الطفل وسام الحبر المبارك البالغ من العمر عشرة سنوات، ولد بهولندا من أب وأم سودانيين ويقيمان بهولندا منذ فترة ليست بالقصيرة. التقينا وسام خلال عودته في إجازة قصيرة في منتصف رمضان وعاد أمس الى هولندا وقبل السفر كانت لنا دردشة مع وسام الحبر الذي يضج بالحيوية والنشاط.. حيث لا يهدأ له بال.. قوي الملاحظة.. شغوف لأن يعرف كل شيء من حوله.. الناس الأسماء الأماكن.. ألخ ووسام السوداني يحمل أيضاً الجنسية الهولندية بحكم ميلاده هناك.. وإجاباته لا تخلو من «حبة سوداني مكسر مع هولندي». سألنا وسام كم عمرك؟ - أجاب 10 سنوات وكم يوم لسه! السودان كيف يا وسام؟ - حلو.. انت في سنة كم وبتقرأ بالهولندي ولاًّ الانجليزي؟ - انا في سنة سادسة والقراية بالهولندي. انت سوداني ولاًّ هولندي؟ - انا سوداني وبرضو عندي جواز هولندي عشان مولود هناك. ü الحاجة العجبتك شنو في الخرطوم؟ - البحر، وبرج الفاتح وتوتي. ü أكل رمضان حلو؟ - أيوه.. كمان اللقمة بملاح الشرموط وبحب الكسرة الحبشية والحلو مر حلو شديد.. شديد ü هناك في هولندا قاعدين تاكلوا الحاجات دي؟ - أيوه.. بناكل القراصة في بيت واحد صاحب أبوي في هولندا. ü انت بتحب تلعب شنو؟ - الكورة والبلاي استيشن والكمبيوتر. ü هولندا حلوة؟ - أيوه فيها شجر وزهور كثيرة وعمارات والأطفال عندهم محلات كثيرة للعب. ü انت يا وسام بتصلي..؟ - نعم.. وحافظ سورة الفاتحة والإخلاص والمسد والفلق والناس. ü انت رئيسك أسمو منو؟ - اسمو عمر البشير. ü انت بتشجع ياتو فريق في هولندا؟ - فريق بي أس بي وفريق أياكس أمستردام. ü واللعيبة..؟ - أرين روبن وشنايدر وسوارز. ü قاعد تسمع غنا؟ - سوداني لا.. رغم أنو عمي فنان واسمو عبد العزيز المبارك. ü ملكة هولندا إسمها منو؟ - اسمها بياتريكس. ü الأطفال في السودان كيف؟ - كويسين لكن بتشاكلوا مع بعض كتير، وكمان شفت الأطفال أهلهم بضربوهم في البيت.. هناك في هولندا ممنوع ضرب الأطفال حتى لو من ابوهم أو امهم.. ممنوع والشرطة طوالي بتشيل الطفل من أهله وتوديه حتة بعيدة.. وأبوه وامه يزوروه مرة في الشهر بس لغاية ما يبقى كبير. ü طيب الطفل لو عمل غلط لازم أهله يضربوه عشان تاني ما يغلط؟ - يقول وسام.. لا.. لا الضرب ما كويس العقاب يكون ما تديه مصاريف أو تخليهو يلعب في البيت أو مع أصحابه.. وفي الختام ودعنا وسام وهو في طريقه لهولندا لقضاء العيد هناك. سياج
