استمتعت شديد باحتفال الهلال بكورال الصغار واقفين الحفلة كلها عبارة عن تكملة المشهد زينة يعني والكبار قاعدين على الترابيز الفخيمة ترابيز ساي لا موية ليمون ولا هزة كانون ما ذهب اليه الاهلة في كلماتهم كلام عقل وكلام كبير لكن مرات ببقى كلام الطير في الباقير مثلاً جعل النادي نادي شامل هذا فكر كبير ولكن التعبير كان ضعيفاً عن تلك الفكرة قال كردنة نحنا ما فريق كورة وبس نحنا فريق كورة وباسكت وهاندبول حتى هاند بول قالها هامبول دي عمك قوقل ما قدر يورينا ليها لكن خمناها الاعمال بالنيات ونية الكاردينال واضحة لكن يبدو ان كردنة مصر علي فعل شيء يريد حسب قوله ان يضع بصمة يحفظها له التاريخ ايها الناس هل يمكن ان يكون النادي شاملاً والدولة غير شاملة ؟؟؟ دولة لا تعترف بالمناشط الرياضية ولا تعمل على تطويرها ولا تسأل اتحاداتها عن نشاطهم ولا تدعم وعشان ما بتدعم يبقى بتخجل من السؤال فسودان كيجاب وسارة جاد الله والكشيف وخليفة عمر سودان ويليم اندريه والاعيسر وكأس العرب للسلة ليس سودان اليوم البعيد كل البعد عن مجرد المشاركات الدولية والاولمبية ايها الناس نبقى زي كردنة نعمل فريق قدم وباسكت وهمبول وهامبيرقر ذاتو ان كان التعبير قد خان كردنة فالقصد كبير وجميل واشد على يد كردنة للفهم الكبير ايها الناس البلد دي ما فيها زول مسؤول بعمل لينا همبول ؟؟؟ ايها الناس تلوك الالسنة خلاف عبدالصمد وصديق ولكن ان كان هناك سيستم اداري واضح ولوائح مضبوطة ما بكون في خلاف ولا مشاكل لكن العمل بطريقة عشوائية يقود دائماً للخلاف والاختلاف لذا نتمنى ان تضبط اللوائح والنظم العمل الاداري في المريخ سئمنا وهرمنا من الخلاف والاختلاف لان النادي يدفع الثمن وحيداً ايها الناس التخصص وتقسيم العمل من اهم عناصر نجاح العمل الاداري فنرجو شاكرين ان تحدد الاختصاصات والواجبات ونرجو شاكرين ان تتابع الاعمال بشفافية ونرجو شاكرين ان نتجنب القرارات الفردية الوقتية السريعة ونرجو شاكرين ان تبيض القلوب وتتحمل بعضها البعض لاجل مريخ يعشقه الناس ايها الناس قال الكاردينال بالحرف الواحد نحنا ما عندنا معارضة ولكن عندنا ناس بتسئ فينا الراجل ده بقول كلام زي العسل بس التعبير بخونو دائماً ودعا كردنة الصحفيين المعارضين للحضور للنادي وقال ليهم تعالوا حجوا الصغار ديل باحاجي الهلال زمان وهي دعوة عاقلة من رجل يقود الكيان بتواضع ايها الناس في احتفال الهلال كان كأس الممتاز وحيداً يا كافي البلا لا جوية ولا عربية ولا سيكافية ولو كان هذا الاحتفال مريخياً كان حوض السباحة اتملا كاسات مانديلا ودبي والشارقة وتلاتة سيكافات وبرغم ذلك يطلب كردنة من الاهلة ان يحجوا الصغار بالهلال يحجوهم بي شنو يا كردنة؟ يحكوا ليهم قصة فاطمة السمحة وساندريلا والبعاتي ؟؟؟ ولا قصة ذات الرداء الاحمر؟؟؟ حجى ما عندكم جماعتك ديل يجوا يتكلموا مع الصغار في يوم باكر بس يفهموهم انو يوم امس صفر كبير المهم كردنة قال امر ازالة نادي الهلال طلع طبعاً علل ذلك بانو في تشييد للنادي الجديد عرفتوا ليه انا كلو يوم بقول لي روشا عازمك جبنة في نادي الهلال ؟؟ الازالة حاصلة لكن ما اعتقد اعادة التشييد هي السبب السبب انو النادي مسيطر عليهو فصيل عبدالواحد ليهو سنين ايها الناس إن تنصروا الله ينصركم اها نجي لي شمارات والي الخرتوم كان شفت يا والينا المولد قرب يجينا بالدين مافي زول بدينا بالشيك مافي زول بدينا نختف ونجري يا والينا ولا نفهم صغارنا انو المولد بدعة جات لينا سلك كهربا ننساك كيف وزمان بنجيب للولد حصان وعروس اسي لو عندك دبابة بتجيب لي ولدك دبابة وبندقية ولو ما عندك بتجيب ليهو الضغط. والى لقاء
