سودانية نحن.. وكل البلاد عارفانا نوبة.. وعرب.. بجة.. وكلامنا رطانة في دارفور خلاوي موقدة نار قرآنا خشاها الخسيس لملم مطامعو وجانا الشر ما بعيد من بينا من عملانا والدايرنا فوق هاماتنا لو يعنانا بترول.. وموية نيل.. ماشية.. ومعاها بطانة والقاصدنا لو كان جكة ما بلفانا حميدة خصالنا مشهودين شهامة وأمانة هبة من الله كم بيها الكريم خصانا {{{ أهنيهو الوطن بي بنيتو التحتية ثابتة أقدامو مهما.. لفقولو قضية مالك يا البشير مالك مطول بالك لمهم احرقم سواها النمر قبالك وين طير الأبابيل يا ربي بيهو تعجل ألفا المسلمين بقت الحكاية تخجل {{{ أرجوك يا نسيم أديك سلامي تشيلو ليهو توصلو ما عليكا بي تفسيرو لي عموم الوطن لي صغيرو قبل كبيرو وا أسفاي على.. قلبي المساهر ليلو مصيرو (السر) يعود تاني ويواصل سيرو يرجع للوطن يحميهو يبقى نصيرو السر سنهوري الخضر { رئيس جالية ولاية نهر النيل بالمملكة العربية السعودية تلويح: وتمتد أفراح التحرير حتى الخليج العربي فتحرك مشاعر كل السودانيين في أجمل مشاهد الوحدة والتحية لمغتربي بلادي الغائبين بأجسادهم.. الحاضرين بيننا بأرواحهم