أكتب قبل مباراة الهلال والرابطة قدمت الهلال على الرابطة ليس لانه افضل منها بل لان الهلال هو المضيف والرابطة الضيف وليست الرابطة افضل من الهلال في شيء وان كانت فنياً افضل من ابو الهل في اليومين دي ولكن الامر عندي انهم سيان الرابطة والهلال سيان الاتنين ما جابوا شي من بره ونشهد لهما بسعيهما الشديد لجلب بطولات جوية للسودان ونشهد لهما برغبتهما الشديدة في اللحاق بالمريخ الذي يسكن لوح الشرف الافريقي متأنقاً ومتألقاً سودانيا وحيدا هناك وشأن الرابطة والهلال هو شأن جميع اندية السودان فهي جميعها تتوق لتحقيق ما انجزه المريخ قبل ربع قرن من الزمان ومن حق الرابطة والهلال وجميع اندية السودان ذلك الطموح وعلى قدر اهل العزم تأتي العزائم اعزموا شديد يا فرد المهم الرابطة ما هينة ولو قامت علي جنها بتغلب بتغلب المهم بعض الاهلة لسه بسخروا من سيكافا وعارفين انها غلبتهم لكن عاملين رايحين زي ديل بروحوا لي متين بعد ده بنوديكم التلفزيون خرج ولم يعد اوصافه كالآتي المرجو ممن يتعرف عليه تسليمه لاقرب نقطة شرطة او الاتصال بأهله علي الرقم صفر صفر صفر /صفر صفر صفر صفر صفر ما تروحوا تاني المهم مبادرة مريخية رائعة كانت فكرة تكريم السفير عبدالمحمود الرجل خلقه يكرمه وادبه يكرمه وعطاء الرجل يكرمه انه المريخ الذي يعرف قدر ابنائه وتكريم اهل الوفاء لاهل العطاء هو اشرف التكريمات والسفير عبدالمحمود شرف الوطن دولياً ودبلوماسياً وشرف الوطن كقيادي رياضي وشرف المريخ قطباً منيراً يزين جيد المريخ والتاريخ وتشرف به كل من عرفه وكل من عمل معه بل وكل من سمع به تمنياتنا لسعادة السفير بالتوفيق في الموقع الجديد فهو بالنسبة لسعادة السفير تكليف ولكن بالنسبة للسفاره تشريف فكم تشرفت به سفارات من قبل المهم إن شاء الله الرابطة تكون قامت علي جنها المهم واحد قال لي قرار الاتحاد الافريقي طلع قلت ليهو طلع فالصو ؟؟؟ قال لي طلع جد جد قلت ليهو وقالوا شنو ؟ قال لي قالوا اولا ابعاد فيتا تانيا اعلان تأهل الهلال طوالي بصرف النظر عن مباراة الزمالك ويقابل وفاق سطيف قلت ليهو وتالتا قال لي مافي تالتا قلت ليهو يبقي الكاف دقس والهلال اتلحس قال لي ليه ؟ قلت ليهو مفروض الكاف يقول تالتا على وفاق سطيف ان لا يحرز اكتر من تلاتة اهداف في شباك الهلال كان خلوها مفتوحة كده ناس وفاق سطيف ديل عندهم كورة الهلال زاغ منها قبل ستة سنين بعتبروا الكورة دي وديك جمع تأخير وعينك ما تشوف الا النور صاحبنا صنقع ودنقر وقعد يشخت بي رجلو في الواطه وقال لي بهظر معاك ساي ولا كسبنا الشكوى أيها الناس إن تنصروا الله ينصركم إن شاء الله تكون امس قامت علي جنها أها نجي لي شمارات والي الخرتوم والينا السحلية برضو بي بروتينا ولا بتقوم كمان تعضينا ؟؟؟؟ سلك كهربا ننساك كيف مع كيلو الضان ابو سبعين ده اخير بروتين القعونج والى لقاء
