سودارس : يوجد في المحل تحويل (رصيد) وتحويل (اطباق) كمان

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

يوجد في المحل تحويل (رصيد) وتحويل (اطباق) كمان

محمد عبد الماجد نشر في النيلين يوم 14 - 03 - 2014

امس قلنا نحول (الطبق)..نشوف (النيلين) فيها شنو؟.
قاعدة في (الصقيعة).
طلع ما فيها أي حاجة (بيش) ...ما بتستاهل حتى يحولوا ليها (رصيد) بجنيه...ناهيك عن (طبق).
الموضوع ما بستاهل.
حولنا (الطبق) شفنا (العجب).
الكلام دا بالجد شفنا (العجب) في مباراة مريخ الفاشر والامل عطبرة في ارض الاخير.
تلفزة مباراة الامس كانت تلفزة (اذاعية) بمعنى الكلمة ..شفنا فيها كل سوء التلفزة.
حفر ..وغبار ..وعجاجة رابطة ...تحلف تقول ناقلين ليهم (سبق خيل).
واضح أن المباراة منقولة بي (كاميرا) واحدة.
والكاميرا ذاتها الناقلين بيها المباراة الظاهر عليها دخلتها موية.
غايتو ما طالبني حليفة ..لكن كاميرتكم دي (شولة) ما بتنقلها.
طالب من الصف التاني إلى الصف التالت ما بتنقلو.
يا جماعة انتوا المباراة دي ناقلنها ب (كربون).
شيء تشوف ..وشيء ما تشوف.
ملجة بس ..على الهواء مباشرة.
تكاد تشك أن المباراة لعبت ( في العصر) ...نتيجة لسوء الصورة ..ورداءة الصوت.
الصورة في حتة ..والصوت في حتة تانية.
يعني الصوت بسبق الصورة بي حكاية بتاعة تلاتة أيام.
الكورة تكون في خط ستة بتاع مريخ الفاشر ..والصوت في خط ستة بتاع الامل عطبرة.
أو الكورة (جدعة)..والصوت (كورنر).
الصورة (مخالفة)...والصوت (بين الشوطين) ..(شفتوا الفرق دا كبير كيف؟).
فرق زمن مبالغ فيه.
زمنكم فارق يا ناس النيلين.
زي الزول (الاشتر) في الحفلة ..تلقى الفنان بغني في (سنتر الخرطوم) وهو قاعد يرقص في (الحزن النبيل).
شتارة مبالغ فيها كدا..
دا شغل بتاع (قلقلة) ساكت.
تتخيلوا في الكورة عاملين لينا ..تحويل اطباق عشان نتابع لينا مباراة في الدوري الممتاز.
عليكم الله الحكاية دي (مغصتها) ما بتشق.
الدوري السوداني دا تقول ناقلنو من (عطارد).
يا جماعة الموضوع ما بستاهل.
لفوه شوية.
كمان شرق.
فوق.
26 درجة.
يوم تمشي تكرم بشه ومدثر كاريكا ..ما في زول شغال بالكلام دا.
طبق شنو البنحولو.
كفاية الحصل في مباراة امس بين الامل عطبرة والمريخ الفاشر.
كل (السوء) قدم امس في مباراة الامل عطبرة والمريخ الفاشر.
الشوط الاول كله نقل (اذاعياً). عبر ال (اف ام)..تتخيلوا الكلام دا.
الناس تحول الطبق ليها وانتوا بتنقلوا المباراة عبر اذاعة (اف ام).
انتوا ما عندكم ضمانات لنقل المباريات.
المحير والمدهش ..ان مباراة الامل والمريخ الفاشر كانت في الشاشة مكتوبة تعادلية ( 0 / 0) في الوقت الذي كان فيه فريق الامل عطبرة يتقدم على المريخ الفاشر بهدف نظيف.
ربع ساعة ما قادرين يغيروا النتيجة..تقول عاوزين يغيروها ب (بنج) موضعي.
عليكم الله يا جماعة الناس ديل (مغصتهم) ما بتشق الزول اتنين..دا لو ما شقتوا اربعة.
مباراة من عطبرة ..ينقلوها بالقطاعي ..هجمة ..هجمة.
وعاوزننا بعد دا نحول الطبق.
المضحك في الامر ...(وشر البلية ما يضحك) ... البعض قال يا جماعة يمكنكم ان تعملوا (طبقين) عشان تتابعوا قنوات قمر عرب سات ..وقنوات نايل سات.
عاوزننا بعد العمر دا نعمل (طبقين).
هو طبق واحد في تلتلة ...كمان نركب الطبق التاني.
احسن ليكم رجعوا النيلين إلى نايل سات.
يعني بسيطة جدًا النيلين تكون في نايل سات وفي عرب سات ..زي قناة الشروق والتلفزيون القومي.
المريخ طلع من دور ال (64) تقول كان مشارك بالوكالة.
والاهلي عطبرة ..طلع من بدري.
والاهلي شندي طلع.
بقى الهلال براهو ..هو البفرح
عليكم الله هسع في حاجة بتلم الناس زي ما جمع الهلال الناس كلها في استاد الخرطوم (600) مليون جنيه.
منو العندو قدرة غير بشه وكاريكا ومهند وجمعة جينارو.
منو القادر يفرح ...غير نزار حامد وعبداللطيف بويا.
ملحوظة : ناس المريخ حولوا الطبق ..وطاروا تاني يوم.
هوامش
الهلال يلعب اليوم مباراة صعبة امام الرابطة كوستى.
الرابطة كوستى ايضاً المباراة صعبة عليها ..وهي مازالت في حزن على رحيل فارسها محسن عبدالله ..له الرحمة والمغفرة.
نتمنى ان يتجاوز الهلال الرابطة ...ان تتجاوز الرابطة الاحزان.
الامل عطبرة ..حقق اول انتصاراته في الدوري الممتاز.
تسعدني انتصارات الامل عطبرة ..كما تسعدني انتصارات الاهلي شندي.
ويفرحني كثيرًا هلال الجبال ..وهلال الفاشر.
الهلال الفاشر هذا ..يشبه كل تفاصيلنا.
وكذلك هلال كادوقلي ..الذي خرج كما الجبال ..من مدينة يحرسها (99) جبل.
ونحن على احر من الجمر انتظارًا لهلال التبلدي ..وهلال الساحل.
ما عاوزين لينا أي مريخ في الممتاز ...ما دام المريخ الكبير بطلع من دور ال (64).
طيب مريخ الفاشر يعمل شنو؟.
يا فيصل العجب ..السنة دي ..الله شافك من (التمهيدي).
....
عاجل : نحن في انتظار (هوبة) واحدة اليوم ..والباقى بنتمو بِشات.
وإن طال السفر - محمد عبد الماجد
صحيفة قوون

انقر هنا لقراءة الخبر من مصدره.