بمشاركة الموسيقار يوسف القديل الدامر - خالد الفاضل في أجواء تمازجت فيها أحاسيس الحب والحزن احتفل حواتة الدامر بالذكرى الرابعة لمطرب الشباب الراحل الكبير "محمود عبد العزيز" وامتلأت جنبات حديقة الدامر يوم (الخميس) الماضي، بمحبيه ومعجبيه، منذ وقت مبكر وصدحت موسيقى أغنيات الراحل وسط تفاعل جميل وتجاوب من خلاله الحواتة بالتعبير عن وفائهم لمحبوبهم الأول بمرافقة الموسيقى في ترديد الأغنيات.. وشرَّف الاحتفال وزير السياحة الولائي ومعتمد محلية الدار ووفد من مجموعة "أقمار الضواحي القومية"، وعلى رأسهم الموسيقار "يوسف القديل" وشارك عدد من المطربين من الدامر والخرطوم وبورتسودان. قصة إيهاب "الطيب المصباح" معتمد محلية الدامر أثار حماسة الحواتة عندما ابتدر حديثه بتقديمه لطلب للانضمام لمجموعة الحواتة قائلاً: (أنا من اليوم ضموني معاكم لمجموعة "محمود في القلب" و"أقمار الضواحي" واعتبروني منكم)، واسترسل في الحديث عن الراحل، معدداً مآثره ومواقفه الإنسانية في أعمال الخير. وقال: (محمود كان راجل خير وبحب عمل الخير)، وسرد المعتمد موقفاً مع الراحل في وفاة شقيقه "إيهاب عبد العزيز" بحادث حركة بالمملكة العربية السعودية، وهو الشقيق الأصغر ل"محمود". وقال: كنت وقتها في المملكة العربية السعودية وتصادف وجودي بمكان الحادث، وعرفت أن المتوفي هو "إيهاب عبد العزيز" فقمت من فوري بالاتصال تلفونياً بالراحل، ويضيف المعتمد: (محمود شاف الرقم قال لي: أنت ضارب من السعودية؟ قلته ليهو: أيوه، صاح، وقلته ليهو: أي زول بموت وأي زول عندو يوم، المهم قال بقيت بتكلم معاهو مسافة، قام "محمود" قاطعني قال لي: "إيهاب" حصل ليهو شيء؟ قلته ليهو: "إيهاب" انتقل إلى ربه، قال لي: لا إله إلا الله محمد رسول الله. و"محمود" كان زول صابر). محمود قدوتنا رئيس الحواتة قال: نحن سعيدون كل السعادة بهذا الجمع الكبير وشاكرين ومقدرين لكم، وأضاف: (مفروض نحنا ما نشكركم، أنو أنتو ما جيتونا نحنا ولا نحنا جبناكم، حبكم للحوت وسريانه في دمكم هو الجابكم، ونحنا إن شاء الله ح نواصل في كل أعمال الخير. والحوت كان رجل خير ونحنا نعتبره قدوة لينا في عمل الخير، عشان كدا يا حواتة أبقوا الصمود ما تبقوا زيف). القديل يشارك الموسيقار الكبير "يوسف القديل" شارك في الليلة بالعزف مع الفنانين الذين تغنوا بأغنيات الراحل "محمود" وهم: الفنان الشاب "حسن الطاهر" المشهور ب(حوتة) والفنان "مجذوب الركوش" ورددا أغنيات (لهيب الشوق)، (خوف الوجع) و(برتاح ليك) وغيرها، وأجادا وأبدعا في الغناء وتفاعل معهما الجمهور بصورة كبيرة. تكريم من خلال الاحتفال تم تكريم السيد معتمد الدامر اللواء "الطيب المصباح" ووزير السياحة بالولاية والموسيقار "يوسف القديل ".