ليست شيالات الحلوى وباقات الخبائز والمكسرات والشربات وحدها التي تحمل مشاعر الود الحلوة وتتزاحم حولنا لتهانئ النجاح. ها هو شاعرنا المجيد قرشي الأمين كما عودنا دائماً عبر «مفاكهات» دوام الحضور والمشاركة بقلمه وقلبه ووجدانه، يقدم لكل ناجح حلاوة الكلمة وخبيز المشاعر ومفرداته النشوانة بفاكهة الأماني الحلوة في مساديره الرائعة. ونبدأ أولاً بمسدار التهانئ من «مفاكهات»: من مفاكهات يا فاكهة زمانا «مفاكهاتنا» تبارك تشارك البهجة في كل الدروب وتعارك تهديك بسمة وحتى الأسرة ليها تشارك وتتمناك تسير في دربو ما تكون بارك ٭ وزغرودة فرح عبر الجريدة زغاريد الفرح يا أحبة مالية الساحة ولذيذ طعم النجاح الزادو سيدو سماحة أثلجتوا الصدور لامن بقت مرتاحة ونسيتونا هم العيشة وغم اتراحا من الوالد باقات من زهور أهديها ليك في نجاحك يا ولدي العزيز أجمل صباحي صباحك مناي من قلبي تتعلى وتلقى صراحك نجاحك لي نجاح أشوف هَنَاك وأفراحك من أم لبنتها باقات الورود هدية كيف توفيك يا بتي الحنينة الريد مجسم فيك يا ضلي وضراعي من قلبي عافية عليك يبراك النجاح إن شاء الله ما يخليك للمعلم يا سبب النجاح يا شمعة ساطع نورا أهديك التهاني كتيرة ما مبتورة أستاذي الحكيم ما بِكره السبورة ينداح بالعلم ودايماً يكون في الصورة لعموم الأهل والأصحاب أبوي وأمي الكرام وإخوتي وأصحابي أهديكم نجاحي ومهجتي وأعصابي يا أهل الوفاء يا فرحتي وأحبابي إنتو أهل النجاح لو مرة صادف بابي تهانئ للجميع ووصايا أزف الريدة لي كل زول فرح وأهديهو أهديهو الفرح من قلبي جوه أديهو أديهو الجمال للروح أوصي عليهو عليهو يكون وفي ويتحب كان يهديو خاتمة التبريكات والتهانئ تبريكات منمقة بالورود والزينة ودفقة من الفرح وزخات رذاذ من عِينة مباهج لا تعد وريدة كامنة دفينة نجاحك يا ضناي أفرحنا فرحاً زينة تهنئة خاصة الخال قرشي الأمين والخالة آمال طه والأسرة الكبيرة والصغيرة، تهنئ الابنة «إسراء تاج السر محمد علي» بالنجاح لإحرازها «275» درجة مع أندى الأماني. ودمتم في رعاية الله ودوام النجاح والتفوق