غرائب الاتحاد السوداني لكرة القدم كثيرة ومثيرة .. فهذا الاتحاد لو صدر في حقه كتاب اسمه (العجائب والغرائب لاتحاد معتصم مجدي اسامة ) يمكن ان يكون من اكثر الكتب طرافة ! اتحاد معتصم جعفر يتحدث بجرأة عن استلامه لمبلغ 250 الف دولار فقط من الفيفا رغم ان اي شخص يدخل الي موقع الفيفا يعرف ان اي اتحاد في العالم في عام 2015 استلم اكثر من مليون دولار ! أتحاد اسامة عطا المنان يتحدث عن اعداد المنتخب بالشيرنق والديون رغم ان اي شخص لو دخل الي موقع الفيفا لعرف ان الفيفا قد دفع لاي اتحاد وطني مبلغ 300 الف دولار للاعداد لمباريات كاس العالم ونحن لعبنا مباراتين فقط ضد زامبيا ! يعني المباراة بي 150 الف دولار غير (الشيرنق والديون) هههه أتحاد مجدي شمس الدين يتحدث عن ظلم الحكم السوداني من الجمهور ليتفاجأ الجمهور بان مجدي شمس الدين نفسه يعاقب اللاعب الذي يعتدي بالضرب والاساءة اللفظية مثل بكري المدينة علي حكم بست مباريات فقط !! وفي الجانب المادي فان اتحاد مجدي يغدق علي الحكام الاجانب بالشئ الكثير المثير الخطر بينما يدفع الملاليم لحكامه ! هذه مقدمة بسيطة لزوم التمهيد لنحدثكم عن الاتحاد الذي وصل مرحلة من الجرأة حتي انه يريد ان يأكل لحم الاسود ! كل العالم يعرف ان الاسود تأكل لحم من تريد الا في اتحادنا المتميز بقيادة لجنة اللاعبين غير الهواة والتي تنظر في شؤون اللاعبين الهواة !! ما قلت ليكم ممكن نصدر كتاب طريف .. رائكم شنو في العنوان ده (هواة ولكنهم محترفين !!) أمس أرسل اتحاد كرة القدم السوداني خطابات (طريفة) فيما يخص قضية لاعب الاسود دارفور النجم الكاميروني (روجر) وللذين لم يتابعوا هذه القضية نقول باختصار ( هذا اللاعب مسجل في اسود دارفور كلاعب هاوي .. لم يشطبه اسود دارفور من كشوفاته ورغم ذلك فان اتحاد اسامة عطا المنان استطاع ان يسجله في النادي الذي يرعاه اسامة عطا المنان واسمه الوادي نيالا .. كده بس رجالة .. احتج نادي اسود دارفور عبر اتحاد الفاشر علي هذا التسجيل واكد بالمستندات وبعد مخاطبات كثيرة مع الاتحاد بان اللاعب مسجل في كشوفات اسود دارفور ولم يتم شطبه .. ورد الاتحاد بان اللاعب تم شطبه بناء علي خطاب شطب من الفرقة السادسة مشاة !!! اي والله .. اضحكوا .. عشان نتاكد من نجاح الكتاب ! .. اتحاد الفاشر خاطب الاتحاد السوداني قبل فترة طالبا حسم قضية اللاعب لان نادي اسود دارفور يريد لاعبه ليشارك معه .. ولا احد رد علي اتحاد الفاشر .. ماااا اسامة سافر .. مشي يستمتع ببطولة افريقيا للاعبين المحليين .. طير المنتخب وطار هو لرواندا !! لجنة شؤون اللاعبين غير الهواة اجتمعت وناقشت كل مشاكل اللاعبين هواة وغير هواة وتجاهلت قضية اللاعب الكاميروني في اجتماعها الاول في وجود اسامة الذي رجع في زيارة سريعة للسودان .. واسامة هو اسد الاتحاد ! زول بقدر يسألو مافي .. مش كده وبس ومعتصم جعفر يدافع عنو كمان ! يسجل لاعب اسود دارفور زول يسألو مافي !! ناس اللجنة انتظروا اسامة لحدي ما سافر قاموا ناقشوا القضية .. كل الذي استطاعوا ان يفعلوا اوقفوا هذا اللاعب المسكين عن المشاركة مع الفريقين !!! وأمس ارسلوا خطاب عجيب وغريب .. مش قلت ليكم الكتاب ممكن ينجح ! اول حاجة الخطاب موجه لاتحاد نيالا ونادي الوداي واسود دارفور !! لاحظ اتحاد الفاشر ابعدوا تماما ! عايزين ينفردوا بالاسود !! ما شاء الله اكلي لحم الاسود .. وخطاب اسود دارفور زاتو ما مشي بالسيرك .. وصل كده مع واحد جاي بالبص للفاشر .. يعني زي ما يكون عندك دواء مرسلوا السودان تمشي مطار دبي تقول لي زول عليك الله ده دواء للوالدة وده التلفون اخوي بجيك في المطار !! رسلوا الخطاب لاسود دارفور مطالبين بحضور السكرتير في اجتماع اللجنة القادم !! الاجتماع متين ؟ ما قالوا !! ما مجدي برضو في بطولة الشأن واسامة في بطولة الشان ! طيروا السودان وطاروا هناك .. حوافز ودولارات وتذاكر .. استمتعوا !!!!!!!! استدعاء سكرتير اسود دارفور للمساءلة !! مع ملاحظة انو سكرتير اسود دارفور تمت مساءلته اكثر من مرة عن شطب اللاعب واكد ان ناديه لم يشطب اللاعب واتحاد الفاشر ارسل اكثر من مرة هذا التاكيد !! وتم استدعاء سكرتير الوادي نيالا الفريق الذي يرعاه اسامة عطا المنان وعشان كده سوف يحضر مع سكرتير الوادي نيالا سكرتير اتحاد نيالا .. عشان يقولوا شنو ؟ نادي سجل لاعب غير مشطوب .. دي عايزه الكلام ده كلو !!!!! علي العموم أسرع بحجز نسختك من كتاب .. طرائف وغرائب اكلي لحم الاسود .. تسجيل وتسفير وسودانيير .. الموضوع خطيييير !.
