرشو لينا عشان يلعب بشه الصغير .. * رغم قناعتي السالبة في صلاح الجزولي إلا أنني احترمت فيه هذه الروح الجميلة .. * صلاح الجزولي عانى من مضايقات مننا نحن الصحفيين كما أنه عانى من مضايقات جمهور الهلال .. * وبصراحة حينما سجل الجزولي بالأمس توقعت أنه يفعل ما فعله أحمد الباشا الذي كان قد سجل هدفاً وذهب لجمهور فريقه وطلب منهم الصمت وهو يشير بأصبعه .. * توقعت أن يفعل الجزولي ذلك على خلفية رأي الناس فيه .. * ولكنه تعامل بأدب كبير وذهب لتحية الجمهور فاستحق الاحترام .. * صلاح الجزولي يلزمه كثير من العمل والاجتهاد حتى يكون في قامة الهلال .. * القلب الأبيض وطول القامة لا يكفي ولا يبرر الاستمرار في فريق بقامة الهلال .. * عموماً .. نتمنى له توفيق ونشكره على هذا الأدب .. * وقونك سمح يا ود الجزولي .. * صحي إنك عذبت الكشافات لكن أهو في النهاية قونك طلع سمح ما في كلام .. * والحاجة السمحة بتعجب .. * وبمناسبة تعجب .. * ويييييين فيصل العجب ؟ * و..و.. * وتسيبني في عز الجمر وأنت من حولي ...(بتضرب في البيتزا) !!