* فاطنة هو ما نطلقه دارجياً على فاطمة. * الليلة كلامنا عن فاطنة فرح. * موش سيدة فرح هى من اختارت اسم المريخ!!! * سيدة كانت مثقفة شديد الوكت داك. * ما زى ناس قريعتى راحت. * ولما لقت الناس بتبحث عن اسم بيرمز للقوة والجبروت. * أقترحت عليهم المريخ. * والمريخ هو الكوكب القاهر. * والقاهرة بشقيها ميدان التحرير ورابعة العدوية. * وراعى الجاموسة فى الغيط المصرى. * كلعم عارفين انو القاهرة سموها على الكوكب القاهر. * والقاهر هو كوكب المريخ. * عشان كدة. * بعد تسمية سيدة فرح بالسنين دى كلها الناس بتشرد مننا لليلة. * سيدة بحسن اختيارها سطرت اسمها فى التاريخ. * طالما الناس بتشرد مننا. * يبقى سيدة فرح احسنت اختيار الأسم. * أسم يا تجرى منو يا تمشى القسم. * المهم. * والتاريخ يمكن ان يعيد نفسه. * ويمكن ان يقتبس منه الحاضر. * قالوا مرة اختارت اسم ناديكم. * وأعظم الخلق بعد سيد الخلق هى الأم. * والأم مرة. * عشان كدة حقو نعظم المرة شدييييييييييييد. * أصلو المرة تلاتة انواع. * يا والدانا ومشرفانا. * يا مشاركانا الحياة. * يا مكسرانا. * محطمانا ما معانا. * المهم. * أقتبس الحاضر من التاريخ. * حاول ان يعيد سيدة فرح. * ففشل. * مجلس الأمراء. * سمعنا قالوا رشحتو برضو مرة. * يمكن متباركين بى سيدة يا ربى؟؟؟ * المهم المرة اقترحت وشكلت واختارت. * ما عارف اسمها منو. * يكون يا ربى فاطنة فرح. * ولا يكون سيدة الصادق!!! * مجلس مطبوخ صاح. * عشان كدة نرجح لحسن طباخة المجلس أن يكون الصنيع صنيع مرة زى ما تناقلت ذلك مجالس المدينة. * أيها الناس. * القروش البهلوها للأهلة الشرفاء. * لنادى الحركة الوطنية. * خلعت ناس الحركة الوطنية. * امس قالوا لاعبينهم فى امن وامان. * وأنهم حا يعيدوا تسجيل خليفة ومحمد عبدالرحمن. * وبعد داك حتى جابوا سيرة ناس كاريكا. * الناس ديل يا ماعندهم علاقة بالكورة. * عشان كدة قدموا خليفة على كاريكا. * يا خالعاهم القروش. * ومجلس الأمراء انا لو مكانو ما بصرف العطية كلها على التسجيلات. * أصلو المجلس مؤقت. * يقوموا يدفعو جزو للتسجيلات. * ويحولوا جزو دولارات. * يسددوا منها للفيفا. * ناس غارزيتو وعيدالحب ويوسف محمد وباقى الصف. * ويخلو التلت التالت للتسيير. * ويفرتقوا بعد داك. * لو صرفوها اسى كلها. * بكرا بتاعين الحافلات بيجيبوا امر قبض ويجوا. * ولكن اظن ان فاطنة فرح قد اصابت فى بعض الأختيارات. * وبالطبع أخفقت فى البعض الآخر. * يا ربى فى بعض تالت!!! * أيها الناس. * الهروب من الدمازين ده. * يعتبر فى عهد مجلس فاطنة فرح. * ولا فى عهد المجلس الكانت بتعارضوا سيدة الصادق. * ولا فى فترة الفراغ الدستورى!!! * المهم. * بالأمس خسر أشبال المريخ من النسور دورياً. * لأول مرة اشاهد خطوط هذا الفريق الشاب متباعدة. * ولأول مرة اراه يلعب بدون روح. * نفس اللاعبين. * ونفس المهارات. * ولكن كان هناك توليف فى بعض الخانات. * وتغيير فى التشكيل. * وهى امور مدرب. * لا نعرف اكثر من المدرب. * ولكن يمكن ان يخطئ المدرب. * وهو بشر. * ويمكن ان يخفق اللاعبين فهم ايضاً بشر. * والكورة نصر وهزيمة. * طالما كان هنالك ثبات فى المواجهة وعدم هروب دمازينى. * لذا. * يراجع الجهاز الفنى نفسه. * ويراجع اللاعبين ادائهم. * والعزيمة قائمة. * موجودة. * والفرصة للتتويج قائمة. * لن نتخلى عن الفريق. * وسنشجعه بقوة فى مباراته القادمة. * ونتمنى تحكيماًعلى مستوى عالى. * لا يخطئ فيقود البطولة لى ناس يفتقروا للبطولات هذا الموسم. * ترضية لهم. * كفاهم كاس ال. * هو اسمو كاس شنو يا ربى!!!! * أيها الناس. * الآن من حقنا ان نحتفل بالدورى والكاس. * بكاس الممتاز وكاس القزاز. * كاس الممتاز معروف. * وكاس القزاز ده كاس الناس الفزوا. * فزازى. * جنس فزازى. * ومن حقنا الأحتفال بكاس الرديف. * وآن اوآن تكريم الملك. * ولنا ان نكتسح التسجيلات كعادتنا. * بعلمية. * بأموال ليست ممنوحة صدقة وترضية لينا. * ولو وجدت الموردة ما وجده الهلال قبل فراره من الدمازين. * لما هبطت أبداً. * المهم التهنئة نسوقها لكل المجتمع الرياضى على وجه العموم. * ولنا ولأصدقاء الدولى عمر النقى. * نال عمر النقى درجة الدكتوراة من جامعة الخرطوم. * فى موضوع اقتصادى رياضة غير مسبوق. * عالمياً غير مسبوق. * ويا ليت فاطنة فرح رشحته لمجلس الهلال الجديد. * بالتأكيد كان أفاد. * بالذات والهلال تعبان أقتصادياً. * الهلال والصومال. * واااااااااااااحد. * أها. * نجى لى شمارات والى الخرتوم. * أكان شفت يا والينا. * مع حتة البرد الجاتنا دى بقينا نتيمم. * الوضوء مع البرد ده بجوعنا. * والجوع كافر يا والينا. * والكافر ما بصلى. * أخير نتيمم ونتدمدم ننوم. سلك كهربا *ننساك كيف وبنتيمم ونتدمدم وما بنتكلم. واللللللللللللللللللى لقاء سللللللللللللللللللللللك في السلك - بابكر سلك