الاستاذ سعد الدين ابراهيم عنوان للمبدع السوداني الشامل الكامل ، فهو شاعر وكاتب درامي وصحفي مخضرم ، ورئيس تحرير سابق لست صحف يومية ، وفوق كل ذلك يعد من الشخصيات ذات القبول العريض في كل المناحي التي طرقها ، وكان علامة فارقة فيها ، فمن منا لم يدمن الترحال عبر (النشوف آخرتا) كزاوية صحفية ألفتها العقول بشكل كبير ، من منا لم يستمع ل (العزيزة) و(عن حبيبتي بقولكم) وغيرها من الاغنيات التي تفاعل الناس مع مفرداتها ومع ما تحتويه من مضامين ثرة باعتبارها سنة من سنن الحياة او عرفاً سائداً بين الناس ، وفوق كل هذا وذاك فهو شخصية بسيطة ، واضحة الدواخل والمداخل ، ولا تستطيع ان تمل حديثه أو أن تجد حرجاً في تقليب اية صفحة من صفحات تاريخه الحافل بالجمال ، جلسنا اليه في ونسة وبدواخلنا عدد من علامات الاستفهام حول هذا المزج الثقافي والفني والحضاري الذي يحمله بداخله ، من الصعب بل من المستحيل تغطية كل الجوانب المتصلة بحياة هذا الانسان المبدع والمتفرد ، ولكننا سنحاول مجرد محاولة الولوج لعالمه بحذر وتؤدة كمن يمشي على رؤوس الأصابع لتسليط الضوء على ( بعض جوانب ) من مسيرة سعد الدين ابراهيم. ضربة البداية ..خطوة خطوة * كيف عامل مع الحياة؟ -ماشى الحال ومدردق فيها ، لكن اسأل الحياة وقول ليها انتي عامله كيف مع سعد الدين يمكن تديك اجابة اوفى . * اول حاجة كدي نشوف علاقتك بالسياسى المصري سعد الدين ابراهيم ؟ -انا متابعوا من بدرى لكن عمل لى مشكلتين بسيطات كده الاولى كان يونس محمود اساء الى سعد الدين ابراهيم بالفاظ جارحه عبر الاذاعة السودانية في بدايات الانقاذ الاولى ولسوء الحظ استمعت والدتي لتلك الاساءات فالحت على اخواني انو يمشوا يشوفوا اخوهم بيبشتنوهوفي الاذاعة لي المشكله الثانيه وقفوا فى مطار القاهرة لفتره طويله جدا جدا بسبب تطابق الاسم لكن من جانب آخر انا بقرأ ليهو وهو عالم اجتماع مجتهد ومميز وانا قريت اجتماع وعموما هوزول ممتاز على حسب ماقريت ليهو وهوزول منفتح * النشأة في أمدرمان ؟ -سعيد جدا لاني نشأت في امدرمان اتعلمت فيها اشياء كثيره جميله وكونت علاقات قوية جدا بي ناسها واماكنها وشخصياتها مفاهيمها واسواقها حتى مجانينها وظهر تاثير امدرمان في الكثير من كتاباتي واعمالي الدرامية والمسرحية واعتز كثيرا بنشأتي الامدرمانية * قريت وين ؟ -قريت في مدارس كثيره فانا قريت في بيت الامانة في حي العمدة وفي امدرمان الاميرية الوسطى ثم جامعة القاهرة الفرع قريت فيها علم اجتماع * كنت بتجي الكم في المدرسة ؟ -القصه دي بتتفاوت بس ماكنت بجي الاول وماحصل مره جيت الطيش احسن ترتيب لي كان الرابع مشترك واسوأ ترتيب لى كان ال36من 42طالب فى مدرسة امدرمان الاميرية * كنت بتلعب كورة ؟ -ايوة لعبت كورة وكنت حارس مرمى كمان * قراية الثانوي هسي وزمان؟ -انا قريت فى الثانوى ودرست فى الثانوى زمان كان فى ثقافة وفكر متقد لكن هسي بقت التكنولوجيا سائده ، زمان الثانوى بتخليك زول مثقف وهسي بتخليك زول تكنولوجى . * قالوا كنت خطير فى كتابة الرسائل الغرامية ؟ -ايوة دة كلامك برضو كنت بكتب لى صحباتي رسائلهم الغرامية كانوا بيحبوا على حساب رسائلى دى وكانت بتجيب مردود كويس * لكن كنت بتدس حكاية انك شاعر ؟ -ماكنت بدس حكاية اني شاعر لكن ماكنت بحتفي بيهو الا الطلبة يعرفو براهم وبرضو زمان كان الشعر بينظر ليهو كترف وهواية مامفروض تشغلك عن التدريس . * مولود في امدرمان وشغال في الخرطوم وساكن بحري ؟ -في زمنا كانت في نكتة بتقول ( عصفور ساكن في الشجرة وبيقرا في الفرع ) / ده زيي كده ، انا امدرمان عشقي الاول ، الخرطوم محل العمل والحركة والنشاط ، اما بحري فهي تمثل لي رمزا للهدوء والسكينة . * سعد الدين في البيت ؟ -انا في البيت زول بسيط جدا ، اقعد مع ابنائي واتونس معهم ، فالبيت بالنسبة لي ملاذ آمن ، فأنا كائن بيتي ، ما بزهج من قعاد البيت خااالص . * سر روحك الشبابية ؟ -هذا من النشأة في امدرمان ، نحنا جيل نشأ شبابي بحت ، بالاضافة الى مسألة التدريس ، ولأني درست اولاد وبنات ، اطفال ومراهقين ده السبب في انو علاقتي بأبنائي والشباب عموما تكون قوية فأنا اعرف كل مصطلحاتهم ولغتهم التي يتخاطبون بها اليوم . * اولادك بقروا ليك كتير؟ -والله على حسب مزاجهم ، لكن عندي ولد متابع كتاباتي بي كثافة ، وبت متابعة لكل ما اكتب ، اما الباقين الا يكلموهم ويقولوا ليهم ابوكم كاتب الليلة كده وكده . * عندك ثلاث زهرات ، سارة ومرح ووهج ، سر التسمية الفرايحية ؟ -انا زول بحب البهجة والفرح ، زمان كنت معجب باسم سارة لأنو في شخصيات بالاسم ده كانوا عاجبني ، بالاضافة الى ان اسم ساره اسم حديث وفرايحي ويصلح لكل العصور ، لذلك سميت بنتي الكبرى سارة ، اما اسم مرح تم بالصدفة ، اذ شاهدت في التلفزيون مذيعة اسمها مرح جبر ، فعجبني الاسم ، وبعد عده ايام رزقت ببنتي الثانية ، فسميتها مرح ، اما آخر العنقود كنت عندي ليها خيارين في التسمية ، اما وهج او تقى ، لكن في النهاية سميناها وهج . متشكرين ومقدرين يا معلمات يا معلمين * اشتغلت معلم في اي مدرسة؟ -انا من كنت فى الجامعة كنت بدرس فى مدرسة بالابتدائي فى الثورة الحارة العاشرة وبعد ذلك درست فى مدرسة بالحارة 14 ، وبعد ماكملت الجامعة بقيت ادرس في الثانوي العام ثم الثانوي العالي . * دايرين حل لي مشكلة تدني التعليم ؟ -شوف ، التدني ده عاااام ، ما التعليم براهو ، الغناء متدني الكورة ماشة لي ورا ، الشباب تعبان ، الاخلاق بقت ضيقة ، كلو من بعضو ، الحاجة الشاذه لمن تلقى ليك حاجة ما متدنية ، مافي حاجة بقت رخيصة الا الانسان . *قالوا كنت ما بتحب تجلد تلاميذك ؟ -ايوة ما كنت بستعمل الجلد كوسيلة للعقاب لمن كنت مدرس ، ولا أحبذه ، لكن في المرة الوحيده التي جلدت فيها تلميذ سنو اتكسرت ، ومن ديك تاني ما جلدت تلميذ لي هسة ، حتى اولادي . = معظم الكتاب الصحفيين لم يدرسوا الصحافة والإعلام ؟ زمان ماكان فى كليات للصحافة والاعلام واول دفعة دخلت صحافة واعلام كان فى السبعينيات ناس دكتور محي الدين تيتاوى عمادالنحاس وغيرهم ،لكن عموما الصحافة ارتبطت فى الدول العربية بالموهبة اكثر من الدراسة ماقروا صحافة لكن مبدعين ومميزين فيها والعكس صحيح لكن الواحد لو صقل الموهبة بالدراسة بيكون افضل. * أول مقال ليك ؟ -انا مابديت بي مقال انا بديت الكتابة عبر مجلة الاذاعة والتلفزيون وكان رئيس تحريرها البروف عبدالله جلاب، بديت بي صفحتين تحت عنوان نادي الكلام كانت عبارة عن كتابات منوعة ومختارات ورسائل * ما بين الحرية والصحافة وظلال والحياة والناس والجريدة والدار ، حكاوي وحيوات ؟ -ياسلااام ، دي عوالم جميلة ، وفترات خالده في مسيرتي الاعلامية لن انساها ، ومحتاج لي كتاب عشان احكي ليك عن كل واحده من هذه الصحف التى رأست تحريرها ، فكل صحيفة تجربة وحكاية قائمة بذاتها ، ولدي مشروع روائي تسجيلي باسم ( صاحبة الجلالة ) سوف اضمنها مذكراتي في هذه الصحف . * ود الشواطين ؟ -حكاية ود الشواطين دي من مواليد ملف ونسة ده ، بتذكر اول مرة عملت حلقة فيهو بدأ الناس يطالبونني بحلقة ثانية منه ، ثم ثالثة ورابعة الى ان اصبحت سلسلة مستمرة وثابتة في الملف ، وعندما انتقلت الى شركة الرأي العام بقيت اكتبها في صحيفة حكايات ، وبإذن الله سوف اوثقها في كتاب يحمل نفس الاسم ، وبالرغم من ان ود الشواطين شخصية خيالية بحته ، الا ان بعض الناس بيقولوا لي الزول ده ساكن حلتهم ، وفي واحدين بيضربوا لي تلفون ويقولوا ود الشواطين ده جيرانهم في الحي واسموا فلان ! * حوار تم فيه قد عين الشيطان ؟ -الكلام ده كان قبل فترة طويلة ، ده كان حوار عجيب جدا اجريته مع الشاعر الراحل محمد الحسن سالم حميد ، بقاني فيهو مذيع بالقوة ، لأنو رفض يجري الحوار مع اي مذيع آخر ، بتذكر انا قلت ليهو انا ماعندي مانع اعمل معاك الحوار لكن انا ما بعرف عنك حاجات كتير شديد ، وما بقدر اتكلم عنك ، قال لي انا داير الزول الما بيعرفني كويس ده ، لأنو البيعرفني حيبدأ معاي من حيث انتهيت ، لكن انا داير زول يبدأ معاي من البدايات ، ودي كانت ميزة الحوار ، افتكر الحوار نجح من حيث انو عرّف ناس كتار بي حميد الشاعر والانسان ، وبعد ذلك شكل لي هذا الحوار بداية لعلاقة طيبة وجميلة معه ، ربنا يتقبله برحمته الواسعة . * النشوف آخرتا ؟ -عندما كنت رئيس تحرير صحيفة الحرية قررت ان اعمل حاجة مختلفة شوية ، استشرت زوجتي في اختيار اسم مناسب لعمود مختلف وجديد ، ولأن استشارتي لها كانت مكررة تضجرت زوجتي من الحاحي الكثير وسؤالى لها ، وقالت لي: «كدي النشوف آخرت اسم عمودك دا» .. فطوالي قلت ليها بس لقيت الاسم خلاص حأسمي العمود (النشوف آخرتا) . * سعد الدين وشبيهه عبد اللطيف البوني؟ -انت عارف مرات كتار ناس بيسلموا علي ويقولوا لي ازيك يا دكتور البوني ، يعني في شبه بيناتنا ، والبوني زميل واخ عزيز ،احمل له الكثير من التقدير والامتنان . أشعار وأغاني وأغاني .. * أبوي ؟ - من قصائدي الاولى كتبتها فى الثانوى ومفروض كان يغنيها زميلي وقتها يوسف الموصلى لكن اللجنة رات انو الاب مابيغني ليهو الراجل يجب ان تغني ليهو البت اوالمرة، ففكرنا فى اعطاء الاغنية للبلابل لم نتوقف لكن فى النهاية وصلت عند منى الخير غنتها منى الخير بصورة ممتازة * في عرسك غنى ليك منو ؟ -في خطوبتي وعرسي غنوا لي فنانين كتار منهم ابو عركي البخيت ، عبدالعزيز المبارك ، التجاني مختار ، فتحي حسين ، وغيرهم . * ماذا عن اعمالك الوطنية الاخرى ؟ -ايوه انا عملت العديد من الاعمال والقصائد الوطنية ، لكنها لم تجد حظها من النشر منها ( مدد يا بلدي ) ، ( حبيبتي يا بلدي ) بالاضافة الى الاغنية الوطنية التي يتغنى بها كل السودان ( ياهو ده السودان عزة وامكان ) وغيرها . * ماذا عن تعاملك مع الفنانين الشباب ؟ -تعاوني معهم محدود ، ولكن اشعاري وقصائدي متاحة للجميع ، ما حصل جاني فنان وطلب مني عمل ورجعتوا فاضي . * نتفق او نختلف ؟ -ايوه ، دي من الاعمال الخالده ، والاغنية دي مشت لي وردي بالصدفة ، كنا في ندوه في صحيفة عالم النجوم ، وفي جماعة قالوا لي وردي سعد الدين عندوا قصيده جديده سمحة خليهو يقولها ليك ، فقرأتها له فقال لي دايرها ، قلت ليهو لكن الاغنية دي صلاح ادريس شالها وقاعد يلحن فيها هسي ، قال لي خلاص انا برضو دايرها وحألحنها والحشاش يملا شبكتوا ، بالفعل لحنها في اسبوع واحد بس ، ربنا يرحموا . * هل المواعيد لسه حزنانة بتنادي ؟ -يا زول مالك ياخ ، زمان كان في مواعيد ، لكن هسي ، مافي اي مواعيد ولا حاجة . * اذا كيف تحافظ على وجودك الشعري من هذا التدني العام ؟ -والله انا معتصم بي جبل يأويني من هذا التدني ومنتظر الطوفان ، يا قاومنا حتى النهاية ، يا شالنا معاهو . * من يعجبك من شعراء الجيل الحالي ؟ -في الشعر الفصيح بفتكر ان عبدالقادر الكتيابي مميز جدا ، وفي الشعر العامي اقوى صوت ظهر هو عاطف خيري . * رغم اعجابك بموهبة محمود عبد العزيز الا انه لم يجمعكم عمل مشترك ؟ -محمود عبدالعزيز فنان مجتهد ، قدم نفسه بصورة مختلفة ، وهو صوت بيعبر عن الشباب ، لكن ما حصل جمع بينا عمل مشترك ، لكن محمود اذ جاني وطلب مني اغنية مرحب بيهو . * العزيزة وقانون الملِكية الفكرية ؟ -انا ما بقدر اشتكي فنان في المحكمة لأنو غنا لي ، بشوفها حاجة ما جاية ، لكن في نفس الوقت في فنانين ما عندهم ذوق وما بحسو ، مثلا اغنية ( العزيزة ) بيغنوها 23 فنان ، اشتكي منو واخلي منو ، هسي لو كل فنان جا واداني حاجة بسيطة كده حتفرق معاهو في شنو ؟ غايتو انا ما بقدر اطاردهم في المحاكم ، الا يجي واحد من اولادي ويطلع لي حقي من عيونهم . * عن حبيبتى بقولكم ؟ -عندما كتبت هذه القصيدة كنت أفكر فى أن يغنيها محمد وردى أو محمد الأمين، وهى كانت القصيدة الرابعة التى أجازتها لجنة النصوص بعد (العزيزة) و(عيونك مهرجانات) و(أبوى) ، صديقى فى الجامعة الشاعر الراحل محمد الحسن دكتور أقنعنى بأن أفضل من يغنيها هو أبوعركى البخيت ، وفعلا قام بإعطائها له ، وأذكر في تلك الايام توفت والدة أبوعركى فسافر بعد ذلك إلى لبنان ، وحينما كان يجلس وحيداً هناك وحزيناً أدخل يده فى جيب البدلة ووجد ورقة مكتوب عليها نص الأغنية فشرع فى تلحينها، وقدمها بعد ذلك فى التلفزيون بآلة العود وكان اللحن مدهشاً وكانت كلمات الأغنية مسار حديث الناس بسبب التعابير الشعرية الجديدة مثل، الحمامات الحزينة قامت أدتها برتكانة. * البرتكانة دي عملت جدل في الفترة ديك ؟ -ايوة ، الأغنية لمن اتعرضت للجنة النصوص كان الجمهور قد سمعها وتجاوب معها، ولكن اللجنة اعترضت على تعبير (أدتها برتكانة) قالو لي الكلام ده ما منطقي ، ً بإعتبار أن منقار الحمامة صغير لا يحتمل وزن البرتكانة ، بعد داك غيرتها ليهم وقلت ( ادتها من حنانا ) . * ابو عركي البخيت ومقاطعة الاعلام ؟ -شهادتي في ابوعركي البخيت مجروحة ، لكن في ما يتعلق بي مسألة مقاطعته لوسائل الاعلام انا اتكلمت معاهو كتير ، لكن هو زول ساحر ، بيقنعني في كل مرة ، انو مافي فايده والقصة مابتستاهل ، ابو عركي زول عندوا منطق رهيب ، وموقفوا ثابت فيهو، عشان كدا حقو الناس تحترم رغبتو وقرارو . *ليلى المغربى ؟ -ليلى انسانة جميلة والحديث عنها يطول عندها مواقف جميلة جدا معاى لن انساها وهى مذيعة ما بتتكرر لانها تحب عملها لدرجة التصوف فهى مثال للاعلامية المكتملة *طيب بتفتكر منو هى ممكن تكون خليفة ليلى المغربى؟ -شوف انا عموما ضد الخلافات دى لانو كل زول عندوا بصمتوا الخاصة فى الغناء مافى زول بيجى زى عائشة الفلاتية مافى زول بيجى زى ابراهيم حجازى وفى الفنون التشكيلية مافي زول بيجي زي الصلحي ، وانا لي هسة ما لقيت زول عندو الاحاطة بالثقافة والخبرات الكبيرة التي كانت عند ليلى المغربي ، ولكن بالمقابل هنالك اصوات اذاعية جميلة تركت بصماتها كيسرية محمد الحسن واسراء زين العابدين ، اما من الاصوات الشبابية فهنالك مذيعات يرجى منهن الكثير كنسرين النمر وسمية سيد وايمان بركية . دبل كيك ... دقة سريعة .. * الفيس بوك ؟ -علاقتي بالفيسبوك ضعيفة ، لكن بخش بعد مرات عن طريق اولادي ويوروني الحاصل شنو ، كلهم عندهم حسابات فيهو . * شخصية رياضية تثير اعجابك ؟ -صديق منزول * فريقك المفضل ؟ -عالميا برشلونة وشيلسي ، عربيا الهلال السعودي ، محليا الهلال * مسلسل اعجبك ؟ -الشهد والدموع لأسامة انور عكاشة ، ومسلسل ( Friend) * موقف محرج ؟ -مرة ناس اللجان الشعبية جونا في البيت دايرين يشيلوا بيانات الاسرة ، سألوني عندك كم ولد ، قعدت اتذكر !!!... الجماعة استغربوا طبعا !!! وبرضو مرات كتيرة بكون بتكلم مع زول وبقول ليهو يا دكتور حسن يا دكتور حسن ، وهو يكون اسمو عماد . * مشروب لا تتخلى عنه ؟ -الموية ، وبالذات لمن اكون عطشان ، بستمتع بيها جدا . * شخصية تتمنى مقابلتها ؟ *اتمنى مقابلة غابريل غارسيا ماركيز ، انا حاسى انو بنتشابه في حاجات كتيرة . * لاعب ظلمه الاعلام ؟ -هيثم مصطفى *اول مرتب تقاضيته كان كم ؟ -42 جنيه ونص ، لمن كنت مدرس في الابتدائي ، كان بيكفيني ، وبدي منو ناس البيت ، وبوفر منو كمان . * سرقة تعرضت لها و لن تنساها ؟ -مره سرقوا مرتبي في سوق بحرى ، الغريبة سرقوهو شفع ، لكن بعد كم يوم ناس الشغل عرفو بالحكاية ، قاموا عملو لي كشف . * لحن لا تمل سماعه ؟ -اول غرام لمحمد وردي * فنان مظلوم اعلاميا ؟ -نجم الغد فضل ايوب * صوت نسائي يعجبك ؟ -آمال النور * صحفية لها مستقبل واعد ؟ -رفيده ياسين * وسام لمن تمنحه ؟ -للشعب السوداني الصابر * شخصية لم تجد الانصاف ؟ -الشاعر الجيلي عبدالرحمن * مقلب لن تنساه ؟ -بعد ما كتبت ود الشواطين مافي زول مقلبني ، الا اكون مقلبت روحي براي * حبيت كم مرة ؟ 1 ، 2 ، 3 ، 4 ، 5 عييييييك ، انا في حالة حب دائم . * علقة ساخنة لن تنساها ؟ -مره ابوي جلدني ليك جنس جلد لأني مشيت البحر ، لأنو في الايام ديك النيل كان فايض و في ناس كتار غرقوا * صفة تتمنى ان يتركها الشعب السوداني ؟ -صفات كتيره منها ، كلمة النشوف آخرتا * بتعمل شنو لمن الهلال يكون مغلوب ؟ -زمان كنت بزعل و ما بتعشى ، لكن هسي قلبي بقى ميت ، خصوصا بعد ما بقيت احضر كور برشلونة * رايك شنو في اولاد مازدا ؟ -اولاد ممتازين ، وهسي كمان المنتخب الرديف ده خطير ، بس داير فرصة اكبر عشان يقوى عودوا *لو بقيت رئيس اول قرار حتتخذوا شنو ؟ -حألغي الخصخصة ، وحأرجع ملكية المؤسسات والقطاعات الكبرى للدولة * هواية لن تتخلى عنها ؟ -المشي والقراية وحل الكلمات المتقاطعة * اجمل هدية تلقيتها ؟ -قميص ظريف من احدى بناتي . * طيب بتعرف تطبخ ؟ -علاقتي بالمطبخ تنتهي عند تقطيع الليمون ، لكن ممكن اسوي ليك شاي ، ولو اتذنقت ممكن اعمل بيض . * وجبتك المفضلة ؟ -اي اكل مطهي بطريقة كويسة انا باكلو ، بس ما يكون دسم . * والحلول الحلوة ؟ -في ناس كتار بيقولو لي بعد مرات انت زول بتاع شطحات ، بلدنا دي مليانة مصانع سكر ، والسكر فيها غالي ، المفروض السكر ده يكون ارخص حاجة في البلد دي ، السكر ده عباره عن شنو ، مش قصب يودوهو المصنع ، طيب المشكلة وين ، القصب ممكن نزرعوا بي كميات كبيرة ، الاراضي الزراعية عندنا متوفرة ، الموية جارية ، عندنا نيل وكمان امطار ، المستثمرين موجودين ، المصانع قاعده ، طيب المشكلة وين ، مفروض السكر ده يكون رخيص . * آخر اعمالك الدرامية ؟ -عمل درامي كوميدي باسم ( عصام احباط) سيبث في رمضان على قناة الشروق . * بتقول شنو لي مدام سعاد بعد العمر الحافل ده ؟ -كتر خيرك انك استحملتيني السنين دي كلها . * رمضان ؟ -غايتو رمضان جاي واي حاجة في البلد زادت ، رمضان حيجي يلقانا صايمين ، لكن من ناحية الاعمال والكتابة الدرامية ، ليل رمضان يمثل لي فترة ابداع ، فمعظم اعمالي الدرامية الكبيرة والمسرحيات والمسلسلات والروايات كتبتها في ليل رمضان . * ملف ونسة ؟ -ملف ونسة ملف عزيز عندي وشاركت في بداياته اتمنى ليهو التطور لحدى ما يبقي جريدة اومجلة اسبوعية قائمة بذاتها ، والتحية لكل الناس اللى كانوا فيه وللناس الواصلت فى الاشراف عليه .
