أهم حاجه عشان تقدر تعيش هي الاكسجين .. والاكسجين ناس ال( بوتني أو علم النبات ) قالوا بيطلع من الشجرة ... الشجرة بطلع منّها ثاني اوكسيد الكربون بالليل ( عملية الأزوت الجوي ) ... حبوبات البلد دي قالوا ماتنوموا تحت الشجره بالليل عرفوها كيف ؟ الله أعلم والشجرة عاوزه موية عشان تعيش والموية موية جوفية أو أمطار والموية بتطلع من البير بالكهرباء ...والكهرباء بتطلع من خزان الرصيرص يعني من الموية ذااااتها عشان كده عملوا الفواتير مع بعض أهلنا ديل ... أذن الموية والكهرباء مافي واحد مستفيد من التاني عشان كده قللوا الصرف ودمجوا وخرمجوا و واحد منّهم ح يغش التاني الجنيه السوداني عاوز دولار والدولار عاوز بترول والبترول قافلوا باقان وباقان راجل سكران ( علي حسب كلام جريدة كده ) والسكران في ذمّة الواعي هسّه الواعين بقوا حبّه والحبّه بتبقي قبّه وظهرت لي محبّه في مدني شارع القبّه والواعي في ذمّة الشعب والشعب كلووو عاوز عربية لونها أبيض والسمسار ( الشايل قشّه ) ده النوع الأصلي بقول السمسار : العربية الأتوس أحسن من المارسيدس كيف ؟ الله أعلم و العربية اللونها أبيض مرغوبه أذن : الشعب كلووو يسوق عربية لونها أبيض يعني ده شارع زلط وللا صلاة الجمعة .. ! البلد دي خاربنها خمسه ح اوريكم منّهم أربعه بس ح أكتب تلاته لكين هسّه متذكر منّهم اتنين : (السماسرة)( الماعندهم) (شغله ) ( يقضوها ) ( ديل) ! الخمسه ديل بلعبوا بينا ياخ ياخ ياخ يخمّس قيدكم .. كسرة : الكلمة بتاعت يخمّس قيدكم القلناها للسماسرة دي معناتها شنو ؟ الكاتب : د.عاصم بكرى
