* طعم (الغيم) في نهار رمضان أحلى من طعم (الغيم) في ليل رمضان .. * والسبب معروف .. * الزول الصايم يشتهي (الرطوبة) .. * والرطوبة المقصودة هى على الأطلاق .. * رطوبة مفتوحة .. * رطوبة في الجو ورطوبة في الجيب ورطوبة في المعنويات .. * ورطوبة الجيب من شأنها ان تجلب باقي (الرطوبات) .. * لو جيبك مُرطب بتجيك (الرطوبات) تجرجر أذيالها .. * وكلمة الرطوبات هى من بنات أفكار العبد لله .. * واى زول طبعا حر في (بنات أفكارو) .. * هنالك (غيم) اشبه ب(ضرع البقرة المليان) .. * غيم زي الضرع يحلب مطر ويبرد الجو ويروى الأرض والزرع .. * وهذا الغيم هو من عند الله والله سبحانه وتعالى مخير في (ماء السماء) يسقى بها من يشاء ويحرم من يشاء .. * بجانب هذا هنالك (غيم كاذب) .. * والغيم الكاذب هو (غيم المنى) .. * غيم الامنيات لا يصدق وقدر ما يشيل بيفرق .. * عشان كده مصطفى سيد أحمد عليه الرحمة غنى قائلا : (اخاف غيم المنى الشايل تسوقو الريح ويتفرق) .. * أقل ريح ممكن تفرق غيم المنى الشايل .. * وهذا يؤكد ان غيم المنى قاعد على الهبشه . * هبوب عابرة ممكن تشيل غيم كل امنياتك وتخليك قاعد في الصقيعة .. * وعندما تأتى سيرة غيم المعنى نتذكر الهلال .. * وللهلال سُحوب من الأمنيات وارتال وقناطير من الغيم في كل عام يسوقها الريح وتتفرق .. * في كل عام تلبد غيم الامانى سماء سيد البلد وقبل ان نجنى ثمر الامنيات تاتى الرياح وتسوقها فتصب في ديار مازيمبى او الترجى او الاهلى المصرى .. * وصدق هاشم ميرغني حينما غنى : (كل ما نشتل الافراح تجى الاقدار تمد ايد) .. * نحن في كل مرة نحلم ونشتهي الهلال بطلا لابطال افريقيا .. * وفي آخر العام تشتهي البطولة غير الهلال فيكون لنا الحزن والنحيب والتعاسة .. * ورغم هذه التعاسة المكررة إلا ان جمهور الهلال الحبيب في كل عام يندهش .. * وكورتنا عبر هلالها ومريخها قتلت الدهشة قبل سنين طويلة ومع ذلك نندهش .. * إحنا وأولاد حلتنا لا نرى سببا منطقيا يجعل اهل المريخ يندهشون من خروج فريقهم من التمهيدى .. * لان مشاركة المريخ في التمهيدى قتلت الدهشة وبالتالى لا يحق لهم الاستغراب حينما يخرج الفريق من التمهيدى .. * المريخ يشبه التمهيدى والسقوط يليق بالمريخ دوما .. * نرجع للهلال الذى يهمنا في هذه المساحة .. * امنياتنا مع الهلال هى امنيات تشبه (الموز الكاذب) او تشبه غيم المنى البتسوقو الريح ويتفرق .. * وهذا العام تحديدا نحن سنجعل (الريح) يستغرب لاننا ببساطة لن ننظر لغيم المنى .. * يعنى الريح لما يشيل غيمات منانا في الكنغو ما ح نحزن والريح ذاتو سيتغرب لماذا لم نحزن .. * في كل عام بنقول في الجرايد وفي الاذاعات وفي الونسة بنقول الهلال بيشيل الكأس وفي وقت الحصاد يخرج الهلال .. * ولذلك علينا ان نقول هذا العام ان الهلال لن يشيل الكأس حتى إذا شالو نتفاجأ وإذا لم يتحصل عليه نكون اكثر من عاديين .. * وحتى نكون اكثر صدقا مع انفسنا نقول : الهلال إذا حفظ ماء الوجه في مباراتي الكنغو يبقى ما قصر .. * بس نحفظ ماء الوجه .. * هذه امنيتنا .. * لان أبو الهل ما جاهز .. * وعلينا ان لا نغش انفسنا .. * اعداد الهلال ضعيف جدا والمباريات التى خاضها الفريق كشفت ضعف خطوطه الثلاثة هذا إلى جانب التصدع الكبير داخل الفريق مثل (الهبل) الذى فعله بكرى المدينة مع سيسية .. * لو في مجلس إدارة صحى صحى على بالقسم بكرى وسيسية ما بيسافرو مع البعثة إلى اديس .. * لو عندنا ادارى فاهم الاتنين ديل مطار الخرطوم ده إلا يشوفو في نشرة الاخبار .. * ناس إضاربو إثناء التمرين والضرب جاب دم .. * يفترض الكاردينال اول قرار يصدرو يبعد الاتنين ديل من معسكر اديس ورحلة الكنغو .. * لكن الكاردينال ما فاضى من الافراح .. * واوع تقول لي الهلال محتاج ليهم والهلال مقبل على مباراة مهمة .. * ما عندنا اى مباراة مهمة .. * ولا ح نشيل كأس .. * لكن يبقى العملو بكرى وسيسية هو فضيحة و(قلة أدب) كمان .. * والمجاملات في الحاجات الزي دى ما بتنفع .. * الهلال سيخرج من المجموعات لانه غير جاهز لانه لم يستفد من فترة التسجيلات التكميلية .. * الهلال في التسجيلات التكميلية سجل سيرجو وسيرجو هو أكبر من الكاردينال ذاتو .. * الحاج عطا المنان سجل لينا زول أكبر من رئيس النادى .. * غايتو جنس غايتو .. * لن يتقدم الهلال في هذه البطولة لان اديس خيار ما مناسب للمعسكر .. * وكامبوس قاعد ساكت لا بيجدع ولا بيجيب حجر .. * توقعنا إنو كامبوس يرفض معسكر اديس حتى لو يستمر في مباريات الدورى هنا .. * لأنو اصلا رمضان هو معسكر .. * لكن كامبوس قالوا ليهو اديس طوالى جرى ركب الطيارة .. * أ تقول اول مرة في حياتو يركب طيارة .. * يعنى هي بقت على الطيارة .. * و..و.. * واخاف غيم المنى الشايل ...(يجيب رعد) ..
