كيف سيتم التعامل مع القادمين من جحيم آل دقلو؟    السودان يعلن رؤيته الاستراتيجية لمكافحة الملاريا بمناسبة اليوم العالمي للملاريا    الهلال في اختبار لا يقبل التعثر    نشرة إعلامية متكاملة تواكب انطلاق البطولة العربية لألعاب القوى للشباب بتونس    الي اين نسيير    الاتحاد مدني يحسم موقعة الوفاء... و«حمدا» يفتتح للزمالك في ليلة احتفاء بصنّاع المجد    ترامب: إيران ستقدم عرضا    شاهد بالفيديو.. نفت من خلالها الشائعات.. الفنانة إيمان الشريف تستقبل مكالمة هاتفية من والدتها أثناء إحيائها حفل جماهيري بالقاهرة    بعد إعلان إصابته بورم خبيث.. آخر تطورات الحالة الصحية لنتنياهو    شاهد بالفيديو.. عريس سوداني وعروسته يشعلان مواقع التواصل بنشرهما لقطات من احتفالهما بشهر العسل بأحد الشواطئ    شاهد بالصورة والفيديو.. الفنانة نسرين هندي تخضع لعملية جراحية وسط دعوات المئات من جمهورها ومتابعيها    اللواء الركن (م) أسامة محمد أحمد عبد السلام يكتب: السيد رئيس الأركان هناك راجمة (ضاربة) على السودان    سلفاكير إلى أديس أبابا..ورئاسة الجمهورية تكشف    شاهد بالصورة والفيديو.. زوج السودانية "إحسان" يفضحها بنشر مقطع لها وهي في حالة "سكر" بعد شرب "البيرة" في الشارع بجوبا    شاهد بالصورة والفيديو.. ظهور أفراد من "المليشيا" بشوارع أم درمان يثير قلق المواطنين ويفجر موجة من الغضب داخل مواقع التواصل    شاهد بالصورة والفيديو.. الفنانة نسرين هندي تخضع لعملية جراحية وسط دعوات المئات من جمهورها ومتابعيها    تُرى من يقف وراء هذا الخلاف العجيب؟!    مكافحة التهريب البحر الأحمر تُبيد (3.5) طناً من المخدرات    "مصر والسعودية وتركيا تستخدم النووي الباكستاني".. تحذير إسرائيلي من تحالف جديد بالمنطقة    تحديث جديد من آبل لإصلاح خلل في إشعارات الرسائل    الزمالك يتفوق على بيراميدز في المواجهات وفارق الأهداف قبل صدام الليلة    درة: دور ونيسة فى فيلم الأوله فى الغرام من أحلى الأدوار فى حياتى    سلاف فواخرجي ترفض يحيى الفخراني.. وتراقص باسم سمرة    القذافي وقصة "الشيخ زبير" المثيرة!    ليست حموضة عادية.. دراسة تكشف علامات مبكرة لسرطان المرىء    مكافحة التهريب البحر الأحمر تُبيد (3.5) طناً من المخدرات    شاهد بالفيديو.. الجاكومي: (قابلت حمدوك في برلين وبادر بالسلام وقال لي نحنا مختلفين سياسياً لكن حب المريخ يجمعنا)    برشلونة يعلن انتهاء موسم يامال    هاري كين يتصدر صراع أفضل لاعب فى العالم 2026.. ومحمد صلاح ضمن السباق    عادة بسيطة تقلل التوتر وتحسن الصحة النفسية    أطباء بلا حدود : علي ظهور الجمال والحمير … اللقاحات تصل جبل مرة    ترامب: سنمدد وقف إطلاق النار مع إيران حتى تقدم طهران مقترحاتها وتكتمل المفاوضات    تكرار العدوى أو المرض.. أسباب شائعة لا تتجاهلها    محافظ مشروع الجزيره :المليشيا نهبت ودمرت أصول المشروع بطريقة ممنهجة والخسائر بلغت 6 مليار دولار    الهلال «مدرسة» قبل أن يكون «نادياً رياضياً»    إحباط محاولة تهريب في السودان    ترامب: استخراج اليورانيوم المخصّب من المنشآت النووية الإيرانية ستكون عملية صعبة    إدخال البصات السفرية لحظيرة الميناء البري بالخرطوم وسحب 950 سيارة مدمرة حول السوق المركزي    ارتفاع في وارد محصول الذرة وانخفاض في الأسعار بالقضارف    الدعيتر.. كان اللغة الثانية في البلاد    مصر.. قرار بشأن المنتقبات بعد تدخل شيخ الأزهر في عملية اختطاف هزت البلاد    عثمان ميرغني يكتب: الصورة مقلوبة    عاجل..إيران: فتح كامل لمضيق هرمز    السودان.. انخفاض معدل التضخم    موجة مرعبة.. حمى الضنك تتفشى في ولاية نهر النيل بالسودان    مكافحة التهريب بالبحر الأحمر تضبط 340 كيلو آيس و200 ألف حبة مخدرة فى عملية نوعية بالتعاون مع المخابرات العامة    السودان.. تفاصيل صادمة لاغتيال مواطن بدمٍ باردٍ    إيران تهدد: موانئ الخليج لن تكون في مأمن إذا حوصرت موانئنا    شرطة ولاية نهر النيل تضبط (53) جوالًا من النحاس المخبأ تحت شحنة فحم بمدينة شندي وتوقيف متهمين    الإمارات والبحرين توقعان اتفاقا لمقايضة الدرهم والدينار    السودان.. القبض على 4 ضباط    قضية أثارت جدلاً.. براءة عصام صاصا من تهمة المشاجرة بملهى ليلي    عثمان ميرغني يكتب: فساد.. الفساد..    شراكة استراتيجية بين "الشباب والرياضة" و"الصناعة" لتمكين المبتكرين ودعم الإنتاج الشبابي    الشيخ بن زومة.. إلى جنة الخلد    في زمن الضجيج.. القرآن بوصلة المعنى والسكينة    صوت لا يغيب.. محمد رفعت ورحلة الآذان الخالد في رمضان    شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



جوز الحمام في الدمازين بعرف (7) لغات غير دبلوم صيانة الحاسوب
محمد عبد الماجد نشر في النيلين يوم 24 - 11 - 2013

الدمازين لسه بي خيرها ...اتغيرت حاجات كتيرة ..لكن الدمازين مازالت تحتفظ بسمات الزمن الجميل.
المدن في السودان (ذاكرة) حية للكثير من الاحداث والذكريات.
اي مدينة فيها شارع المدرسة ..وميدان الكورة ...وكشك الباسطة..وشجرة نبق.
الدمازين لها خاصية وحدها ..مسكونة هي ب (صعيد) مدني جميل.
مازالت الدمازين تحتفظ بي (جكسا في خط ستة)...(وحمد والديبة حاجة عجيبة)...(او تنقا ..تنقا ..تنقا)... (وسا سا سا سادومبا) ..(واسأل العنبة الرامية فوق بيتنا).
هسع سا سا سا سادومبا ...بقت سا سا سا سيدي بيه.
انتوا ناس الهلال ديل قصتهم شنو مع (السينات) دي.
كل الاشياء في الدمازين ..هلالية خالصة...من تصبح لمن تشرق ما بتلاقى ليك مريخابي.
قالوا ليك المريخابي الوحيد في الدمازين ..من (ولاد الحصاحيصا) .. والايامات دي قالوا (طفش) من البلد...بعد ما لعب النيل (سنترليق).
دمازين الزمن الجميل ، والقون من برة الخط يا مهند الطاهر.
سيدي بيه في الدمازين ...(سيناتو) برة.
بمناسبة (علبة الساردين) الفوق للتلاجة ديك.
هي وينها (علبة الساردين) هسع؟.
قالوا ليك اي واحد في البلد دي يقول ليك عن الماضي (الزمن الجميل) ، ونحن زمان كنا وكنا وكنا..واي زول يقعد يحكي ليك عن الكورة او الفن او السياسة زمان ..بقول ليك عهدنا دا كان (العهد الذهبي) للسودان.
زمان (البنت) ما بتشوفها إلا في (الكوتشينة).
في الكوتشينة ذاتها لو لقوها في ورقك ...بدكوا ليك ورقك.
السودان دا اصلا ما كان فيه عهد (فضي)..او نحاسي كدا...كلو كان عهود (ذهبية).
طبعا هسع عهدنا دا عهد (صفيحي).
ناس الخمسينات ..يقولوا ليك ..الخمسينات كانت (العهد الذهبي) للسودان ..الانجليز يا دوب طلعوا من البلد ، السودان كان مفتح زي الزهرة ...والبلد كانت بي خيرها ، اصلو ما في زول بقول ليك ما عندي.
في الخمسينات ما في زول كان بديّن ليه (قروش) من زول ...سمعتوا ليك زول في الزمن الماضي داك ..قال ليك انا كنت متسلف لي قروش من زول.
البلد كانت لسع ما خربت في الخمسينات ..الحاجات والخدمة المدنية زي ما تركوها الانجليز.
السودانيون كانوا لسع ما دخلوا ايدهم في حاجة ..عشان كدا اي حاجة كانت فوق.
هسع يا كافي البلاء ..الموردة نزلت.
زمان الموردة عادي تضرب ليك (المريخ) دا زي الحمام.
الدنيا كانت حلوة...قبل ما يظهروا ناس صديق علي صالح ومصطفى توفيق.
في الخمسينات ..قالوا ليك (كيلو الباسطة)..تلقى قاعد تحت الزير ما في زول بمشي عليه.
الكديسة اللبن البايت ما بتشربو.
ناس الستينات ..يقولوا ليك (العهد الذهبي) للسودان كان في عهدنا نحن ديل ...البلد كانت في مرحلة انفتاح ..والناس يا دوب بدأت تحصد ثمارات كفاحها وعلمها وثقافتها.
الكورة والسياسية والفن ..كلها ازدهرت في الستينات ..واتبلورت (الثقافة) في كل اشكال الحياة في السودان.
سيد اللبن ..البدق ليك الباب تلقاه قاري (الحب في زمن الكوليرا).
الناس كلها كانت واحد ..مستوى المعيشة واحد ..الفايت الناس شوية تلقى عندو (عجلة).
ما في حاجة اسمها (همر)..او روتانا سينما.
ناس السبعينات ...يقولوا ليك (العهد الذهبي) للسودان كان في السبعينات ...الما عاش في السبعينات ما عاش...ما تسمع كلام ناس الستينات ديل.
ديل كانوا (ممصرنين) ساكت ..ما كانت في حاجة سودانية كدا خالصة.
في السبعينات ....بطل الفيلم الهندي ما كان بموت ...هسع (البطل) يموت قدامك في اول خمس دقائق..ما تقدر تقول اي حاجة.
ناس التمانينات يقولوا ليك لا..العهد الذهبي للسودان كان في التمانينات...الجنيه كان بي (4) دولار.
التفاحة كان فيها (12) تفاحة.
ما زي هسع ربع البصل فيه (بصلة) واحدة.
ناس التسعينات ..مقتنعين ..ما بنافسوا...اي واحد تقول ليه انت عملت شنو؟.
يقول ليك قلبت (الحمامات) سايفون.
ناس الالفية الثالثة ..برة المنافسة في الاساس.
ناس الالفية الثالثة ...ركبوا الاطباق والدشوش وبقوا يتفرجوا لي في هيفاء وهبي ونانسي عجرم.
لسانهم اتعوج.
الدمازين ..هسع بتعيش زمن جميل ..بي خضرتها ..وبي ناسها ..وان كانت تأثرت بالصراعات والحروب في المنطقة.
لكن تبقى رغم كل هذه الجراح ..الدمازين عايشة في عهد ذهبي ..صنعتو براها.
الهلال يوم الاثنين ح يلعب مع المريخ في الدمازين.
يا ناس الدمازين ابقوا عشرة على هلالكم.
الهلال.... الدمازين وام درمان وعطبرة وكسلا ...كلها عنده واحد.
ما فارقة معاه.
ناس المريخ طبعا ان مرقوا (صالحة) دي ..بتجهجهوا ما بعرفو رأسهم من كرعينهم.
رأسهم بضرب.
اكرم الهادي سليم ..في استاد المريخ ناس كاريكا ومهند الطاهر قاعدين يجهجهو...تتخيلوا موقفو ح يكون كيف في الدمازين.
اكرم الهادي سليم في الدمازين ..لو سألتو عن جدول اتنين بقول ليك ما حافظ فيه حاجة.
باسكال في الدمازين بكون زي الطفل الرايح من اهلو في المولد...حالتو تحنن الكافر.
احمد الباشا ..طبعا في ام درمان اختفى ...يا حليل الباشا الكان باشا بحق وحقيقة.
يا ناس الدمازين قالوا يوم الاثنين في (طرد) حمام ح يصلكم من ام درمان.
برج حمام كامل كدا ..ح يجيكم يا ناس الدمازين.
الهلال ح يضرب ليكم (الحمام) دا ..طبق ..طبق.
حمامة...حمامة.
حمام الدمازين ...حمام غلاد وكبار وسمح.
ناس باسكال واوليفيه وضفر ديل حمام (مجنح).
ما بقدر يطير.
قالوا ليك حمام الدمازين بجيّد اجادة تامة (7) لغات.
بجيدوا (النفخ)..والكضب ..والخمج الاعلامي.
هسع عليكم الله في (حمامة) عاقلة كدا ..بتعمل البعملوا فيه ناس المريخ ديل.
حمام المريخ قالوا فاوضوا مدثر كاريكا ..وسيف الدين مساوي.
انتوا يا حمام ...ما عارفين ناس كاريكا ومساوي ديل ..ما بفاوضوهم إلا بواسطة (الامم المتحدة).
يعني ما في زول في المريخ الان عندو مستوى عشان يقعد مع كاريكا ومساوي.
انتوا تقعدوا مع بلة جابر...تقولوا ليه جدد لينا.
تقعدوا مع ضفر ..تقنعوه بعد ما حلف قسم.
تقعدوا مع العجب ...تشربوا معاه قهوة.
تقعدوا مع اكرم ..تقولوا ليه ح نخصم من مرتبك.
لكن تقعدوا مع كاريكا ومساوي ..عشان تتكلموا عن شنو؟.
كاريكا ومساوي ديل ..اقل حاجة بتكلموا فيها (حادث المنصة).
اها نوع ديل ..تجيبوا ليهم زول من وين عشان يقعد يتكلم معاهم ويتحدث.
غايتو نحن (الحمام) بتاع الدمازين المرة دي ..ناوين (ننتف) ليه ريشو.
اي ريشة عندنا ليها (نتفة) خاصة.
بعد ما ننتف (الريش)..قررنا كلنا كدا ...نشوي الحمام.
عاوزين حمام مشوي.
فترنا من (شوربة الحمام).
المرة دي عاوزين نخش على شية الحمام.
مالك وخليفة والمعز محجوب والشغيل ...ديل ناس خصصناهم للنتف.
نتف الريش.
الشغيل حالف ما يخلي ليه (ريشة) طايرة.
نزار الصاقعة ومهند الطاهر وبشة وسيدي بيه وكاريكا ...ديل ناس (المشوي).
بعد ما ناس الشغيل ينضفوا الحمام من (الريش)..ح يحولوه لي ناس مهند ونزار وسيدي بيه وكاريكا عشان يشوى لينا الحمام.
طبعا الحمام قبل ما يشوه لازم يتبهر ...والتبهير دا مسؤولية عمر بخيت.
بعد دا ..طوالي الحمام يدخل الفرن.
الحمام طبعا ما عاوز ليه نار كتيرة.
(10) دقائق بستوى.
بعد ما يستوى ..بكري المدينة ومحمد عبدالرحمن وسيف مساوي ..ح يضربوا ليك الحمام.
والله الجنبك ما بتدي.
الغريبة قالوا حمام الدمازين ...مع ال (7) لغات ..عندو دبلوم صيانة اجهزة حاسوب.
قلنا ليهم ال (7) لغات دي عرفناها ...دبلوم صيانة الحاسوب دي شنو؟.
قالوا لينا موش اكرم الهادي سليم ..مرات بطلع في العراضة ..ويقعد يرقص.
قلنا ليهم بالحيل ..اكرم بعمل كدا.
قالوا لينا ..اها البعمل فيه اكرم الهادي سليم دا اسمو (دبلوم صيانة الحاسوب).
قلنا ليهم ان بقى كدا ...(ضفر) ذاتو عندو دبلومة.
عشان كدا قلت ليكم الدمازين ..دمازين الزمن الجميل.
جوز الحمام ...(ضفر وباسكال).
جوز الحمام كان فيه (11) زول.
بالله شوفوا الرخاء دا كيف؟.
الدنيا كانت سمحة ...واي حاجة فيها سعة ...ما زي هسع ..الناس مخلوعة ..وزيتها طالع.
الواحد لو عاوز يركب في الحافلة ..يتلفت ورا وقدام ..خايف يلقى ليه زول بعرفو.
المواصلات بقت غالية.
يعني لو طلعت حافلة الكلاكلة شرق ..ولقيت فيها (5) انفار من ناس البلد ..إلا تتحرفن وتقول للكمساري ..اسمع الحافلة دي ماشى المنشية.
يقول ليك : لا.
طوالي تتخارج ..وتقول ليهم معليش يا جماعة ركبت غلط.
ملحوظة : إلا تعمل كدا.
هوامش
وليد علاءالدين موهبة جيدة ...ولاعب ممتاز ...ما في ذلك شك ..وصغير في السن...لكن الهلال مفروض يركز على اصحاب الاجسام القوية ..والطول الفارع.
مالك اسحق ..وباسيرو بمبا ..يتميزان بالطول والجسم الرياضي القادر على المنافسة افريقيا.
لا بد للهلال ان يدخل طرف اصيل في مفاوضة مالك وباسيرو خاصة وهما مطلقا السراح.
ما تضيعوا مالك وباسيرو يا ناس الهلال.
الوزير ..ضيّع علينا الممتاز ...والظاهر عليه ح يضيع علينا نجوم التسجيلات.
خالد ابوشيبة ونادر عطا ..كتبوا كلام جميل عن الامين البرير.
والبرير يستحق التقدير ...والتكريم ..اوفى في فترته ..ولم يترجل او يستقيل ..رغم الصعاب والمضايقات التى تعرض لها.
البرير خط له نفسه تاريخ لوحده.
اختلفنا ..او اتفقنا معه.
البرير يجب ان يكرم على صموده وثباته.
وعلى كل الهلالاب ..العمل والتكاتف في مرحلة التسجيلات.
ومباراة الدمازين ..مطلوب ان تكون كلمة الهلالاب واحدة.
محمد كوكو مهاجم الاهلي عطبرة ..لاعب جيد وممتاز ..ويستحق الدخول للكشوفات الزرقاء.
سنكارا ..وبمبا والمامي ...الله معاكم.
قشة ما تعتر ليهم.
لجنة التسيير فترتها يجب ألا تقل عن (6) شهور.
الانتخابات القادمة ..نريد ان يكون فيها تنافس قوى ..وتسابق شريف.
لذا لا بد ان تكون الفترة كافية ..وان تكون فترة لجنة التسيير اكثر من (6) شهور.
.......................
عاجل : سيدي بيه..قال جيبوا لي قياسات المرمى الجنوبي في استاد الدمازين بالملي.
وإن طال السفر - محمد عبد الماجد
صحيفة قوون

انقر هنا لقراءة الخبر من مصدره.