سيكافا بطولة اقليمية وتخص منطقة شرق ووسط افريقيا والغرض منها هو رفع مستوى الدول الاعضاء في كرة القدم وهي ليست في قامة بطولات الكاف القارية ولكنها ايضاً ليست في قامة كاس الصحة وكاس الضلمة وسيكافا اتت اكلها حيث فازت فرق تنتمي لدول سيكافا ببطولات الكاف فازت بعد ان اعدت نفسها بسيكافا ودونكم قورماهيا الكيني والمريخ السوداني وحتى مازيمبي شارك في سيكافا فاعدته سيكافا ونال كأس الابطال افريقيا في نفس العام سنة الخمسة وبنسميها سنة خمسة سنة الخمسة بقت اشهر من الفيضان واشهر من مجاعة سنة ستة المهم كأس سيكافا لبن معلق في مشلعيب بالتأكيد من يناله ينال احدى الحسناوين من بنات الكاف لذا السخرية من سيكافا لا تأتي الا من كديس غلبو يلحق المشلعيب والكدسه الغلبها اللحاق بالمشلعيب كتار امثال مارين الصومالي والهلال السوداني والغريبة اكثر الاندية فشلاً في اللحاق بمشلعيب سيكافا اذا جمعت مشاركتهم في سيكافا تجدهم اكثر الفرق مشاركة وفشلاً في الظفر بها وهم هلال امدرمان تمنية ولا تسعة مرات هلال الجبال قريب ده هلال الشرق كم مرة كده هلال الجربوكس ذاتو شارك وطلع كيت وبمناسبة تأهيل مازيمبي للابطال بمشاركته في سيكافا سنة خمسة في سيكافا ديك مازيمبي انهزم من الزعيم اتنين من توقيع الراحل ايداهور من اتنينا ديك وللخمسة أيها الناس اذا اراد ناد ان يتطور ويفوز ببطولات الكاس الجوية اول حاجة يبطل استهتار ببطولات غالباهو عديل كده ويعترف بانو زيو وزي السهم اربجي وموردة التريعة والهدف شلعوها التكراب والاصدقاء ود سلفاب ونادي السروراب لانهم ديل كلهم ما جابوا شي للبلد دي ويمكن ديل كلهم يكونوا اخير من ابو الهل لانهم ما شاركوا في بطولات الكاف عشان كده ما جابوها وابو الهل سبعة وتمنين سنة يحاول محاولات مرات بالخمسات والستات والخمسات تاني من اندية تونس بس ولجت شباك الهلال حوالي المية وتمنين هدف ده غير الاهداف الوقفوها بعد دخول قاقرين بين الشوطين ايامو الكان في السفارة وعمل للتوانسة السفارة في العمارة قاموا وقفوا الاهداف احتراماً للعروبة واعلاناً لوقفة الشعوب العربية مع اشقائهم في فلسطين المهم اول خطوة هي يبطل استهتار ويعترف بانجاز الكبار الكبار الراكبين في لوح الشرف الافريقي ولوح الشرف الافريقي يذكرني بسفينة سيدنا نوح عليه السلام الما راكب فيها ضايع ضياع شديد والفائزون هم الراكبون المتحكرون في سفينته عليه السلام أيها الناس نمضي في سيكافا قدماً لاهداف نحن نعلمها جيداً شاركنا وكما سخر البعض لمشاركتنا في البطولة العربية تلك المشاركة التي قال عنها رودر انها للاعداد فسخروا ورددوا الموز ابو نقطة وبعدها طوالي شافوا لقطة شافوا طيارة فاتحة القزاز الناس بتتطنقع برفع القزاز نحنا طنقعتنا بفتح القزاز قزاز الطيارة في هلالاب قايلين قزاز الطيارة ما بفتح لما شافوها فاتحة القزاز ومشغلة الهزارد وسمع اضاني بتضرب في البوري بالطول بالعرض مريخنا يهز الارض دي كانت نغمة بوري الطيارة لذا نسخر من سخرية الذين يسخرون منا خجلة من وضعهم وصفرهم الكبيييييير الشفع ديل بدخلوا التعليم القبل المدرسي سنة زيرو صغير وسنة زيرو كبير والبعدها المدرسة الهلال لي اسي في زيرو كبييييييييييييييييييير سبعة وتمنين سنة في زيرو كبير سنة اولى لسه ابو الهل الولوف مولف على زيرو كبير أيها الناس إن تنصروا الله ينصركم أها نجي لي شمارات والي الخرتوم كان شفت يا والينا توسنامي لو قال جايينا بختنا وجد لينا يشيلنا يطير بينا في بلداً طيرا عجمي يرمينا نغير حظ يا والينا ونريحكم من السيل البقرض فينا سلك كهربا ننساك كيف ومدير المويه مبسوط قايل المويات دي تبعو والى لقاء سلك