*شفت لي صورة لمجموعة من المحترفين في صالة الوصول. *قلت حولينا وماعلينا. *وإن كان لابد . *إن شاء الله أبو نضارة نظر ده مايكون جايينا. *فقد يكون من استجلبه جابو على أساس أن الطشاش في بلد العمي شوف. *وطبعاً نحنا نعيش قمة فقدان البصر. *والبصيرة في أحايين كتيرة. *فعلاً بلد العمي. *مادام السماسرة وبمساعدة الجماجرة بجيبوا للبلد دي سنوياً محترفين ليدو مابقدروا يلعبوا. *محترف لابس نضارة نظر؟. *ماغريبة. *قبل كده جبنا محترف عندو بواسير. *ومرة في واحد رجعناهو على أساس عندو كبد وبائي. *والغريبة في نفس الموسم سجلنا واحد سعران. *والهلال جاب واحد أظنو عندو جدري القرود. *الكورة كلها يتحكة . *لكن أبو نضارة ده سالتكم بالله ختونا ليهو. *إضاءة استاداتنا النظرو ستة على ستة مابشوف. *تجيبوا لينا أعمش؟. *ختونا الطشاش يرحمكم الله. *وعلى السماسرة البحث عن حتة تانية ياكلوا منها. *السماسرة ديل ماكفاهم شغل تذاكر البصات في العيد؟. *تذكرة بسبعة. *تلقى المكتب قافل والبص فاضي والتذاكر عند سمسار شانق طاقيتو. *بخمسطاشر. *يعني البطلع بيهو السمسار سيد البص مابطلع بيهو. *وده السبب الحقيقي في إنهيار البلد دي. *السمسرة. *من ينتج لايستفيد قدر السمسار. *كيلو الطماطم مثلاً يصل أتنين مليون. *يطلع من المزارع بمية وعشرة. *قول العتالة شالو خمسة. *الدفار الرحل شال في الكيلو عشرة(منها اربعة لسمسار الشحن المسمي كومسنجي). *يصل سوق بحري التكلفة مية خمسة وعشرين للكيلو. *يدخلوا السماسرة. *يوصلوهوا مليون وتسعمائة للكيلو. *الزول البفرش وبقيل في الشمس يخت مية يطلع الكيلو للمستهلك اتنين مليون. *المزارع شال مية وعشرة فيها عماله وجاز للري وكراتين للتعبئة. *الدفار شال عشرة مخصوم منها حق السماسرة. *العتالة خمسة. *البفرش خت مية. *يعني مجمل التكلفة بأرباح الدفار والبفرش والبعتل والبزرع بطلع الكيلو بميتين خمسة وعشرين. *بصل المستهلك بألفين . *الفرق مليون وسبعمائة وخمسين في الكيلو. *ده بمشي للسمسار. *عرفتوا البلد دي بالعها منو؟ *عليكم الله أبو نضارة ده ختونا ليهو. *المهم. *الخرطوم إشتكى. *وقبلو بشهور الأمل إشتكى. *وبسأل أهل المريخ. *أنتوا راجيين الإتحاد؟. *راجيين ناس معتصم وأسامة وهلم جرا ينصفوا الخرطوم والأمل؟. *عندكم أمل؟. *كان راجيين الشكوى دي. *أخير تسجلوا أبو نضارة . *طشاش أخير من عمى. *أيها الناس. *إن تنصروا الله ينصركم. *أها . *نجي لي شمارات والي الخرتوم. *كان شفت يا والينا. *البلد كلها قاينة بعصيها وسكاكينها. *ملعون أبو الفكة الفتنة فينا. سلك كهربا ننساك كيف والكلب قال للمواكب بجوا بدري قبل الموكب بستة ساعات ولفض الإشتباكات بتأخروا..... وإلى لقاء. سلك