شرط التوب : قطعه أو مزّقه ..وهي فصيحة ..شرط الجلد بضّعه وبزغه أو فصده لاستفراغ الدم نحو ذلك . كما جاءفي قاموس اللهجة العامية . قالت امرأة : أكّان قعدت هنا بمرُق سمينة و هدومي مشرّطة .أما شرط العين (دا البشرط العين زاااتو).. و الشرط (فصحى) الزام الشيء و التزامه .. جمعه شِروط ..نقول : الشرط نور .. يقول الشاعر في هجاء احدى البنات : إنتي فاكرة الناس سبهلل فاكرة كل الناس عبيطة ؟ ما بتعرف لون أضانك؟ من كُراعك دون حيطة ؟ إنتي ماالبعّاتي ذاتك دون قيدٍ أو شريطة و الشريط : حزام رقيق من قماش أونحوه للّف (فُصحى) .. وأيضاً هو خوص ملفوف يشرّط به السرير و نحوه .. يقول ود ضحوية : أبوك تيس أم رويق البي الشرايط قنّا . والشرايط و الشريطات أماكن بالبطانة ...أما شريط الكاسيت و الفيديو فهي من الأدوات التي حلّت محلها الاسطوانة أو ال(سي دي)بالعربي الفسيخ بعد حزفها، وكذلك شريط الكهربة .. و الشروط التعسفية .. وأيضاً " نقطتين شَرطة:-" . و الشريط في الموسوعة الحلمنتيشية للمتجهجه الأممي هو رُتبة كتفية تدل على درجة مقاومة حاملها للصدمات الكهروعاطفية . و المصدر شرْطَنَة .. يقول الشاعر كبكبة بن عبد الجرّاس في قصيدته "يا عبدو عيب" : يا عبدو عيب الدنيا حر والموية بتسخن عليك تلاتة ساعات كاملة زولنا يسب ويكيل ودموعو تتخرخر تسيل دموعو سايلات بالكفوف وشرايطو تلمع في الكتوف بقى فيلسوف شي كلام عن الدنيا أم قدود وعلاقة بين يوم السبت وعين الحسود أما قص الشريط فكناية على افتتاح علاقة عاطفية جديدة .. نتمنى أن لا تنتهي بعملية الشوكشة المؤلمة أما الشرط فأنواع،منه شرط العين وكثيراً ما يحدث لنا عند هزيمة كروية نكراء،ومنه شرط الجيب ويحدث بواسطة النشالين المحترفين ، ومنه شرط تمليه الأممالمتحدة على العرب والمسلمين خاصة وىكون في شكل حزمة شروط. ومن قبيلة المشاريط أيضاً ،المشرط ،وهو أداة تستعمل في العمليات الجراحية وما شابهها وربما يُنسى في بطن المريض .أما الشُرطة (بضم الشين) فهي التي تتدخل في مثل هذه الحالات إذا دعى الأمر . القاموسنجي تحليل غنائي: الأغنية : مرت الأيام.. كالخيال أحلام ... مرت ومر سريع .. كان ظني فيهو يدوم .. لكنو مر سريع ... التحليل :- سنة2014 عجيبة وغريبة ومليانة مشاكل لي عينا .. أي حتة تعاين ليها تلقى ليك مصيبة .. لو زغت برة البيت أو قنّبت في نص الحوش حتلقى المصائب قدامك .. لأنو الشمارات والخيارات بتاعت المصائب كلها من ضياع طيارات و جواسيس بني صهيون ... حتلقاها في أي قناة إن شاء الله قناة بنما .. كلما كان الزول مشغول بالدنيا دي ومصائب الزمن حتلقاهو مذهلل وما عارف الحاصل ليهو شنو وعليه يفقد التركيز واذا فقد التركيز اكيد حيضيع كل الوقت ( حتى بدل الضائع) من عمرو . والشاهد ان 2014 دى مرت بصورة سريعة جداً ( كالخيال أحلام) وطبعاً ( ظني فيهو يدوم) دى مافي كلو كلو إلا في الاحلام .. وداعاً الربع الأولمن 2014 مع أطيب الأمنيات أن يكون باقي عام 2014 أكثر أمناً وسلاماً فهو عام انتصارات كروية هلالية ,و.... وبرشلونية ... وحاجات تانية كدا .. آمين .
