والله الكيزان حيرونا عديل كده. حتى انته ياجمال؟ ياخ الناقصك شنو والبلد قصرت في حقك في شنو. اي حاجه دايرا عملتها ليك. قناه فضائيه, مصانع, شركات ترحيل, بنك وماخفي كان اعظم. ومال نحنا نعمل شنو؟ تعرف اي سوداني بدون فرز لو لقي ذره من العندك مابطلع يسيب البلد دي. وحتي لو كان بره السودان برجع. انا بعرف مجموعه كبيره جدا من مغتربين عندهم مؤهلات عاليه وخبره تسد السما دا, لو الواحد فيهم لقي ليو رقشه رقشتين يطلعو ليو حق الملاح بطريقه مستقره, يرجع السودان الليله قبل بكره. اوكي مامشكله بس دايرين نعرف الزعلك شنو والقرار دا وصلته ليو كيف والجماعه رايهم شنو؟ بعدين مش انته مؤتمر وطني والناس بتقول كل القروش حقتهم وانته مستثمرا ساي ليهم؟ طيب اها البحصل شنو في الشتات دا. حتشيل القروش معاك ولا حتسلما. ولا خلاص بقت حقتك تتصرف فيها زي ماداير. طبعا انا اصلا مابقدر اقتنع انو القروش دي حقتك وفي ظروف زي النحنا فيها دي. تعرف اقول ليك سر؟ نحنا وبي امكانياتنا الاكاديميه وخبراتنا الكبيره دي ماقادرين نلم النصاب بتاع الذكاه لي هسع, وماذكينا امكن لينا زمن لانو بنفطها كل سنه. معقول ياقريبي مانذكي ودينا يكون ناقص؟ وبيني وبينك لو ماساي قربنا نشيل من قروش الذكاه البرسلوها لينا اولادنا واخوانا عشان نقسما لي مساكين الاهل. واهو في النهايه الاقربون اولي بالاحسان. يلا نجي لي موضوع الاولاد. قرينا في الاخبار سايقهم معاك وانك حتسجلهم في مدارس انجليزيه. انته عارف بريطانيا دي مافيها مدارس بتدرس دين وعربي الا توديهم في الخاص؟ نحنا بنعرفا كويس وعشنا فيها وعارفين خباياها. وبالمناسبه مدراسا ذاتا مافيها حجاب ولا انته الحكايه دي ماهاماك. فالمجتمع هناك ببلع اي زول عمرو بين 5 و16 سنه, والبيئه قويه جدا. الموضوع دا فاطيو ساي يعني؟ نحنا عارفين في السودان كان هاميك. قوانين المؤتمر الوطني كانت بتمنع سبيبه من شعر اي بت تمد راسا تحت الطرحه. والبتعمل كدا الله قال بي قولا. كانت مكنه كبيره بتهرس في بناتنا وانته كنته ترس في المكنه دي. معقول تجي تودي الاولاد بريطانيا العظمي لي اعداء الاسلام؟ اها والفكه شايلا معاك ولا حاتسيبها في البنوك هنا تشغلا ليك. والله لو شلتها معاك تكون بالغته. حتبيع يعني الحاجات العندك وتحول القروش؟ بس مافي تاجر عمله حيكون عندو مبالغ زي دي. ياخ والله نحنا لا مؤتمر وطني ولا حاجه وممكن تاتمنا عليها مليم مايطلع بره الشبكه بس ماجربتونا ساي. ولا ماهاماك الحكايه دي ومفتكر زي مبقولو اهلك الانجليز (ايزي كم ايزي قو). اوع يكون مفتكر في بريطانيا ممكن برضو تعمل بنوك وقنوات فضائيه وكده. اعمل حسابك يازول والله هناك السستم رقيب عتيد مش زي الغربال العندنا هنا دا. وفي عرب شوام ومصريين والله ممكن يسرقو الكحل من العين. تعرف يابو الجيم, انا اصلو مابنصحك تشتت لانو انته في السودان (كنق) عديل كده. السكر بالشوال واللحم بالكيلو وعربيتك مليانه بنزين. وكمان ممكن تشغل اي زول محتاج ودي حسنات ياخ ماتستعجل وتضيعا ساي. بعدين انته قايل حكايه المريخ دي ساهله؟ ياخ علي الاقل بتخش الكوره مجاني وممكن تتكلم مع هيثم مصطفي وبله جابر واتوفستر في اي وكت وتتصور معاهم كمان. وانته كمان محبوب في الساحه لانو شكلك ماعبيط زي الناس التانيين ونحنا مامغيوظين منك شديد الا لمن الواحد يكون بتكلم (بولوتيكا). ماشفته الناس البجو بدونا في التنك ديلك؟ والله مره انا قاعد قدام التلفويون واحد من ناسكم ديل عمل لي طمام. بتكلم في قناه الجزيره وصاري وشو لي شنو ماعارف. قلته للمره انتي الزول دا بعاين لي شديد كده قاصدني ولا شنو؟ وتاخ قفلنا ليك التلفزيون في وشو وقلته ليها قومي بلاي بلا 1800 دولار بلا نحس معاك. المهم نحنا مافي الدايره حقتك عشان نقول ليك ماتشتت, بس ماتشتت ياخ. معقول المليونير الوحيد العندنا نفقدو. طيب قدام دول عدم الانحياز نقول مليونيرنا منو؟ لكن لو ركبته راسك, بلاي ماتنسانا من صالح الدعوات. واطلب من ربنا الحلاك يحلنا نحنا كمان. فقد ضاق الحال وبلغت الروح. Follow me in twitter@elrazi_elrazi د الرازي الطيب ابوقنايه عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
