كان حاج احمد في زيارة لشنباوي وكانا يجلسان في الصالون يتحدثان ويتسامران فحملت اليهما فوزية صينية الشاي وعندما إقتربت من الباب سمعت شنباوي يقول لحاج احمد دي طويلة وبيضاء وجميلة!! فسأله حاج أحمد: وكلمت فوزية!! فرد شنباوي: أبداً.. أنا مخليها ليها مفاجأة اكيد حتفرح!! فقال حاج احمد.. وحتجيبها متين! فرد شنباوي: يوم الخميس ان شاء الله ولم تستطع فوزية التحمل أكثر فرجعت ووضعت كبابي الشابي على المنضدة وجلست منهارة إذن فقد قرر شنباوي الزواج عليها ولكن فجأة كدا وبدون مقدمات وهي عمرها ما قصرت معاهو في حاجة!! وبعد قليل خرج حاج أحمد ودخل شنباوي على فوزية فوجدها غاضبة جداً فسألها ببراءة فوزية في حاجة! ردت بغضب: أيوه في مدام انت قررت تتزوج واحدة طويلة وبيضاء وجميلة قاعد معاي لشنو!! فقال شنباوي بإندهاش: أنا اتزوج عليك يافوزية منو القال كدا! فردت بنفس النبرات: سمعتك بي أضاني وانت بتكلم حاج احمد وبعدين فارقة معاك بشنو مادام حتتزوج انا حا اطلب الطلاق ومن بكرة.. فضحك شنباوي وقال لها: ما تبقى عبيطة وتخربي بيتك عرس شنو وكلام فارغ شنو فردت بضيق: شوف ما تحاول أنا حا آخد الأولاد واسافر لابوي في مدني مش العرس يوم الخميس يبقى ريحناك من الإيجار وجيب العروس هنا لأني ما راجعة تاني.. فقال شنباوي بهدوء: ما عندي مانع اطلقك بس انتظري لحدي يوم الخميس عشان عندك حاجات تخص الأولاد حاجيبا ليهم كان نفسهم فيها من زمان!! فردت فوزية بضيق: عشان الأولاد حا انتظر لحدي الساعة اتناشر ضهر وبعدها حا اسيب البيت فضحك شنباوي وقال لها موافق يا ستي وجاء يوم الخميس وكان الأولاد في إجازة فجهزتهم فوزية للسفر وعند الحادية عشرة سمعت فوزية عربة وقفت امام الباب وقام شنباوي وفتحها وقال لمن بالخارج: يلا دخلو العروس!! وكانت مفاجأة غيرة متوقعة إذ كانت ثلاجة جديدة وبيضاء وطويلة فعلاً كما قال شنباوي فصاحت فوزية من الفرحة: ياهادي العروس والضرة والله دي ضرة الهنا والسرور وياريت كل يوم تجيب لي ضرة وعروسة زيها! وسمعت حاجة كلتوم ما حدث فقالت بضيق يا يما الضرة التضرك في شحكم وبطنك الكبيرة دي وكان الما بتسمى جايب ليك ثلاجة عشان تشربي تشربي الزاد المابتزاد ان شاء الله ياهارية كبدتي.. يوميات ساخرة - الوطن [email protected]
