٭ مسكين سمير فضل ومسكين الفاتح خضر .. مسكين حتى محامي باجعفر الذي وجد نفسه في لجنة الاستنئافات ! مساكين كلهم .. عملوا أي حاجة للاتحاد، وفي النهاية حلوهم زي ما قال الكاردينال، ورفعوا عقوبة الكاردينال! لم يقدروا لهم أي شئ .. لا تقليص فارق النقاط بين الهلال والمريخ .. ولا اجتهادهم القانوني في التفسير الجديد للمادة 105 ولا حتي نثرياتهم البسيطة في الأكل والشراب والمواصلات .. ٭استكثروا عليهم حتى كلمة حل لجنة الاستئنافات ! دخلوهم ليك كده في اللمه (حل جميع اللجان) والإبقاء على لجنة شؤون اللاعبين غير الهواة واللجنة المنظمة ولجنة الحكام ! والله اتحاد مهازل فعلاً ! ٭ لجنة الاستئنافات ذنبها شنو تشيل الوجه القبيح براها لاتحاد الكرة .. لييه يحلوها براااها عشان خاطر الكاردينال ! ٭ لجنة رئيسها بيأخذ نثريات ألفين جنيه بالجديد بس ! ما تشوفوا المساعدين الباخدو في التسجيلات الملايين ديل ! يسجلوا محليين يشيلو نثريات ! يسجلوا أجانب يشيلو حوافز ! يقوموا تاني يسجلوا أجانب يشيلوا نثريات ! يسجلو تاني أجانب يشيلوا حوافز ! ولا ما كده يا عصام شعبان .. السنة كلها شغال تسجيلات ! ٭ والله ظلموك يا سمير فضل ..! لجنة الاستئنافات على الأقل ما دست خبر قروش الفيفا يا معتصم جعفر وقالت البنستلموا 250 ألف دولار بس!! وهذه فرصة لنحيي شجاعة الأخ محمد سيد أحمد فهو أشجع رجال الاتحاد السوداني وإن اختلفنا معه .. فهو الوحيد الذي سأل معتصم جعفر بشكل واضح وصريح عن السبب الذي يجعلهم يعلنون 250 ألف دولار فقط .. وهو الوحيد الذي صرح في الإعلام بمطالبته للمجلس بتقديم تقرير عن الأموال ؟! والله ظلموك يا سمير فضل ! ولا حتى كلمة شكر .. شكراً ما قالوها ليك وانت خليت موسمهم الأكثر إثارة وجدلاً، وخليتهم يقابلوا الحكومة في الأسبوع عشر مرات ! وأول مرة يعملوا جمعية عمومية عشان استثناء نادي من الهبوط واعتماد نتائج .. تصدق برضو ما اعتمدوها ! ياخي انت والفاتح خضر وأزهري الطريفي باجعفر تستاهلوا التكريم .. انتو عملتوا قرارات تاريخية حيرت العالم كلو، حتى ناس الاتحاد غلبهم يستوعبوا الحصل، قام حلوكم ! عبقري أنت يا سمير .. بس مسكين مظلوم .. المريخ برضو ما كرمك ! مع أنك تستحق التكريم .. يكونوا منتظرين قرار واضح بحكاية أنهم أبطال الدوري ؟! معقولة بس يا معتصمم دوري بطلو منو ما معروف والهابط منو ما معروف ! وأنت لسه قاعد وبتحل كمان ! والله ظلمت سمير يا جميل ! من هو أحق بالحل يا أسامة عطا المنان ! الزول الشال نقاط هلال كادوقلي أداها المريخ، ولا الزول الشال قروش الفيفا أداها وكالة تاكس !! من هو الأحق بالحل يا معتصم جعفر .. سمير فضل الشال ليهو ألفين جنيه ولا الناس الشالو مليون دولار ! والله غريبة وعجيبة والله .. ٭ ظلموك يا سمير وختوك مع لجنة الانضباط ! لجنة مافي أصلا ! مااااافي لجنة يا سمير .. قالوا حلوكم مع لجنة الانضباط .. يعني بعد العملتو ده كلو حسبوك مافي .. حتي الألفين جنيه يكونوا ما حسبوها .. ما القصة أصلا جايطة .. القروش كلها جايطة .. شي تبرعات للشاعر، وشي تسجيلات لوادي نيالا .. وشي دولارات ما معروفة.. بالمناسبة ..أنا في الإمارات سألت المدربين السودانيين عن كورسات الرخصة .. قالوا دفعو دولارات .. دولار دولار دولار .. ما يورو هههه . دولار كاش .. تصدقوا واحد قال لي ما بدونا ايصالات ! كده جربندي بس .. تدفع وتدخل الميدان . زي دافوري زمان !!! والله ظلموك يا سمير .. بس ما تخاف إنت الوحيد القروشك موثقة .. أوريك كيف ! شيل الصبر ..أنا محتفظ بالكثير المثير الخطر ! وكلوا بوقتو .. حنطلع القصة دي مع قصة نثريات حكام مباريات المنتخب ! يورو ودولار وسوداني وحوافز وتبرعات وعالم تاني .. نرجع لي دولارات كورس المدربين .. برضو اتصلت بي أحمد ساري في مصر .. أنا اصلا (ثقييل) وساكي الموضوع ده ! قال لي دفعوا دولار بس هو عندو مستند ! يكونوا الجماعة ديل بخافو من الأجانب شوية ! ما مشكلة .. دي قصة خفيفة .. في كمان دولارات تاني بتاعة الاتحاد الإفريقي ! والله ظلموك يا سمير .. حلوك براك وهم قاعدين !! بس شايف جاملوك في حكاية اللاعب عمر عثمان .. قالوا الايقاف وجوبي ! لا حول ولا قوة إلا بالله .. هو وجوبي يا مجدي شمس الدين ! وجوبي يا شروني ! تصدقوا ديل محامين .. بتكلموا عن ايقاف وجوبي للاعب البعتدي على الحكم، ومجدي تحديداً عاقب بكري المدينة بست مباريات .. ما قلت ليك ظلموك يا سمير ! ٭ ناس شروني ديل استدعو لاعب هاوي اسمو شيبوب للجنة شؤون اللاعبين غير الهواة؟ يعني إنته عملت أكتر من كده ! وناس مجلس الاتحاد ديل جابو الرابطة كوستي بقرارك رغم أنف الجمعية العمومية، وصاحبك أزهري وداعة الله قا ااااعد يتفرج ! والله ظلموك يا سمير ! وليه يا سمير ما جيتا .. ظلموك ولا نسيتا ! هي نسيت .. مزمل الوحيد الأشاد بسمير .. والله فيك الخير .. بس وين التقرير !!!
