في بيان الإدارة المالية الشهير بعد الكشف عن دعم الفيفا للاتحاد السوداني جاءت عبارة اشتهرت بها كل البيانات المشابهة في المؤسسات المختلفة «نحن نعمل بشفافية، ومن أراد أي معلومة فليأتِ الينا» طبعاً هذه عبارة تصلح للضحك فقط.. فكل المؤسسات التي تستعملها في بياناتها تكون في الغالب مؤسسات سرية من الصعب جداً أن تحصل فيها على معلومة! نحن نعلم تمام العلم بأن الدكتور كمال شداد بكل قوة شخصيته كان يعاني في الحصول على معلومات من الإدارة المالية دعك من صحفي يبحث عن الحقيقة! ونقول للأخ أسامة وللإدارة المالية شكراً في كل الأحوال فنحن نستمتع أكثر عندما تكون المعلومة أكثر صعوبة وتحتاج إلى جهد أكبر.. على الأقل هي تعطي فرصة للصحفي الأكثر اجتهاداً حتى يتميز.. فالمعلومات التي تأتي من الاتحاد عبر النشرة الإعلامية تتساوى فيها كل الصحف ولا تعطي تميزاً لأحد!! بمناسبة النشرة الإعلامية سمعنا قبل فترة «طويلة» عن خبراء مصريين قادمين من أجل الموقع الإلكتروني ثم سمعنا قبل فترة «متوسطة» عن انتهاء العمل في الموقع الإلكتروني ثم سمعنا قبل فترة «قليلة» عن أموال كثيرة صرفت على الموقع الإلكتروني وسمعنا وسمعنا ولم نرَ شئيا !!! وحقيقة نحن في شوق للموقع الإلكتروني، فعلى الأقل يمكن أن نستقي منه معلومات في غاية الشفافية وربما بالصور على طريقة صحيفة «الدار».. يعني ممكن تنشروا لينا تكفل «الإدارة المالية» بمنصرفات تصحيح أوضاع أجانب نادي «الوادي نيالا» معلومات كده ومعاها صور للثنائي النيجيري ماثيو وانياما .. الغريبة ما لقينا ليهم صورة نهائياً! تسجيل سري ده يا أسامة على طريقة الحسابات ولا شنو! الموقع الإلكتروني للاتحاد .. منصرفات ومنصرفات ولا نرى موقع ولا نرى حتى جوازات ! الثنائي ده بلعب لسه في الوادي نيالا ولا أخليتو خاناتهم تمهيداً لضم «روجر» لاعب أسود دارفور الذي كنت تريد أن تسحبه من ناديه وتسجله على طريقة «ألوك» بدري بدري ومن غير ما زول يعرف حاجة،ولكننا سعداء بانتصار نجوم دارفور عليك وبالتأكيد نحن سعداء بانتصار الصحافة الرياضية عليك في بداية الموسم! شفافية أسامة عطا المنان عشان تحصلها لازم تقوم بدري خالص.. قال شفافية في الأموال قال .. ياخي شفافية الأموال صعبة عليك خليها .. اعمل لينا شفافية في التسجيلات دي .. ورينا سجلتو ألوك أكيج للمريخ بأي صفة؟لاعب وطني.. ولا أجنبي؟ انتقال حر ولا تسويق .. طلبتوا ورقوا من المريخ كوستي ولا من الملكية جوبا؟؟ يا شفاف.. ياخي أنت ما شفاف في توقيعك.. معقول تكون شفاف في ترقيعك.. ترقيعك دي ما عندها معنى للقافية ساكت.. زي الغنا الشبابي اليومين دي!! لاحظنا حاجة لذيذه أخي أسامة.. أصلاً نحن عندنا ثقالات الملاحظات.. لما توقع لروحك بتعمل التوقيع بتاعك بالطول! يعني بتكتب اسمك لي فوق ولما توقع لمجدي شمس الدين بتعمل التوقيع بالعرض.. يعني بتكتب اسمك لي تحت!! وتحت تحت كده نحن عارفين ليه ما بتكتب عن مجدي شمس الدين رغم أنو القانون بقول كده؟ بتعرف يعني شنو قانون يا أسامة !! معليش مصيرك تعرف.. المهم نحن لاحظنا أنو طلب التذاكر لوكالة تاكس بخصوص ثنائي «مريخ كوستي» كان بتوقيعك البي العرض يعني توقعيك بتاع مجدي شمس الدين.. لكن توقيعك بتاع تصديق قروش بكري المدينة كان بالطول.. يعني مساهمتك واضحة للعريس!! وتوقيعك في الشيكات طبعاً بالطول، لكن توقيعك في خطاب إيقاف إجراءات لاعب أسود دارفور كان بالعرض.. يعني عايز تقول عملوا مجدي.. ياخي احترم عقولنا شوية.. نحن كلنا عارفين مجدي مسافر! شايف الإدارة المالية نست حكاية الشفافية وما ردت علينا في قصة «اليورو» مش حرام عليكم ما تكلمونا بطريقة التحويل دي .. التجار كلهم مستغربين كانوا في الطريقة البتحولوا بيها الدولار.. طلعتوا خبرة .. لكن لسه نحن محتارين بتسحبوا كيف ! بدوكم ليهو يورو حاااار كده ولا سوداني.. وبتحولوا كيييف والسعر كيف.. والله المسؤوليات عليك كتيرة يا أسامة.. شيء تحويل وشيء تضريب وشيء تسويق وبرضو بتجي التسجيلات وبدري كمااان .. وين بتلقي وكت لي ده كلوا! ومشرف على الوادي نيالا ومريخ نيالا وشكوى الرابطة كوستي وطلبات الفحص والانتخابات.. ما قلت ليك أنت الظاهرة ما ألوك !! بس أديك خبر.. اقتراب نهاية الظاهرة.. عشان مزمل أبو القاسم يعرف أنو الثورة الزرقاء ليست صغيرة! مسكين مزمل ما عاش في نادي ثورات!! آخر ثقالة.. واحد ثقيل في المنتديات.. كتب.. الاتحاد السوداني وقع ل«أسامة» في «عطا» ههههه...
