تعاقد المريخ مع (DHL) انعكس في هدف بويا الذي جاء عبر خدمة (البريد السريع) الحضري (خالعو) الهلال....مع الاهلي المصري (فريق القرن) الحضري انضرب ثلاثية في ام درمان. الحضري قالوا بعد هذه الثلاثية ...مسك ليك (شادي محمد) سمع ليه مقرر سنة رابعة كلو. حرف ...حرف. الجغرافيا ما رحمو فيها. شادي محمد من الزرزرة ...لمن بقى زي (بلة جابر). الاهلي المصري فريق القرن ..اتهزم (ثلاثة) من الهلال. عشان كدا الحضري دا جاء السودان وفي رأسو الهلال ....ما مصدق انو لعب ثلاث مباريات مع المريخ امام الهلال ولم يخسر. حكاية (الثلاثة) دي ذاتو لخبطتو. الحضري استغل حكاية انو لم يخسر امام الهلال في (تعاقده) مع المريخ ...ومسك ليهم الحتة دي (لبانة). عارف ليك الجماعة ديل نقطة ضعفهم في الدنيا دي (الهلال). بقى يمشي مصر ...يعمل حوار في قناة الحياة ..يقول بعين قوية : (انا دا ما خسرتش امام الهلال). المقدم يقول ليه والله انت صعب عديل كدا ..ثلاث مباريات امام الهلال لم تخسر!!. يرجع السودان ...يعمل حوار في الغراء الصدي مع ناس مزمل ابوالقاسم ...يقوم يهجم ليك ناس مزمل ابوالقاسم ويقول ليهم : (دا انا ما خسرتش من امام الهلال). ناس مزمل يقولوا ليه والله انت ما ساهل ..دي عملتها كيف؟. يرجع مصر ...يعمل حوار مع صحيفة اليوم السابع يقول فيه بالبنط العريض : (دا انا ما خسرتش من امام الهلال). لا ..لا ..صعب يا ولد. يرجع السودان يلقى ناس معاوية الجاك (فرحانين) منتظرينو في المطار ..يقوم يعمل حوار معاهم في صحيفة (الزعيم)...يقول ليهم فيها : (دا انا ما خسرتش من امام الهلال). جمال الوالي طوالي يطلع ليه حافز. يقوم يرجع مصر ...(ما تعاينوا لي كدا ...الحضري اصلو كدا الخميس في مصر ...والسبت في السودان). في مصر يعمل حوار مع قناة دريم ...يقوم يقول ليهم شنو؟. يقول ليهم : (دا ما خسرتش من امام الهلال)...المصريون يختوا ايديهم في رأسهم ...يقولوا معقولة دي؟. يرجع السودان. عشان شنو؟. عشان يعمل حوار مع هيثم كابو في قناة النيل الازرق ..يقول فيه دا انا ما خسرتش من امام الهلال). الدور وين؟. الدور يرجع مصر ...يعمل حوار مع قناة المحور ...عشان يقول شنو؟. عشان يقول : (دا انا ما خسرتش من امام الهلال). زولكم شغال كدا زي (ماكينة) الحياكة...من القاهرة للخرطوم ...تقول (طرد). الحضري طبعا فرحان في انو في ثلاث مباريات امام الهلال فاز مرة واتعادل مرتين ..(شايف الحكاية دي اعجاز ما بعدو اعجاز). بعدين الموضوع في حد ذاتو ...خالع ليك المريخاب ...(الحضري ما خسر امام الهلال). وين يختو...ما عارفين. دا ما خسرش امام الهلال يا جدعان. حكاية الحضري دي ممكن (محمد كمال) القاعد في الحصاحيصا دي يعملها. الموضوع ما (مستحيل) للدرجة دي ..ما كورة ...يعني شنو؟. لكن الحضري بفهلوة المصريين ...شغل ليهم الاسطوانةت(دا انا ما خسرتش من امام الهلال). بيني وبينكم الحراس لمن يكبروا في السن ...بحصل ليهم مثل هذا (الخرف). يعني الواحد ممكن يكون ما عندو اي حاجة ...يقول ليك انا عندي (جيوب انفية). جيوب انفية ..انت الكورة قالوا ليك (شمها)..وإلا قالوا ليك (امسكها). شوفوا الكضب. ممكن ...بعد تجاوز سن الاربعين بالنسبة لحراس المرمي يحصل ليهم شيء من (الزهايمر)...وارتجاج (فني) في المخ. مع اقتناعتنا ان الحضري مع المريخ شغال بدون (مخ)...بخلي مخو في القاهرة..وبجي يقسم مع ديل بالشنكارات. فاكرنها انتوا صعبة. الموضوع عادي يا شباب. الحضري لقى حكاية(دا انا ما خسرتش امام الهلال) ، ماشه معاه باسطة. الجماعة بتاعننا ديل من يقول ليهم كدا ...يطلعوا ليه (حافز). الود اشتغل على الحبل دا. عاوز (50) الف دولار. عشان شنو يا الحضري؟. عشان ما خسرتش امام الهلال. يغيب اسبوع ...ويقول ليهم ...عاوز ابدل الشقة. ليه يا الحضري؟. (دا انا ما خسرتش امام الهلال). على عدم الخسارة من الهلال ..يبدلوا ليه (الشقة). يصبر يوم ..يومين...ويقول ليهم عاوز (10) الاف دولار. ليه يا الحضري؟. (دا انا ما خسرتش امام الهلال). يدوه العشرة الاف دولار. اليوم التاني يقول ليهم ...عاوزكم تكبروا لي مساحة حوض السباحة شوية. ليه يا الحضري؟. (دا انا ما خسرتش امام الهلال). يكبروا ليه مساحة حوض السباحة. الاسبوع التاني ...يقول ليهم غيروا لي موية الحوض بماء معطر. ليه يا الحضري؟. (دا انا ما خسرتش امام الهلال). غيروا لي العربية. ليه يا الحضري؟. (دا انا ما خسرتش امام الهلال). معليش (الرز) البتجيبوه لي ..عاوزكم تلونوه ليّ. ليه يا الحضري؟. (دا انا ما خسرتش امام الهلال). يجيبوا ليه الرز ...ويلونو ليه. انا عاوز تورتة. ألت ايه؟. لتلكم ..عاوز تورتة ..هسع دي الوقت. ليه يا الحضري؟. (دا انا ما خسرتش امام الهلال). عادل ابوجريشة ...يجيب (التورتة). عاوز لي حمام محشي قطن طويل التيلة. ليه يا الحضري؟. دا انا ما اخسرتش من الهلال. يجبيوا ليه الحمام محشي قطن طويل التيلة. عاوز بطيخ (اصفر). ليه يا الحضري؟. دا انا ما خسرتش من الهلال. عاوز قنقر روسي !!. ان شاءالله تجيبوه من زحل ..(دا انا ما خسرتش من الهلال). يجيبوا (القنقر)..ويروسوا ليه بيه في المقرن ...عشان شنو؟. عشان يبقى (روسي). يا جماعة ما تسرحوا ...(انا عارفكم مركزين في الخروف والمرارة وحق الخروف)...ما فاضين لي. الحضري يقول ليهم ...عاوز بامية مفروكة بي ماء الورد. ليه يا الحضري؟. (دا انا ما خسرتش من الهلال). الحضري يقول ليهم ..عاوز (شنكار) مكيّف ..ينور براهو ..منو وليهو. ليه يا الحضري؟. (دا انا ما خسرتش من الهلال). المريخاب جاتهم نفسيات من الحكاية دي. الحضري ...مسك ليهم حكاية(دا انا ما خسرتش امام الهلال) وتاجر بيها تجارة شديدة...لمن دايرة الكورة بقت زي (القصب). كلهم شغالين عند حضرتو. ناس الهلال ...قاعدين متابعين الوضع من بعيد. ما عاجبهم البعمل فيه الحضري دا ...(ناس الهلال ما بحبو الحقارة)..والحمام المحشي. طبعا الحمام المشي دخل في السطر الفوق دا ساكت ...ما عندو اي رابط. الهلالاب قالوا : ايوا ..كدا يعني يا الحضري!!. كدا يا ابوالشباب. عمر بخيت كابتن الهلال ...قال ليهم جيبوا لي (ملف) الزول دا عشان نشوف حكاية (دا انا ما خسرتش امام الهلال)...وجيبوا لي مع الملف (عجورة). قالوا ليه يا عمر عرفنا (الملف)...العجورة لي شنو كمان؟. قال ليهم العجورة دي للطريقة التى سوف اسجل بيها الهدف. جابوا ليه (الملف). وجابوا ليه (العجورة). اوعكم يا جماعة تشيلوا (عجورتي) دي للمرارة. دي عجورة عمر بخيت ..ما تلومونا مع عمر ساكت. عمر بخيت اجتمع ليك (4) ساعات بعبداللطيف بويا. فتكروا ليه؟. ما تقولوا لي عاوزين يناقشوا مشكلة الشرق الاوسط. ابدا طبعا. ما تقولوا لي عاوزين يشوفوا حكاية (رفع الدعم من المحروقات). ابدا طبعا. ما تقولوا لي عاوزين يفصلوا فاتورة الكهربة من فاتورة الموية. خلوها لينا (مخلقنة) كدا. زي الشافع اللابس جلابية ابوه ...(وعامل فيها كبير). نهايتو كدا عمر بخيت دا اجتمع ليك بي (بويا) عشان يناقش معاه ملف الحارس الاربعيني دا. عبداللطيف بويا قال لي عمر بخيت ...عاوز لي (4) روس ..قاطعين. عمر بخيت قال ليه العجورة عرفناها ...(الروس) لي شنو يا بويا؟. بويا قال ليه (الروس)..عشان يشيلوا (جلد الخروف) بعد الضبح. معليش يا جماعة..مرات بحصل تداخل بين هدف بويا ...والضحية. اصلى الايامات دي مركز مع (الضحية) عصام الحضري. قال شنو؟..قال عندو (جيوب انفية). المهم اجتماع عمر بخيت وبويا ...انبثقت منو لجان كتيرة. وتحدد بصورة قاطعة حكاية(دا انا ما خسرتش امام الهلال)...ووضعت خطة لمكافحة هذا (الاستنكاح). وامعانا كدا في الحتة دي قرروا يضربوا ليك الحضري دا من بعيد ...عشان يفهم حاجة. بويا قال لي عمر بخيت ...ما عندك اي قضية ...انت جيب ليك هدف في الحضري يسأل منو براهو (وممكن باسكال يشاركو في الذنب) ..وانا خلي لي الباقي ..بجيب ليك فيه هدف من جناين الباوقة...يسأل منو شخصيا. هدف من الباوقة هو هدف وإلا تفاح؟. الحاجة التانية الما قلتها ليكم في اهداف عمر بخيت وبويا ..وقبل كدا اهداف مهند الطاهر في الحضري ..انها اهداف كلها جاءت من بعيد. عارفين ليه؟. عشان الشركة الراعية. شفتوا كيف؟. كلها اهداف عبر خدمة البريد السريع ...(اهداف من سقط لقط). قلت ليكم قبل كدا. قعدتوا تغالطوا. قلت ليكم نحن اي حاجة عندنا بي نظام. نحن ما عندنا حاجة ساكت. ما تقعدوا تشهقوا لي كدا ...(العندو خروف ما اشتراهو يمشي عليه). الحضري لاحق. الحضري دا ما بضحي ليكم. عارفين ليه؟. عشان عندو (جيوب انفية). جيوب انفية يا وحش افريقيا. اول مرة اشوف لي وحش عندو جيوب انفية. من الله خلقكم ..شفتوا ليكم (سد عالي) عندو (جيوب انفية). على كدا بكرة (جبل الجليد) ممكن يقول عندو حمى (تسنين). الخلاصة يا جماعة. لعنة الشركة الر اعية اصابت المريخ ...(دا حقنا). شيل في قروش الغلابة ..وتكبوها لي ناس الحضري. يكبوا في القروش للمريخ باللفة. من غير زول ما يشعر. قال شركة راعية قال. شركة راعية على شنو؟. فريق مضروب (17) مرة في الممتاز من الهلال مقابل (6) انتصارات له ...يرعوا ليه شنو يا ناس ال(DHL). شفتوا عشان حركاتكم دي ...نحن بقينا نسجل من بعيد ...بالبريد السريع. هدف عمر بخيت جاء (سريعا) من الاقاليم. يعني من الولايات. عشان كدا هو هدف فيه شوية (بداوة). وهدف عبداللطيف بويا ...جاء من برة البلد...وبرضو عبر ال(DHL). عشان شنو؟. عشان تاني ما تقولوا لينا شركة راعية. وعشان الحضري ما يقول انا ما خسرتش امام الهلال. اها تاني يا الحضري تقول شنو؟. تاني ما عندك طريقة غير انك تقول عندي (جيوب انفية). عليك الله هسع انت بي جيوبك الانفية دي فرقك شنو من فاروق الفيشاوي. يا احمد الحاج ..عليك الله مع صورة الحضري جيب لي صورة فاروق الفيشاوي. شوفوا الشبه. شبه شديد. واحد بمثل في المسرح والسينما...والتاني بمثل في الميدان. كلهم بمثلوا. قبل اهداف عمر بخيت وبويا ...كان مهند الطاهر قد دشن (الشركة الراعية) دي ال(DHL)...في الحضري ..في مباراة قمة سابقة. والله يا جماعة ..الشركة دي ما ح تقسم معاكم. ظاهر عليها كدا ح تشربكم. والممتاز كمان ح يطير منكم. اسمعوا كلامي دا. احسن ليكم يا مريخاب ..ركزوا في الدمازين. ركزوا في كأس السودان ...الممتاز دا ما عندكم فيه نصيب. خلاص ...موضوع انتهى. الممتاز دا حقنا. والكلام دا تاني ما بنكرروا ...(عشان ما تنتبهوا). بس اكيد ح نتلاقى بعد ما نشيل الممتاز. نتلاقى ان شاءالله في الدمازين. بالمناسبة. قولوا لي الحضري (الدمازين)...دي اخطر من (عطبرة). عشان يكون عارف. الحضري بعد هدف بويا ...هسع (طفش)...واتخارج من البلد. بقوا يزور البلد دي بي (تقارير طبية). ملحوظة : والله العمود دا عاوز ليه (مطر) عديل كدا. هوامش الهلال عبر طرق رسمية عليه ان يطرق باب الاهلي شندي منذ الان من اجل التعاقد مع فارس عبدالله. ونتمنى كذلك مالك اسحق ...وباسيرو. وباسيرو مطلق السراح...يعني الموضوع ما فيه صلاح ادريس يا البرير. اما عن فارس..فلا اعتقد ان صلاح ادريس سوف يبخل به على الهلال. اتشاكلو في شكلكم ...لكن الهلال الكيان ابعدوه عن مشاكلكم الشخصية. والامين البرير من اجل الهلال ممكن يفاوض اي زول ..ويقعد مع اي زول ..ويعمل اي حاجة. اذا كنا نريد هلال قوي ...ونبحث عن بطولات خارجية ...لا بد من تسجيلات قوية. تراوري لا بد من اعادة تسجيله في الهلال. الكاردينال ...هذا العام ممكن ان يساهم بصورة قوية وفعالة في التسجيلات. وطه علي البشير ينتظر منه مساهمة قوية. اما صلاح ادريس فما نريده منه هو فارس عبدالله...ومالك وباسيرو. صلاح ادريس فرط في فيصل موسي وكاد في التسجيلات الماضية ان يهدي باسيرو للمريخ. جماهير الهلال تريد من صلاح ادريس ان يقوم بالواجب. التسجيلات القادمة لا بد ان يبعد الهلالاب خلافاتهم ..وصراعاتهم. ممكن تهدوا اللعب الي ان تنتهى فترة التسجيلات. عبداللطيف بويا قريب فارس عبدالله..وممكن بويا يساعد في المفاوضات. ادارة الاهلي شندي بقيادة العقيد ...والجهاز الفني بقيادة الفاتح النقر ودائرة الكورة بقيادة عبدالمهيمن ...وطبيب الفريق ابشر ..والراعي صلاح ادريس ...عليهمتتان يساعدوا في هذا الامر بدلا ان تذهب درر الاهلي شندي الي المريخ. هسع في لاعب من النيل الحصاحيصا بجي الهلال. ضفر بعد ما حلف ..اتحول الي المريخ. والله الحمدلله. فارس عبدالله ...يشبه الهلال. ودفاع الهلال بعد تسجيل مالك اسحق ح يكون فيه مالكين. ووسط الهلال بالطول والعلا ...عاوز باسيرو عشان تكتمل الاوركسترا. التسجيلات بقى ليها (50) يوم. ما تقعدوا تتلفتوا لي. اشتغلوا صاح. البرير عليه ان يتكفل ب (لاعبين). وطه علي البشير لاعبين. والكاردينال لاعبين. وصلاح ادريس (فارس عبدالله ومالك وباسيرو). كدا ..تشيلوا كأس الاندية الافريقية من غير اي شك. خلونا نتكاتف مرة واحدة. وخلونا نثبت ان الخلافات لا تفسد للود قضية. فارس في الطرف الشمال ح يعيد لينا زمن تنقا ومحمد حمدان وزاهر مركز. يا صلاح ادريس ..سجّل لينا فارس وباسيرو ومالك اسحق ...وامشي المريخ ان كنت ماشي. ما بنسألك. بس عاوزين فارس ومالك وباسيرو. نسأل الله ...ان نراهم الموسم القادم في الهلال. لا بد ان يكتمل الهلال (بدرا). ....... عاجل : بسبب الغلاء ...لاول مرة (المرارة) تطلع من الخروف قبل (4) يوم من عيد الاضحي. وإن طال السفر - محمد عبد الماجد صحيفة قوون
