فقط لناس الشمارات..!! خالد حسن لقمان بالأمس أرسل لي ابن عمي "محمود جعفر لقمان" المحامي المعروف قصة أوقعتني من الضحك.. تقول إن رجلاً كبير السن قدم خمسين جنيهاً لكمساري حافلة ركاب فأرجع له الكمساري الباقي عبارة عن أربعين جنيهاً من فئة العشرة جنيهات فأمسك الرجل بثلاثة منها وأرجع الرابعة للكمساري قائلاً له: (غير العشرة دي).. ولأن العشرة كانت جديدة سأله الكمساري عن السبب فقال له الرجل: (بس رجعها إنت عارف وأنا عارف).. هنا انتبه الركاب وفحص أحدهم الورقة وكانت غير مزورة فعاد الكمساري يسأله: (طيب ليه ما عايزها يا عمنا).. قال له الرجل: (بكلمك لما نصل المحطة الأخيرة..).. هنا اندفع أحد الركاب وقال له: (طيب نحن ذنبنا شنو ياخي.. نحن ما واصلين آخر محطة وعايزين نعرف).. وراكب آخر نزل محتجاً ولكنه أعطى الكمساري رقمه وقال له: (أديني رنة بس).. شابان نزلا ساخرين ولكن أحدهما قال للآخر: (في بالك السبب يكون شنو..؟؟)، صاحبه لم يتحمل الموقف فركب الحافلة التالية لآخر محطة وبعد تعب وجد الرجل وسأله عن السبب فقال له: (أمشي أسأل الكمساري) وبعد مشقة وجده وسأله، فضحك الكمساري وقال له: (عمك شال العشرة وقال لي: عشان تعرف الناس بقت بتاعت شمارات كيف..!!).
