بعد اختيار شنباوي من حيّهم ليواجه ابو علي العجلاتي في سباق الدراجات .. أصبح شنباوي محط للأنظار واهتمام كل أهل الحي كيف لا وهو سيرفع رأسهم عالياً إن فاز في السياق .. وكان لفوزية رأي آخر فما أن رأت شنباوي حتى صاحت في وجههه.. ياراجل ورطة شنو الورطنا ليها دي انت ِحمل السباق ولا قدرو.. يا راجل انت شبرين والقبر!! فنظر اليها شنباوي في صمت وبعد قليل طُرق باب الشارع فذهب شنباوي بنفسه ليفتح فوجد سالم ابن حاج خضر الجزار يحمل كيساً كبيراً وقال له ابوي بقول ليك شد حيلك يا بطل وهو مرسل ليك ثلاثة كيلو ضأن وكبدة وكوارع عشان ترفع لياقتك وهو مستعد لأي طلبات تطلبها! فحمل شنباوي الكيس وسلمه لفوزية التي سمعت كل شىء فشعرت بالخجل الشديد وقالت لشنباوي: ارتاح انت يا ابو سعد وأنا حاجهز ليك أكل تأكل صوابعك معاهو.. والمرا كان ما وقفت مع راجلا في الأمور دي حا تقيف معاهو متين!!. فضحك شنباوي وقال بسخرية: طبعاً ما أنا بيني وبين القبر شبرين!! فردت عليه بسعادة قائلة ما تبقى قلبك اسود: أنا خايفة عليك يا أبو سعد!! وهنا طُرق الباب فأسرعت فوزية وفتحت الباب فوجدت به حسن ود حاج بابكر صاحب البقالة يحمل كيسين كبيرين وقال لها قولي لبطلنا أبوي بقول ليك اهتم بصحتك وهو مرسل ليك لبن وعسل نحل أصلي وعصائر عشان تقويك.. ويقول ليك هو في الخدمة بس إنت تطلب !! فأسرعت فوزية وقالت قول لحاج بابكر شنباوي وبشكرك وبقول ليك هو في حاجة لسكر وسمن ودقيق عشان صحتو تعبانة وانا حا أعمل ليهو اكلات خاصة عشان تقويه.. فرد حسن بحماس: نص ساعة والحاجات دي تكون عندك ايو قال لو طلبنا طلب السوق كلو حيجيبو ليهو!! فدخلت فوزية بالكيسين وكان شنباوي قد سمع كلامها مع حسن فقال لها بغضب .. يا ولية متين أنا قلت ليك عاوز سكر وسمن ودقيق انتي بتشحدي باسمي!! فردت بحماس: ابداً لكن انت بتمثل الحلة كلها ولازم يساعدوك ويقيفو معاك! وبعد قليل حضر حاج أحمد وهو يحمل معه كيسين مليئين بالفاكهة وقال لشنباوي : دا تفاح وبرتقال عاوزك تقوي بيهم عضمك ونحنا في الخدمة.. فقالت فوزية بينها وبين نفسها والله السباق دا كل خير.. كتر خير أبو علي العجلاتي الإختار شنباوي لينافسو وما عارف الخير الدفق علينا من وراهو صحي وعسى ان تكرهوا شيئاً وهو خير لكم!!. يوميات ساخرة - الوطن [email protected]
