امس في هذه المساحة تحدثت عن السيناريو الكامل والتفاصيل الدقيقة لهدف اللاعب محمد احمد بشه في مرمى حارس مرمى المريخ عصام الحضري. تشة بشه ..كما تعارف عليها اهل الوسط الرياضي...الليلة عندنا (ضربة) بويا.
اليوم نتحدث عن الهدف الثاني للهلال في شباك المريخ هدف عبداللطيف بويا ..ونشوف الحصل شنو في هذا الهدف؟.
بس يا جماعة من هسع ...الاولو شرط ..اخرو نور ..ما عاوز أي مقاطعة ..وتداخلات.
خلونا نشوف شغلنا.
عندما سجّل اسحق كرنقو هدفه (الفتوي) في شباك عصام الحضري عام 2007م في بطولة الاندية الافريقية. عندما كان الاخير يحرس مرمى الاهلي المصري ...قال اعلام المريخ أن هدف كرنقو جاء في الحضري (صدفة).
صدفة كيف يا جماعة؟.
مخمخو لينا الحتة دي.
صدفة بتقطع الصحاري والبيادي دي كلها.
صدفة بتعمل كدا.
قالوا لينا كرنقو ذاتو كان قاصد (الكشافات)..قامت الكورة بالغلط مشت على شبكة الحضري حارس مرمى فريق القرن وقتها.
في الوقت الذي اعترف فيه الاعلام المصري بقوة وجمال هدف اسحق كرنقو في الحضري ..اذكر وقتها أن الصحفي والكاتب المصري حسن المستكاوي كتب عن الهدف انه كان تهديفة من خارج الخط ..بل كانت تصويبة من (اسوان)...اتخذت مكانها شمال الحضري.
نحن هنا في السودان ..غضبنا غضب شديد من كلام اعلام المريخ ...ومن قولهم إن هدف كرنقو في الحضري كان (صدفة).
الموضوع دا زعلني شديد ...وما عرفت اثبت الحكاية دي كيف وأؤكد أن الهدف لم يكن صدفة.
قلت ليهم (ديمقريطس) العالم الاغريقي الشهير يقول : ( لا يوجد في الطبيعة شيء اسمه صدفة ، بل الصدفة خرافة اخترعت لتبرير جهلنا).
الكلام دا كلام علمي واضح ...ونظرية طالعة من زول فيلسوف.
الجماعة ما اشتغلوا بي كلامي ..واعتبروا الحديث دا ..(تنظير) ساكت.
يا ربي ديل نفهمهم كيف؟...نشرح ليهم ازاي.
قالوا لي (ديمقريطس) شنو؟ ...هو (قون) ولاّ حصة (فلسفة)..انتوا مالكم عاوزين تخربوا لينا الكورة ..وتتفلسفوا لينا فيها كمان.
غايتو يالهلالاب ..فلسفتكم متل (عيش القنقر).
عيش القنقر ..طبعاً ما عندو أي دخل بالكلام دا.
قلت ليهم يا جماعة (ديمقريطس) دا كان بعرف بالفيلسوف الضاحك ...وهو ولد في أبديرة ، تراقيا (460 ق.م - 370 ق.م)...الشيء دا مثبت (علمياً).
قالوا لي الكلام دا كلو في هدف كرنقو.
قلت ليهم انتوا قايلين هدف (كرنقو) ساهل.
المهم الجماعة قدر ما شرحنا ليهم ..وقلنا ليهم إن هدف كرنقو لم يكن صدفة ما صدقو.
قمنا عملنا شنو؟.
قلنا نطبق ليهم النظرية تاني...احسن حاجة نثبت ليهم النظرية تاني.
في (صدفة) بتتكرر.
اصلو نحن ما بنحب الغلاط ..وأي واحد بغالطنا ..بنحددها معاه ..بالنا طويل ..بنمشي معاه خطوة ..خطوة لمن يقتنع.
واحدة ...واحدة ...نحن ورانا شنو؟.
قررنا نحن في الهلال نكرر الهدف (الصدفة) دا تاني.
وقلنا الجماعة ديل ما بقتنعوا إلا الهدف نطبقو في (الحضري) ذاتو...(احسن حارس في افريقيا).
لو جبناه في (اكرم الهادي سليم) ما بحسبو لينا.
قعدنا نفكر....ما خلينا لينا (شاي).
القهوة دي حايمة زي (الدو).
قلنا لازم نصيب بي حجر واحد عصفورين.
يعني (الهدف) الصدفة دا لو كررناه في (الحضري)...الجماعة بتاعين الغلاط ديل ..برضو ما بقتنعوا...احسن شيء ..نجيب الهدف دا في الحضري ..وفي المريخ في نفس الوقت.
ما عاوزين نديّهم أي فرصة.
لكن دا ببقى كيف؟.
قلنا لازم الحضري يجي يلعب في المريخ ..عشان يختصر لينا الحكاية ..ونصيب بي حجر واحد عصفورين.
الحضري وقتها ..ما كان عندو أي علاقة بالمريخ ..(لا من بعيد لا من قريب).
ما في حاجة وقتها بتلم الحضري بالمريخ.
في ناس قالوا لينا كلامكم دا بعيد ..وما بدخل ليه في عقل زول..البجيب الحضري للمريخ شنو؟.
قلنا ليهم ..بنجيبو...نحن صعبين ..نحن (شفوت) ما عندنا حاجة اسمها ما ممكن ومستحيل ..والحكاية دي صعبة.
قعدنا (نمخمخ) ليك في الرأس ..ونضرب ليك اسداس في اخماس ..لمن جبنا ليك (الحضري).
الكلام دا كلو ليه يا جماعة.
الكلام دا عشان (الضربة) تكون واحدة.
يا جماعة ما تسرحوا...لو قعدتوا تسرحوا لي كدا ..أنا العمود دا والله بقفلو هنا.
ما تخلوني كل مرة ..اقعد انبه فيكم واذكر.
أنا الكلام ما بكرروا مرتين...(عشان تبقوا عارفين).
خلاصة الكلام ..جبنا الحضري يلعب في المريخ.
دي عملناها كيف ما تسألوني.
كدا (الخطة) نصها ...اتنفذ.
لكن نحن في اثناء التجهيزات ...والتخطيطات ..ظهرت لينا (معضلة) خطيرة.
معضلة زي البقولوها لينا ناس السياسة في أي جولة مفاوضات.
تفتكروا (المعضلة) الظهرت لينا ..وكادت أن تنسف لينا هدف بويا (الاعادة) شنو؟.
يمين ..لو قعدتوا تفكروا للصباح ما بتعرفوها.
الحكاية دي عارفنها نحن بس ...ما في زول عارفها غيرنا.
المعضلة دي ...كانت تتمثل في هيثم مصطفى.
هيثم مصطفى في هدف كرنقو ..كان بيلعب في الهلال ...وهو الذي مرر الكورة إلي (كرنقو) عشان يجي منها الهدف.
وهيثم مصطفى هسع بيلعب في (المريخ)...يعني في عنصر مهم وأساسي في (الهدف) ما موجود.
نسيت اقول ليكم يا جماعة نحن الهدف عاوزين نطبقو بي حذافيره.
عشان شنو؟.
عشان ما ندي فرصة للمريخاب ديل (يا جماعة تابعوني ما تسرحو).
أنا لو سرحتوا تاني ..العمود دا بخليه.
والله ما بتمو.
ما تخربوا لينا مزاجنا.
طيب دي نحلها كيف؟.
هدف كرنقو جاء في الحضري من (تمريرة) من هيثم مصطفى ...الحضري الان في المريخ ...وهيثم مصطفى ذاتو في المريخ ..نخترع (التمريرة) دي كيف؟.
يا زول (المعضلة) دي قعدنا نحلحل فيها (شهر) كامل.
شهر كامل نحن ما عارفين نصرف كيف؟.
في ناس مننا قنعوا ..قالوا لينا الهدف تاني ما بتعاد ..ما بتكرر ..وقاموا انصرفوا على كدا.
لكن نحن كنا (مصممين)..لازم نلقى لينا حل.
يا ربي نرّجع هيثم مصطفى للهلال ..وإلا نجيب الحضري من المريخ.
يا زول (الحضري) بعد العمر دا نعمل بيه شنو؟.
الحضري دا بعد السن دي ...في الهلال (مدرب حراس) ما بنفع معانا.
نحن في (ورش) التفكير والتخطيط دا ..(عبدالماجد) يا بابكر سلك ..قال لينا انا بحلها ليكم.
قلنا ليه بتحلها كيف يا شفت؟ ..والله دي (مورينهو) ما يحلها...ألعب لعبك ساكت يا ولد.
عبدالماجد قال بحلها.
طيب حلها يا أبوالحليل.
انتوا قايلين ما حلاها لينا.
والله صنع لينا (حل) ...ناسكم بتاعين السياسة ديل لو عرفوه ..بقولوا ليه شفنا لينا حل لرفع الدعم من المحروقات.
عبدالماجد ..قال لينا ...انتوا عاوزين تمريرة من هيثم مصطفى ...عشان الحكاية تبقى (نفس الشيء).
قلنا ليه ايوا ...امال نحن من الصباح ..بنقول في شنو؟.
عبدالماجد قال لينا ...خلاص ...لازم (الكورة) تنقطع من هيثم مصطفى في هدف بويا ..عشان (القطعة) دي تبقى زي (التمريرة) التي مررها هيثم مصطفى لكرنقو.
عشان تكتمل عناصر العملية.
قلنا ليه ...الله عليك ...دي عملتها كيف؟.
جبنا ليك (عمر بخيت) باعتباره قائد الهلال مثلما كان هيثم مصطفى قائد الهلال سنة 2007...قلنا ليه انت لازم يا عمر تقطع (الكورة) من هيثم مصطفى ...في الجزء الخاص من ملعب المريخ ...في نفس الحتة التى مرر منها هيثم مصطفى كورته إلى كرنقو سنة 2007م.
حددنا المكان.
بعد كدا ..قلنا لعبداللطيف بويا ..انت بتلعب في الطرف الشمال ..يعني انت الزول الذي يفترض أن يأتي من الخلف ..ويشوت في الحضري ..من الكورة المقطوعة من هيثم مصطفى والتى سوف يمررها لك كابتن الهلال.
اها جهزنا الخطة ..وقعدنا منتظرين هيثم مصطفى أن يأتي لنفس الحتة التي مرر منها لكرنقو سنة (2007م).
قبل كدا قلنا لي عمر بخيت انت ذاتك سجّل ليك هدف...قبل هدف بويا ..عشان هدف بويا يكون (الهدف التاني) زي هدف كرنقو في الاهلي المصري..فقد كان هدف كرنقو (الهدف التاني) في المباراة.
قبلو في هدف ..وبعدو في هدف...وهكذا كان هدف عبداللطيف بويا.
انتظرنا ليك هيثم مصطفى (41) دقيقة إلى أن وصل لمسرح الحدث ...انقض عليه عمر بخيت ..قطع الكورة ..مررها لعبداللطيف بويا القادم من الخلف.
قلنا لي بويا ..هدفك دا يأتي من مسافة ابعد من مسافة كرنقو ..عشان الحضري كبر في السن ..وبقى ما بشوف ..وعشان ناس المريخ ديل كمان ما يقولوا لينا الهدف (تسلل).
بويا ...قال ما في مشكلة.
قلنا ليه (الهدف) لازم يأتي شمال الحضري ..زي هدف كرنقو ..نحن ما عاوزين أي اختلافات في الهدف.
بويا قال لينا جدًا.
قلنا ليه الكورة تكون على نفس الارتفاع من الواطة.
بويا قال لينا ما في مشكلة.
قلنا ليه تتقدم (4) خطوات زي كرنقو...وترفع ايدك الشمال بعد الهدف وتجري على جمهور الهلال..بتلقى مسؤول العلاج هناك ..احضنو.
بويا ..قال كويس.
الدقيقة (41) جات ..عمر بخيت قطع ليك الكورة من هيثم مصطفى ..ومررها مع (القطعة) دي لي عبداللطيف بويا.
عبداللطيف بويا من (البطانة) ديك .. اتقدم (4) خطوات وشات ..من نفس الحتة .. من نفس المكان ..نفس الارتفاع ..نفس قوة التصويبة ..(أخدنا كل القياسات).....وجبنا القون.
عشان شنو؟.
عشان تاني ما في زول يقول لينا (صدفة).
الغريبة ...الموضوع حصل فيه تطورات كثيرة بعد كدا.
اكيد عاوزين تعرفوا (التطورات) دي شنو؟.
اصبروا يا جماعة..أنا الليلة متفرغ للهدف دا ..عاوز انقلو ليكم بحذافيره.
عاوز اجيبوا ليكم بالمسطرة.
بويا ...لمن سجّل الهدف ...هيثم مصطفى ..افتكر نفسو في الهلال زي ما قال ( أحمد الحاج)...قام جرى على جمهور الهلال.
انتوا فاكرين (17) سنة بتروح كدا ساكت.
هيثم مصطفى افتكر بويا ..اسحق كرنقو ...وقايل المريخ (الاهلي المصري).
عاين لمرمى المريخ ...لقى (الحضري) واقف ...طوالي نسى نفسو ..وجرى على جمهور الهلال مع عمر بخيت وبويا.
الحضري ذاتو اتلخبط.
الحضري قايل نفسو في سنة (2007).
الحضري عاين لي ضفر ..افتكروا (شادي محمد) ايه انت بتعمل في ايه يا شادي... كورك ليك فيهو على اساس انو (شادي)...وقال ليهو انا موش اتلك ما يشوتش من بعيد...انت موش عارفش ..اني ما بشوفش في الليل.
الحضري عاين لي باسكال ..افتكروا احمد السيد ...طوالي قال ليه : انت فين يا احمد؟...عمليتكم دي موش كريمة ...ليه تخلونيش براي في المرمى.
الكورة في القون ...والحضري مرمي في النجيلة (قدامو 27 قارورة مياه فاضية) ... وهو بتذكر في شريط الاهداف.
أمام الاهلي ثلاثية...داريوكان ...كرنقو وقودوين.
الحضري بتذكر في هدف سانيه بي (عين واحدة).
وبتذكر في اهداف مهند الطاهر ...مهند من أي حتة شات ليه كورة دخلت في عصام الحضري.
وبتذكر في هدف عمر بخيت ..وبويا.
الوقت الذي كان بتذكر فيه الحضري ...هدف بشه ما كان جا.
الاهداف دي كلها جات في الحضري.
زولكم قعد يتألم ..(انا تعبت اوي اوي اوي اوي يا بويا)...حرام يا ناس البتعمل فينا دا...دا ما يحصلش في (رابعة العدوية).
ايه دا.
ليه الظلم دا.
دا انا غلبان.
لكن يا الحضري اقول ليك شيء.
هدف (بويا) دا ما تشتغل بيه كتير.
هدف (اشاعات).
اشاعات يا الحضري اشاعات.
بعد كدا ممكن اقول ليكم ارجعوا لي كلام (ديمقريطس)...اذ اثبتنا ليكم من خلال هدف بويا (الاعادة) انو ما في حاجة اسمها (صدفة).
صدفة شنو؟.
نحن في مباراة ولاّ في حدايق عبود.
عليكم الله كلام الحب دا ...تاني ما تدخلوا لينا في الكورة.
عشان ما تخلونا نغلط معاكم ساكت.
ملحوظة : باقى لينا هدف عمر بخيت.
هوامش
مباراة اليوم التى يخوضها الهلال امام الاتحاد مدني مطلوب فيها أن يكون الهلال ملتزماً ومنضبطاً ..ومنتصرًا انتصارًا كبيرًا إن شاءالله.
مطلوب أن يعود جمهور الهلال من اجل عودة الانتصارات الكبيرة ...والعرض الجميل.
الهلال في الفترة السابقة افتقد الجمهور.
لذلك تراجع مستوى الهلال وتدهور.
في عودة الجماهير ...عودة عافية الهلال ...وعودة الاهداف الكتيرة.
ارجعوا عمروا استاد الهلال بحضوركم الكبير.
اكتب قبل مباراة الامل والمريخ ...وعاوز ارسل العمود من بدري ..عشان نتفرغ لمباريات بطولة الاندية الاوروبية.
مالنا ومال السهر.
اتمنى أن يبدأ تراوري اساسياً في تشكيلة الهلال ..عشان يبعد بلقب هداف الممتاز.
لا سيما وأن بكري المدينة غايب بسبب الانذار غير المستحق الذي منحه له الفاتح وديدي.
مشاركة محمد عبدالرحمن ايضاً تنتظر ...لذلك اتمنى أن يكون في تشكيلة الهلال اليوم ثلاثة مهاجمين.
مدثر كاريكا مطلوب منه اكثر من هدف ..الليلة احتفاء بمولوده الجديد (مهاب).
ومطلوب من بشه ونزار والشغيل وعمر الاحتفاء مع جمهور الهلال بمولود كاريكا الجديد.
لا سيما وأن كاريكا بحتفل بكل المناسبات في الهلال.
الليلة عاوزين نحتفل ب (مهاب).
تصريحات اللوردات خطر حقيقي على الرياضة ..ويمكن ان تظهر الكثير من الكوارث والمشاكل.
ديل بصرحوا ساكت.
ديل بقطعوا من رأسهم.
عاوزين يعملوا لينا (الكراسي) موضوع.
يا لوردات انتوا بتكبروا متين.
همد ..قايل نفسو (لورد)...هو ذاتو قعد يصرح.
طبعاً همد لو ما صرح شهر ممكن يموت فيها.
اهم حاجة عندو (التصريحات).
مظهر الهلال وشكله والزي الذي اصبح يظهر به ..اعطى الهلال هيبة وجمال.
التحية للمجلس ودائرة الكرة على هذا المظهر الجميل الذي اصبح يظهر به الهلال.
شكلو كدا ...الشغيل ح يسجل من ضربة رأسية.
اتقدم يا الشغيل ..واستفيد من طول القامة في الكور العكسية.
مهند الطاهر ...عاوزين نشوف هوباتو.
من هوبتو طولنا.
فريق الاتحاد مدني فريق محترم وخطير ..وقد افقد الهلال نقطتين في مدني.
سجل الاتحاد في شباك الهلال هدفين ...وهذا يعني خطورة الاتحاد.
لذلك يجب حسمه مبكرًا.
اوعكم من التأجيل للشوط التاني.
واوعكم من الهدف الوحيد ..وفارق الهدف.
فارق الهدف ...هو الشيء الذي اضاع الهلال وفقده الكثير.
في المريخ لو كان تقدم الهلال بفارق هدف ...كان المريخ ادرك التعادل.
وبعد اصبح الفارق هدف ...كاد المريخ أن يدرك التعادل.
