قلنا من قبل ونكرر اليوم .. أسامة في.. استقرار مافي.. نخليكم اليوم من أسامة يورو ونتكلم عن أسامة تسجيلات.. ورق ساي الليلة .. بدون شيكات.. لكن برضو شبك ومشاكل وأمور ملخبطة! أسامة عطا المنان الراعي لفريق الوادي نيالا قرر أن يسجل لناديه لاعب كاميروني مسجل في فريق أسود دارفور وهو نادي تابع للاتحاد المحلي بالفاشر! السيد اسامة عطا المنان الذي لا يعترف بأي ضوابط أو حدود في عالم كرة القدم لم يجد أي مشكلة في تسجيل اللاعب بخطاب تعهد حملته أستاذة اسمها عائشه تنشط في مجال تسجيلات اللاعبين منذ فترة! ومع خطاب التعهد هذا بشطب اللاعب يوجد خطاب شطب بختام الفرقة السادسة مشاة! ومشيناها خطى ومن كتبت عليه خطى مشاها! نمشي مع أسامة عطا المنان يا وصلنا حدو يا وصل حدنا!!! أسامة عطا المنان راعي الوادي نيالا وصاحب وكالة تاكس بالشراكة مع اخرين من بينهم السيد السكرتير مجدي شمس الدين رئيس لجنة شؤون اللاعبين غير الهواة وفي رواية اخري والهواة أيضاً! اي حاجة في اتحاد الكرة جائزة! اسامة رئيس لجنة التسجيلات؟ معليش لخبطتكم شوية لكن اهو القضة جايطة ! أسامة راعي الوادي نيالا قرر تسجيل لاعب أسود دارفور دون ان يتم شطبه من النادي .. اسامة رئيس لجنة التسجيلات .. علي الامين مقرر لجنة التسجيلات او العضو الدائم في لجنة التسجيلات ونائبه عصام شعبان ! ولما يقولوا ليك عصام شعبان يعني اسامة عطا المنان! كده فهمتوا .. لجنة التسجيلات دي ممكن تقيف للهلال في تسجيل لاعب من ابيي وممكن تمنع المريخ زااااتو من تسجيل لاعب بشهادة ميلاد مزورة مرات كده بزعلوا المريخ ! لكن ببساطة بتسجل لوادي اسامة لاعب اجنبي وما مشطوب من ناديه! المهم اللاعب ده كاميروني اسمه روجر سجلوا في الوادي نيالا .. ناس أسود دارفور ديل أسود عديل! اعترضوا طوالي .. أسامة حاول بجاي بجاي .. لقى الجماعة عنيدين.. قام حول الموضوع لشروني.. وشروني ده شاب ممتاز وقانوني يتكلم معاك يقنعك .. تشوفوا في الاتحاد والاجتماعات تلقاهو راجل طيب خلااااص ! شروني وجد نفسه في مواجهة اسود دارفور .. غلبوا يحل القضية قام رجعها لاسامة عطا المنان ! شروني مقرر لجنة شؤون اللاعبين غير الهواة والهواة طبعا ! يعني لجنة زي شيبوب .. مش شيبوب هاوي ومحترف في نفس الوقت ! المهم لجنة شروني ومجدي دي اجتمعت ناقشت قضية اي لاعب الا زولنا بتاع اسود دارفور ده ! مع ملاحظة انو تسجيلوا معلق حسب افادات لجنة اسامة عطا المنان ! ناس اسود دارفور لاعبين مباراة بعد ايام في كاس السودان ! ما عارفين مصير لاعبهم .. أسامة لسه ما قرر يخلي اللاعب يمشي الوادي نيالا ولا يمشي اسود دارفور ..! اصلا اسامة مشغول اليومين دي بموضوع اهم من التسجيلات .. عندو فروقات في دولارات الفيفا ! بالمناسبة عندي سؤال ثقيل !!! قالوا في الاجتماع الاخير قلتوا انكم بتبيعوا دولارات الفيفا بسعر السوق الاسود ! هي دولارات ولا يورو ! يا اسامة ومعتصم لو بتخموا ناس مجلسكم ديل نحن عارفين اي حاجة ! هي بتجيكم يورو السبب البخيليكم تتكلموا عن دولار شنو ؟؟ المهم خلونا في روجر الليلة .. اتحاد الفاشر ارسل خطاب مستعجل قبل يومين لاتحاد الكرة بستفسر عن مصير اللاعب عسي ان لا يكون مصيره مثل عمر عثمان لاعب الامل عطبرة ! فجأة كده لقي نفسوا موقوف سنه .. عشان المادة وجوبيه ! وبكري المدينة (ينطط) رغم انو ضرب الحكم وشتموا بالفاظ بذئيه ! ومجدي شمس الدين قااااعد .. طبعا مجدي ما بقدر يقول حاجة لاسامة .. ما شريكو في الوكالة !!!! وزولو في الانتخابات ! بالمناسبة مجدي ما عندو كتلة ولا نادي ولا اي حاجة لكن بجيب اعلي اصوات ! وما عندو (قروش) لكن كريم بشكل في نثريات الحكام .. مبااااالغة ! اها ما اطلع بيكم من الموضوع واجهجكم زيادة علي جهجهة الاتحاد. روجر هسة لا عارف روحو مشطوب ولا ما مشطوب.. ولا عارف روحو في نيالا ولا الفاشر.. وأسود دارفور زي المريخ كشفها ناقص لاعب! هههه المريخ كشفوا ناقص لاعبين يا خالد عزالدين ! هواة ومحترفين !! ختام القصة.. لسه .. نشوف أسود دارفور بشيلوا اللاعب ولا بسرح في الوادي نيالا!