السلام عليكم.. ولك من كل قلبي صادق الدعاء بالتوفيق.. وأتمنى أن تسمحي لي بتهنئة ابنتي النجيبة (د.صيدلي/مروة علي عبد الرحمن).. بما جادت به قريحتي عبر مساحتك العزيزة (اندياح).. مع خالص الشكر: الليلة عيد.. الليلة افرح يا فرح الليلة يوم شكر الإله يوم الفلاح الليلة يومك يا السجود سبحانك يا خالق الوجود مبروك عليك يا (مروة) يا ست الحسان يا بهجة الروح يا حنان عصفور يغرد في الجنان الليلة يوم شعري الليلة يوم الامتنان يوم الحصاد يوم المسور يوم الأمان حققت لأبوك النجاح الما خمج بالامتياز امتياز فوق امتياز فوق امتياز كلو امتياز سجلت اسمك من دهب مقعد مع علماء العرب الليلة يوم عزنا جيبو الطبول لبتنا دقو النحاس والطار كمان حولية ليك يا ستنا يا مروة حققت المحال المستحيل لان وانتنا يا مروة نورك سطع عم البلاد في الصيدلة واصلي العلم احفظها يا رب العباد دايرك تغوصي في البحوث وتجيبي للناس الهنا داير السعادة في كل بيت من الكبير حتى الجنا داير حوامل صحاح وطفولة بسمة وانشراح داير صبا داير شباب عافيته للبلد النجاح داير كهولة محصنة وشيخوخة نشطة من الصباح عقيد شرطة م/ علي عبد الرحمن الفكي تلويح: خالص التهاني للعزيزة (مروة) وتحية خاصة وتهنئة كبيرة للعم العزيز (علي عبد الرحمن) صاحب الأيادي البيضاء والخدمة الطويلة الممتازة بشرطة الدفاع المدني، وقد باعدت بيننا السنوات لكنه ظلّ في خاطري مثالاً للطيبة والاحترام والتفاني ولم يكن مستبعداً أن يكون له مثل هؤلاء الأبناء المتميزين في مختلف المجالات.. والشكر موصول منهم عبرنا لأسرة وأساتذة كلية الصيدلة بجامعة الرباط الوطني التي كانت (مروة) ضمن طالباتها ونأمل أن تظل بما أحرزته من تفوق ضمن كوادرها.