مشكلتي إنك قاسي حبّة..!! وما فهمت دروس هوانا ولا قوانين المحبّة الحياة جنبك جميلة.. بس طبيعتك برضو صعبة بيك متيم إلا خايف.. وفيني جمر الحيرة شبَّ أصلي حبيت (نور) عيونك.. وقلبي فاض بالريد تعبَّ وريدي ظاهر في عيوني.. لا تراجع.. لا تخبي وكم سهرت وراك ليالي.. وياما دمع الغيرة كبَّ ### وما بتأثر فيك دموعي ولا الأغاني ولا المشاعر عملي جدا في عواطفك ومستحيل يوم تبقى (شاعر) ترسم الشوق بي حروفك وتستكين جوه الخواطر إنت معروف جد محنّك وفي الحسابات ياخي شاطر بتحسب الإحساس بدقه ويبقى أرقام في الدفاتر لابترضاها الهزيمة.. ولا بتقبل بالخسائر ضد مشاعرك زول مصفح.. ومن حنينك ديمة نافر عادي تظلم حتي نفسك.. وتبقي في تقديرنا جائر وتنسي عشرتنا وجمالها.. وفي دقيقة تغيب تغادر لي تلوح بي (جوازك).. ومستعد دايماً تسافر مستحيل زول بس يفكر.. أنو مرة عليك يسيطر.. يبقي موهوم في اعتقادو.. .وما حسب حجم المخاطر إنت مخلوق من عنادك.. وما بطيق نيران بعادك.. أصلي ممكون فيك وصابر.. بينّا عايش ضد قناعتك.. ورغبتك ترحل تهاجر وعندك أحلام جد كبيرة.. وما بتحب خطب المنابر نفسك إنو الدنيا تصحى.. وتمشي زي ما إنت داير تبقى كل الناس نزيهة.. والبلد بي خيرو زاخر وأي حتة تكون نضيفة.. وفيها مشتولة الأزاهر أولوياتك طموحك.. ومابتحب علم (المظاهر) فينا محسوب قامة صفوة.. وظاهرة من ضمن الظواهر ما بتشبه مني حاجة.. واختلاف أطيافنا ظاهر إلا قلبي طلب ودادك.. وصدفة عاد بالريدة ظافر إنت حبيتني بطريقتك.. وقلبي فيك من يومو سادر جوة قلبك (كالكوليتر) بيهو تحسب حلم باكر منضبط في لون غرامك وواقع احساسك مغاير كاتم الشوق في الحنايا.. وحتى لو يوم جيتنا زائر لا بتعبر عن هيامك لا بتهمس.. لا بتجاهر ورغم إنك يا حبيبي.. شيخنا في علم الضمائر بس ضميرك في غرامنا.. نام.. وطرف أشواقي ساهر ويااامحير كل حواسى.. هل بتفهم معنى: (حائر)؟؟!! * تلويح: إنها الحيرة التي تدفعنا للتفكير وتعيننا على اكتشاف البعد الحقيقي لمشاعرنا فتزداد قناعتنا باختيارنا. إندياح - صحيفة اليوم التالي