تصريح غريب ..وعجيب اخرجه الامين العام لفريق المريخ عبدالصمد عثمان او عبدالصمد الامين او عبدالصمد عباس او عبدالصمد الخضر. الخضر ....كدا يمكن يكون اخو (الوالي). والي الخرطوم ...(مالكم انتوا). مرة في زول قالوا ليه : انت الزول دا اخوك. قال ليهم : ابدا. قالوا ليه : لكن بشبهك. قال ليهم : يعني شنو؟...هسه الصينين ديل ما بتشابهوا (اخوان). ناس مصر ديل ما في اي علاقة شبه بيناتهم ولا علاقة دم مع ذلك (اخوان). العالم اتقدم في الحتة دي. نرجع لي عبدالصمد. انا ما عارف بالضبط اسمو منو ...لكن على كل حال كدا اسمو عبدالصمد ...دي الحاجة الأنا متأكد منها. والحاجة التانية العارفها مية المية انو الامين العام لمجلس المريخ. لكن بلخبط مريخنا دا ولاّ مريخ بورتسودان. امينكم دا لسع ما طلع الممتاز. شفتوا محن الزمن عملت فينا شنو؟. عبدالصمد دا اخرج تصريح امس عقب تسجيل المريخ لمحترف الهلال السابق تراوري قال فيه : (اكد الاستاذ عبدالصمد محمد عثمان بان تسجيل المالي تراوري لايعتبر خرقا لاتفاقية الجنتلمان بين فريقي القمة المريخ والهلال , لان تراوري كان لاعبا مطلق السراح بانتهاء الموسم الكروي فى السودان وقد فاوضته اندية عديده من دول شمال افريقيا , وان المريخ قد فاوض اللاعب بعد انتهاء علاقته مع الهلال تماما , عبدالصمد اشار الى ان المريخ كسب لاعبا كبيرا فهو لاعب صغير السن وقد شوهد مع اندية عربية عديدة). حسب ما جاء في موقع (سودنا فوق). ايوا ..اسمو عبدالصمد محمد عثمان. قولوا لي عرفت كيف؟. من التصريح الفوق دا. دا يقولوا عليه شنو؟. الزول دا مع (الشتارة) جايب ليه (صريج). موش مرات بقولوا ليك مع البرد جابت ليها (زيفه). عبدالصمد عاوز يفهمنا شنو؟. عاوز يفهمنا انو تسجيل (تراوري) في المريخ ...ليس خرقا لاتفاقية الجنتلمان. طيري يا طيارة طيري. وقعت ليكم دي...ولاّ عاوزة ليها علبة حلاوة. اتذكرت قصة الحرامي التلب ليه في بيت عزابة وقعد يفتح في الخزنة. طلّع القروش وشال الرزم..العزابة صحوا لقوه واقف في نص الحوش وشايل القروش بالثابتة. قالوا ليه يا زول انت ما عاقل بتسرق ليك بيت عزابة؟. قال ليهم انا ما بسرق. قالوا ليه طيب جيت هنا تعمل شنو؟. قال ليهم جيت اجرب شاحن الموبايل دا شغال ولاّ ما شغال. قالوا ليه طيب القروش دي شايلها مالك؟. قال ليهم دي ما قروش ...دي (فلوس) ساكت. الجماعة قالوا ليه ان بقى كدا ..اتخارج واقفل الباب معاك...نحن كنا قايلنك جيت تسرق. هسع نحن عبدالصمد قال لينا نفس الشيء...قال تسجيل تراوري في المريخ ليس خرقا للاتفاقية. فالح والله. شاطر. انت يا عبدالصمد في زول مرة سألك من (النضارة) الانت لابسها دي..وقال ليك نضارتك دي (نظر) ولاّ شم؟. في زول مرة قال ليك الزول لو عاوز يمشي الثورة بالشنقيطي يركب حافلات مدني ولاّ حفلات كسلا. في زول وقع ليك الكلام دا. دا شنو البتعمل فيه دا؟. والله تصريحك دا من (بلة جابر) ما يطلع ...خلي يطلع ليه من زول هو الامين العام لمجلس المريخ. انت امانة المريخ دي جابتها من (بئر). جبتها قرعة. جبتها ترياق. البلد دي لو فيها قانون مفروض يحاسبوك على الكلام البتقول فيه دا. تصريحك دا ..زي لمن زادوا البنزين ...الناس طلعوا ..وماتوا وفي طرمبات حرقت ..ووزير المالية السابق قال زيادة المحروقات دي انتوا ما عارفنها. قلنا ليه طيب ورينا ..زيادة المحروقات دي شنو؟. قال لينا دي اصلاحات اقتصادية. زولكم بي بساطة كدا عاوز يقنعنا ان الزيادة ...اصلاحات اقتصادية. اصلاحات في شنو؟. واصلاحات لي منو؟. تعرف يا عبدالصمد تصريحك دا شفع الروضة ما بقنعهم. عارف تصريحك دا بشبه شنو؟. بشبه الزول البقرأ جامعة وبتخرج بتقدير جيد...ويقعد يصب كل نظرياته القرأها في تصليح الفول. يقول ليك والله (الفول) دا لو قلبت فيه (علبة صلصة) وختيتو (5) دقائق في النار ..يبقى ما يخلص. دي قرايتك مع الناس. دا علمك ...الظاهر انت كنت بتصلح الفول لاولاد دفعتك...وعامل لينا فيها خريج جامعي. تصريحك دا يا عبدالصمد ...زي حكاية (الصلصة) مع الفول. او زي حكاية زول عامل فيها فنان ...وشايف نفسو ..وقايل انو زول خطير. يقوموا يقولوا ليه غني لينا اغنية. يقوم يقول ليهم انا لو ما اكلت سندوتش طعمية ...ما بقدر اغني. يجيبوا ليه سندوتش طعمية. يقول ليهم عاوز لي (موزة). يجيبوا ليه (الموزة). يقول ليهم تروا كدا ...عاوز اخد لي نومة. ينوم ..يصحى يقول ماشي البيت. اها انت يا عبدالصمد ..تصريحك دا اخير منو تمشي البيت..(انا عارف الكلام دا ما بقع ليك). يقع ليك شنو؟. الزول دا مرة جابوه في قناة الشروق في نهائي كأس السودان (المسرحية) في الدمازين ..وسألوه عن المناسبة والاحتفالية ...قام قال والله نحن ما عندنا قضية بالهلال ...(دي ما قضيتنا). قضيتك شنو؟...القضية الفلسطينية. لو ما الهلال انت ذاتك ما كنت بتظهر ولا في زول بعرفك. قام هشام عزالدين مذيع قناة الشروق قال ليه : طيب ممكن تكلمنا عن فريق المريخ والجمع بين الدوري والكأس. قام تاني قال لي هشام عزالدين : (والله نحن ما عندنا قضية بالهلال). هشام للمرة الثالثة سألو...تاني قال ليه والله نحن ما عندنا قضية بالهلال. خلاص يا صائب عريقات. انت يا اخوي وقت ما عندك قضية بالهلال ..بدخل الهلال في كل كلمتين مالك. الزول دا ما شديد. الهلال عامل ليه هلع. قال شنو؟. قال تسجيل تراوري في المريخ ليس خرقا للاتفاقية مع الهلال. لا بالله. حلوة دي. انتوا (اتفاقيتكم) دي وقعها نيابة عنكم القلع عبدالحفيظ..(الظاهر كدا ما عارفين عنها اي شيء). بعدين دي اتفاقية شنو؟..البنتهكوها بالشكل دا. والله (اتفاقيتكم) دي ...اخير منها (حلة كمونية) حرقت. الجماعة نسوها في النار ..لمن حرقت. اتفاقية قال. سموها (سبهللية). او سموها (القطر قام). لكن كونكم تسموها (اتفاقية) يبقى بتلعبوا على الناس. والله يا عبدالصمد مفروض يودوك (روسيا)...عشان يدوك كورس هناك في الاتفاقيات. يوروك اول حاجة ليه (التاء المربوطة) ما بتجي في نص الكلمة. ويفهموك..لو انك حضرت بعد (المسلسل) مسرحية ..بجيك تسمم ..وبعمل ليك طمام. الروس ديل اسألني منهم انا. غايتو انت بي اتفاقيتك دي لو لموا فيك (روس)..بعملوا ليك طابور بطانية. طبعا ح تقول لي ما بعرف طابور البطانية. طيب اشرحها ليك كيف؟. بتعرف الزول لمن يقوم من النوم ...ويلقى نفسو ما وضع الموبايل في الشاحن ..عارف بعمل شنو؟. اكيد ما عارف. بضع الموبايل في الشاحن. ساهلة دي. اها الحكاية دي ..زي الحكاية ديك. طبعا ح تقول لي الحكاية دي شنو؟...والحكاية ديك شنو؟. بشرحها ليك يا عبدالصمد. بشرحها ليك لمن تقع ليك. جيب ليك علبة صلصلة (قديمة). اخرم علبة الصلصة.. كب موية في علبة الصلصلة. اها علبة الصلصة (المخرومة) بتمسك الموية. علبة الصلصة دي يا استاذ ..زي (اتفاقيتكم). ما وقعت ليك. طيب اقربها ليك اكتر. امشي سوق اربعة. كويّس ..دي صعبة كمان. امشي سوق اربعة ..واشتري ليك جوز حمام. حمام بطير ...(عشان بعدين ما تقول لينا ما وقعت ليك). اشتري جوز الحمام ..وفكوا. طبعا يا شاطر ..الحمام بطير. اها الحمام الطار دي ..زي (اتفاقيتكم). وقعت ليك. تاني. تاني يا عبدالصمد. اشتري ليك (بطيخة). اصلوا انتوا ما بتفهموا لاّ بالبطيخ. افتح البطيخة ...لو طلعت (قرعة). تبقى دي (اتفاقيتكم). وقعت. وقعت ليك ولاّ لسع. يا ربي يقولوا ليه شنو؟. يا زول اقول ليك زي عادل امام ..اشتري ليك (خرراية) واحدة كدا..وحشاها (جبنة). الجبنة ذاتها طلعها برة القوس...واضربها. بعد ما تضربها ..يبقى دي (الاتفاقية) يا فالح. قال شنو؟. قال تسجيل تراوري في المريخ ليس خرقا للاتفاقية. طيب خرقا لي شنو؟. انتوا عندكم (لغة) براكم. الاتفاقية عندكم في المريخ حاجة غير الاتفاقية عندنا في الهلال. يمكن اتفاقياتكم في المريخ (لالوب). ويمكن (صفق نيم). عندكم (فهم)..غير فهمنا الشغالين بيه دا يا عبدالصمد. بتفهموا الاتفاقية كيف؟. بتفهموها ..تفاوضوا كاريكا. وتسجلوا تراوري..وتحلموا بي مهند الطاهر. فهمكم للاتفاقية بالشكل دا ...ولاّ انا غلطان. يا زول اقول ليك حاجة ..لو قابلك (روسي) في اي زقاق ضيق ..احكي ليه قصتكم دي ..شوفو بعمل فيك شنو؟. يقولوا ليه تور ..يقول احلبوه. ملحوظة : غايتو (الاتفاقية) دي لو عملتوا ليها (خيش) بتبقى (قفص جداد). هوامش قالوا ليك طيارات الهلال بتبدأ تنزل محترفين من (فجر) الليلة. خلاص السما بتصب محترفين. لكن ليكم ولي زمنكم ..التسجيلات باقى ليها (9) يوم. (9) يوم دي جنسية واحدة ما بتطلعها. المريخ الان فيه (6) اجانب. طبعا نحن المجنس ذاتو عندنا (اجنبي). جنسيتو دي لا بنقتنع بيها ولا حاجة. ولا بنغشكم. في المريخ باسكال ومالك اسحق وغاندي وباسيرو واولفيه وتراوري...ولسع راميين للاجانب. الهلال الي الان ما سجل اجنبي. اتير شغال بي جنسيتو القديمة. لكن ناس الاتحاد العام ديل ممكن يحسبوا لينا (خليفة) اجنبي. ناس اسامة عطا المنان ديل ..ممكن يطلعوا ليك (خليفة) فرنسي. مجلس الهلال مجتمع عند كتابة هذا العمود ..لذا لم نكتب عن فيصل العجب. لكن كل امور الهلال خير ان شاءالله. اصلو ما في عوجة. يا الكاردينال ..انت المفاجأة حقتك (مسكول). ما شفنا اي محترف. صلاح ادريس المفاجأة حقتو بتكون (لحن جديد). نحن متعودين على الحاجات دي. في كل تسجيلات عندنا لحن جديد لصلاح ادريس عبارة عن (مفاجأة). لكن يا صلاح ادريس مفاجأتك دي بتفرح جمال فرفور ..تفرح حمد الريح ذاتو. لكن نحن لا. الحديث عن المنتخب بعد هذا التقدم ..ظلم له. المنتخب بيأخذ حقو براهو. .... عاجل : يا ناس المريخ لو تراوري دا قال ليكم امو (عيانة) ما تصدقوه. وإن طال السفر - محمد عبد الماجد صحيفة قوون
