الرياضة ليست كرة قدم وفقط لكن هناك مناشط أخرى ممتعة ومعترف بها وموجودة في البلد دي عندنا سلة بل وسلة السرور كمان أفريقيا كنا في منصات التتويج وعازة تطلق زغرودة التتويج وكانت سلتنا في منصات التتويج العربي ومهيرة تصدح بالحماسة وكنا نسبح دولياً وانجازات كيجاب العالمية تغني لها الحكامات فخراً وكنا نجري مارثونيا وهل ننسى خليفة عمر والكشيف وطبول العز تئن من فرط الحماس وكنا وكنا وكنا فأضحت السلة وبقية المناشط بعد كنا كان وأخواتها توقف النشاط فلا اتحاد يعمل ولا وزارة تسأل ولا حكومة تتدخل تسربت المواهب من بين اصابعنا وهاجرت فأضحت أصابعنا تشير لتلك المواهب بالبنان والإعجاب وأصبحنا نعض الأصابع حسرة على شبابنا الذي يرفع أعلام دول أخرى ولا زلنا نهتف في الفارغة لا تجد حراكاً في اتحادات المناشط الرياضية إلا أيام الانتخابات يتعاركون من أجل الكراسي يتحالفون برغم الخلاف الايدولجي لأجل المناصب يهملون نشاط اللعبة لأجل المناصب وينشطون في ساحات أخر يا من قتلتم النشاط في بلدي يا من وادتم المواهب في طموحات الصغار في مزابل النسيان أي فساد أكبر من قتل منشط كان يرفع علم البلد في شتى المحافل أي فساد أكبر من تحالفات شيطانية لأجل المناصب أي فساد تتحدثون عنه أكبر مما أفسدتم به النشاط أيها الناشط ابعد انت وامثالك عن المناشط اتركوها تنشط شرائحها من جديد وتتفعل لتتفاعل وتبدأ في الدوران لنا عودة مفصلة للمناشط منشط منشط إلا تطيروا تطيروا فوووووووو في الجو ده المهم خيراً فعل مجلس المريخ في الاستعانة بالرديف والكمية كبيرة ما شاء الله ولانها كبيرة وحتى نضمن حسن الرعاية وحسن الحماية نرجو تصعيد واحد من الجهاز الفني بتاعهم معاهم يكون فني ويكون إداري يدير شؤونهم يقعد معاهم بالمعسكرات فأهل المؤامرات كثر لدينا ولا يتركون أولاد الرديف في حالهم بالتأكيد سيحاول المتمردون إبعاد أولاد الرديف وتضييق الخناق عليهم ديل جهجهوا الأجانب عشان كده عاطف منصور أو جندي نميري يرفع مع الأولاد ضروري يا مجلس وأظنكم فهمتوني كويس اها الهلال جاب محترف برازيلي في الصورة كنت قايلو أبو المحترف البرازيلي لكن في السيرة اتحيرت زول لعب في تمنية وعشرين فريق لو لعب في اي فريق منهم سنة وبدأ الكورة عمرو اربعطاشر سنة يبقى عمرو الليلة اتنين وأربعين سنة الزول جابو كامبوس ولا صاحب كامبوس ؟؟؟؟؟ صدقوني الزول ده أكبر من كواريزما كواريزما بتاع كندشة الإعارة داك علي اليمين الزول ده شدة ما كبير يتخيل لي بكون أُمي ما حضر زمن مجانية وإلزامية التعليم المهم مازيمبي بقى يغلب ويكتل والله يستر أيها الناس الإنتباهة جات الاولى مقفلة كل المواد وقفلت المجموع كمان بعد كده مفروض تمثل السودان دولياً صدقوني إذا حصل حاتجيب لينا جوية جديدة ألف مبروك الإنتباهة ألف مبروك للقائمين على أمرها مبروك لكل مبدع ساهم يراعه في ذلك التتويج مبروك لكل من وضع بصمة في مسيرة أم الصحف السودانية وزهرتها مبروك للصحافة السودانية التي تنتمي إليها قمة مثل الإنتباهة اها نجي لي شمارات والي الخرتوم كان شفت يا والينا واحد بنى ليهو عمارة خرطمية طابق واقف جمبها يتفرج بعد التشطيب جا بتاع بحر ماشي سأل سيد العمارة دي بتاعت منو ؟؟؟ سيد العمارة ابتسم وقال بفضل الله بتاعتي بتاع البحر قال ليهو قديتنا هي لله هي لله آخرتها سويت ليك عمارة؟؟؟ سيد العمارة ابتسم وعاين للعمارة وقال هي برضو لله , يعني بدفنوها معانا !!!!!! سلك كهربا ننساك كيف والعمارة ما بتندفن لكن حسابها بعد الدفن والى لقاء .. سلك