قلت ليكم مشية أبو الهل ورانا دي زي مشية الشافع ورا ابوهو -الابو يقيف الشافع يقيف الابو يمشي الشافع يمشي بس بمشي ورا ابوهو ما بتجرأ يمشي قدامو بخاف تعادلنا في كوستي عصراً تعادلوا في شندي عشاءً غلبنا نيل الحصاحيصا غلبوا السلاطين غلبنا خمسة غلبوا اربعة ما بمشي قدام ابوهو ما بغلبو ستة مثلاً لازم يكونوا ورانا دي شبكة شنو دي يا اخوانا ؟؟؟ المهم مباراة كادوقلي هي مباراة اعلان البطولة لي سيدها مباراة بقاء البطولة حيث تقبع مباراة تأدب الكرة واعلان البطل الذي يستحقها فسيكافا عشان ما تقعد براها لازم الممتاز والسودان يكونا معاها بهناك اصلوا الموضوع صفر يعني الممتاز لو مشى هناك لا قدر الله «لاقدر الله دي قالتها فطومة الناطق في الاستديو التحليلي يوم مباراة المريخ والهلال» قال قناة قومية قال المهم الممتاز لو مشى هناك حا يستوحش حبس انفرادي لافي سيكافات يقعد معاها ولافي مانديلات يتقلوهو ولا في جويات يحكن ليهو العيشة بره كيف عشان كده براهو بعرف يختار وين يمشي القعدة مع الصفر زي القعدة مع الجقر ترمش ساي تلقاهو قرض يدك وهناك وكر الجقر الجد جد الجقر اللو سرختو يشيل شنطتو يمشي المدرسة المدارس البقت غالية دي جقر والله كان ضبحتو يضحي ليك في امانة الله يخت لحم صاح المهم محسن وبرهان يعلما جيداً اهمية مباراة كادوقلي وحتى وان اصبحت مباراة كادوكلي فاننا سننتصر لان الله لن يصلح عمل المفسدين وعلى اللاعبين ان يدركوا جيداً انها مباراة حصاد الموسم تلاتة نقاط ما تنقص نقطة يجيبوها في طيارتهم معاهم وناس جابوا الكاس في الطيارة من كيجالي ما بغلبهم يجيبوا تلاتة نقاط بالطيارة من كادوقلي دايرين نقفل الباب ده عندنا بشات وتسجيلات دايرين نتفرغ ليها برغم انو الموضوع انتهى مسألة وكت بس أيها الناس إن تنصروا الله ينصركم أها نجي لي شمارات والي الخرتوم كان شفت يا والينا شبكة تلفوناتنا بتشبه شارة قنواتنا طاشه من تلفوناتنا وترجف في تلفزيوناتنا وبتشبه شبكة الصراف الختفت بطاقاتنا يشيل قروشنا ويختف بطاقاتنا ويفجر الغضب في طاقاتنا وبتشبه شبكات الصرف الصحي الازكم انوفاتنا بتشبه كورتنا وقديد الخصوم لي شبكاتنا بتشبه شبكة الصياد البتفرتق منها سمكاتنا بتشبه شبكة مؤامراتنا بتشبه اداء احزابنا وحكوماتنا دي شبكة شنو دي يا باشواتنا ؟؟؟ سلك كهربا ننساك كيف والبلد كلها تغني اللي شبكنا يخلصنا والى لقاء
